Tharun Moorthy Viral Post: ഈ പടക്കളത്തിലേക്കാണല്ലോ ദൈവമേ സ്പ്ലെൻഡറും കൊണ്ട് ഇറങ്ങിയത്.!!! വൈറലായി തരുൺ മൂർത്തിയുടെ പോസ്റ്റ്

തരുൺ മൂർത്തി ഒരുക്കുന്ന തുടരും മെയ് മാസത്തിൽ പ്രേക്ഷകർക്ക് മുന്നിലേക്കെത്തും.

എമ്പുരാന് ശേഷം മോഹൻലാലിന്റെ ഏറ്റവും പ്രതീക്ഷ നൽകുന്ന ചിത്രമാണ് തുടരും. പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന ചിത്രം മെയ് മാസത്തിൽ തിയേറ്ററുകളിലെത്തും. ചിത്രത്തിലെ കൺമണി പൂവേ എന്ന ​ഗാനം ഇതിനോടകം ഹിറ്റാണ്. ഇപ്പോഴിതാ ചിത്രത്തിന്റെ സംവിധായകന്റെ പോസ്റ്റാണ് ശ്രദ്ധ നേടുന്നത്. 

Add Zee News as a Preferred Source

ഈ പടക്കളത്തിലേക്കാണല്ലോ ദൈവമേ സ്പ്ലെൻഡറും കൊണ്ട് ഇറങ്ങിയത്.!!! എന്നായിരുന്നു തരുൺ മൂർത്തി പോസ്റ്റ് ചെയ്ത്. എമ്പുരാന്റെ അഡ്വാൻസ് ടിക്കറ്റ് ബുക്കിം​ഗ് തുടങ്ങിയതിന് പിന്നാലെയാണ് സംവിധായകന്റെ പോസ്റ്റ്. എമ്പുരാന്റെ പോസ്റ്ററിനൊപ്പം തുടരും സിനിമയുടെ പോസ്റ്ററും ചേർത്താണ് തരുൺ മൂർത്തി പോസ്റ്റിട്ടിരിക്കുന്നത്. എന്നാൽ സ്പ്ലെൻഡർ കൊണ്ട് നമുക്ക് വാരാം, ഇത് എമ്പുരാനും മേലെ ഹിറ്റ് ആവും എന്നൊക്കെയാണ് പോസ്റ്റിന് പിന്നാലെ വന്ന കമന്റുകൾ. 

എമ്പുരാൻ മാർച്ച് 27നാണ് തിയേറ്ററുകളിലെത്തുന്നത്. ഇന്ന് ചിത്രത്തിന്റെ അഡ്വാൻസ് ബുക്കിം​ഗ് തുടങ്ങിയിരുന്നു. ബുക്കിം​ഗ് തുടങ്ങി മണിക്കൂറുകൾക്കകം ഇന്ത്യൻ സിനിമയിൽ ഇതുവരെ മറ്റൊരു ചിത്രവും നേടാത്ത പ്രീസെയിൽ ആണ് എമ്പുരാൻ നേടിയത്. 

‌രജപുത്ര വിഷ്വൽ മീഡിയയുടെ ബാനറിൽ എം രഞ്ജിത്ത് നിർമിച്ച് തരുൺ മൂർത്തി സംവിധാനം ചെയ്യുന്ന ചിത്രമാണ് തുടരും. മോഹൻലാലും ശോഭനയും വർഷങ്ങൾക്ക് ശേഷം വീണ്ടും ഒന്നിക്കുന്നുവെന്ന പ്രത്യേകതയും ഈ ചിത്രത്തിനുണ്ട്. ആരാധകർ കാണാൻ കാത്തിരുന്ന കോമ്പോയാണ് ഈ ചിത്രത്തിലൂടെ വീണ്ടും എത്തുന്നത്. പല ഷെഡ്യൂളുകളിലായി നൂറ് ദിവസത്തോളമാണ് ചിത്രീകരണം നടന്നത്. ഒക്ടോബർ മാസത്തിലാണ് ചിത്രത്തിൻ്റെ ക്ലൈമാക്സ് ഉൾപ്പെടെയുള്ള പ്രധാന ഷെഡ്യൂൾ ചിത്രീകരിച്ചത്. നവംബർ ഒന്നിനാണ് ചിത്രീകരണം പൂർത്തിയാക്കിയത്. വ്യത്യസ്ഥമായ പല ലൊക്കേഷനുകളിലായാണ് ചിത്രീകരണം പൂർത്തിയാക്കിയത്.