കുവൈത്ത് സിറ്റി: വാഹനാപകടം പോലുള്ള അടിയന്തര ഘട്ടങ്ങളില്‍ ഫീസ് അടച്ചാലേ ചികിത്സ ആരംഭിക്കൂ എന്ന നിബന്ധന ബാധകമായിരിക്കില്ലെന്ന് ആരോഗ്യമന്ത്രി ഡോ. ജമാല്‍ അല്‍ ഹര്‍ബി പറഞ്ഞു. വിദേശികള്‍ക്ക് പുതുക്കിയ ചികിത്സാഫീസ് ഞായറാഴ്ച പ്രാബല്യത്തിലായിരുന്നു. പുതുക്കിയ ഫീസ് ഘടനയുമായി ബന്ധപ്പെട്ട് ഉയര്‍ന്ന സംശയങ്ങള്‍ ദൂരീകരിക്കവേയാണ് മന്ത്രി ഇക്കാര്യം വ്യക്തമാക്കിയത്.
രോഗിയുടെ ജീവന് പ്രാധാന്യം നല്‍കി മെഡിക്കല്‍ റിപ്പോര്‍ട്ടും വകുപ്പ് മേധാവികളുടെ നിര്‍ദേശവും പരിഗണിച്ച്‌ ആദ്യം ചികിത്സ ആരംഭിക്കണം. ഇത്തരം സാഹചര്യങ്ങളില്‍ അനുയോജ്യമായ നിലപാട് എടുക്കാനുള്ള അവകാശം ആശുപത്രി ഡയറക്ടര്‍മാര്‍ക്കും വകുപ്പ് മേധാവികള്‍ക്കുമാണ്.
ആഗോളതലത്തില്‍ മെഡിക്കല്‍ മേഖലയില്‍ വര്‍ദ്ധിച്ച ചെലവുകള്‍ മൂലം നഷ്ടപ്പെട്ട ധനം തിരിച്ചുപിടിക്കാനുള്ള പദ്ധതിയുടെ ഭാഗമായാണ് സര്‍ക്കാര്‍ ആശുപത്രികളില്‍ പരിഷ്കരിച്ച ഫീസ് ഘടന നടപ്പാക്കിയതെന്ന് മന്ത്രി പറഞ്ഞു. ചികിത്സാ സേവനങ്ങള്‍ക്ക് പകരമായി വിദേശികളില്‍നിന്ന് ഈടാക്കിയിരുന്ന ഫീസ് ഘടനക്ക് 24 വര്‍ഷത്തെ പഴക്കമുണ്ട്.
