മസ്കറ്റ്: ഖരീഫ് സീസണ്‍ മുന്‍നിര്‍ത്തി സലാലയിലേക്കുള്ള പ്രതിവാര സര്‍വിസുകള്‍ വര്‍ധിപ്പിക്കുമെന്ന് ഒമാന്‍ എയര്‍. നിലവിലുള്ള 56 പ്രതിവാര സര്‍വിസുകള്‍ 91 ആയാണ് വര്‍ധിപ്പിക്കുക. ജൂലൈ ഒന്നു മുതല്‍ സെപ്റ്റംബര്‍ 15 വരെയാണ് അധിക സര്‍വിസുകള്‍ ഉണ്ടാവുക.
ചെറിയ പെരുന്നാള്‍ അവധിക്കാലമായതിനാല്‍ ചില ദിവസങ്ങളില്‍ ടിക്കറ്റ് നിരക്കില്‍ കൂടുതല്‍ വര്‍ധനവുണ്ട്. ആവശ്യത്തിലുണ്ടായ വര്‍ധനവിനെ മുന്‍നിര്‍ത്തിയാണ് നിരക്കുകളിലെയും വര്‍ധന. ജൂണ്‍ 12ന് മസ്കറ്റില്‍നിന്നും ജൂണ്‍ 19ന് സലാലയില്‍നിന്നും തിരിച്ചുമുള്ള ടിക്കറ്റുകള്‍ 61.9 റിയാലിന് ലഭ്യമാണ്.
സലാലയിലേക്കുള്ള യാത്ര ജൂണ്‍ 13 ന് രാവിലെ ഒമ്പതു മണി വരെയുള്ള സര്‍വിസുകളിലേക്ക് ആക്കിയാലും ഈ നിരക്ക് ലഭ്യമാണ്. 13ന് വൈകീട്ട് ഏഴിന് ശേഷം മസ്കറ്റില്‍നിന്ന് പുറപ്പെടുകയും 19ന് തിരിച്ചുവരുകയും ചെയ്യുന്ന സര്‍വിസുകളുടെ ടിക്കറ്റ് 66.900 റിയാലിനാണ് വിറ്റുപോയത്.
