Gold Rate Today June 5: ഇന്നും കൂടി സ്വ‍ർണവില; തുടർച്ചയായി വർധിക്കുന്നത് നാലാം ദിവസം

സംസ്ഥാനത്ത് വീണ്ടും സ്വർണവിലയിൽ വർധനവ്. തുടർച്ചയായി നാലാം ദിവസമാണ് സ്വർണവില ഉയരുന്നത്. മാസത്തിൻറെ തുടക്കത്തിൽ ചെറിയ രീതിയിൽ ഉയർന്ന സ്വർണവില പിന്നീട് തുടർച്ചയായി നാലാം ദിവസവും വർധിച്ചിരിക്കുകയാണ്.

ഒരു പവൻ സ്വർണത്തിന് ഇന്ന് 320 രൂപയാണ് വർധിച്ചത്. ഇതോടെ സംസ്ഥാനത്ത് ഇന്ന് ഒരു പവൻ സ്വർണത്തിന് 73,040 രൂപയായി. ഈ മാസത്തെ ഏറ്റവും ഉയർന്ന നിരക്കാണിത്.

കേരളത്തിലെ പ്രധാന നഗരങ്ങളായ കൊച്ചി, തിരുവനന്തപുരം, കോഴിക്കോട് എന്നീ ജില്ലകളിൽ ഇന്ന് ഒരു ഗ്രാം സ്വർണത്തിന് 9130 രൂപയും ഒരു പവൻ സ്വർണത്തിന് 73,040 രൂപയുമാണ്.

അന്താരാഷ്ട്ര വിപണിയിലെ മാറ്റങ്ങൾ ഇന്ത്യയിലെ സ്വർണവിലയെ സ്വാധീനിക്കും. ഡോളറിനെതിരായ രൂപയുടെ മൂല്യവും സ്വർണ വിലയിൽ പ്രതിഫലിക്കുന്നു.

ജൂൺ ഒന്നിന് 71,360 രൂപയായിരുന്നു ഒരു പവൻ സ്വർണത്തിൻറെ വില. ജൂൺ രണ്ടിന് രാവിലെ 71, 600 രൂപയിൽ വ്യാപാരം ആരംഭിച്ച സ്വർണം 72, 480ൽ ആണ് വ്യാപാരം അവസാനിപ്പിച്ചത്.

ജൂൺ മൂന്നിന്  72, 640 ആയിരുന്നു സ്വർണവില. ജൂൺ നാലിന് സ്വർണവില പവന് 72, 720 ആയി. ജൂൺ ഒന്നിനാണ് ഈ മാസത്തെ ഏറ്റവും കുറഞ്ഞ സ്വർണനിരക്ക് രേഖപ്പെടുത്തിയിരിക്കുന്നത്.

ഇറക്കുമതി തീരുവ, പ്രാദേശിക വിപണിയിലെ ആവശ്യകത, രൂപയുടെ മൂല്യത്തിലെ വ്യത്യാസം എന്നിവ സ്വർണവിലയെ സ്വാധീനിക്കുന്ന ഘടകങ്ങളാണ്.