India Pakistan War Fact Check: ഇന്ത്യാ-പാക് യുദ്ധവുമായി ബന്ധപ്പെട്ട് വ്യാജ വാർത്തകൾ; ഫാക്ട് ചെക്കുമായി പിഐബി
India Pakistan War Fact Check: പിഐബി കണ്ടെത്തിയ ചില വ്യാജ വാർത്തകൾ നോക്കാം
- സീ മലയാളം ന്യൂസ് ഡെസ്ക്
- May 09, 2025, 08:19 PM IST
ഇന്ത്യ പാകിസ്താൻ സംഘർഷം തുടരുന്ന സാഹചര്യത്തിൽ വ്യാജ വാർത്തകളും പ്രചരിക്കുന്നുണ്ട്. വ്യാജ വീഡിയോകളും, വ്യാജ വാർത്തകളും വ്യാജ മെസേജുകളും വ്യാപകമായി പ്രചരിക്കുന്നുണ്ട്. പ്രസ് ഇന്‍ഫര്‍മേഷന്‍ ബ്യൂറോയുടെ ഫാക്ട് ചെക്ക് വിഭാഗം ഇത്തരം വാർത്തകളുടെ വസ്തുത പരിശോധിക്കുന്നുണ്ട്. അത്തരത്തിൽ പിഐബി പങ്കുവെച്ച ചില വാർത്തകൾ നോക്കാം.
ജമ്മുവിൽ ആക്രമണം എന്ന പേരിൽ ഒരു വീഡിയോ പ്രചരിക്കുന്നുണ്ട്. എന്നാൽ ഈ വീഡിയോയിൽ കാണുന്നത് ജമ്മുവിൽ പാകിസ്താൻ നടത്തിയ ആക്രമണ ശ്രമങ്ങളുടെ ദ്യശ്യമല്ല. മറിച്ച്, 2025 ഫെബ്രുവരിയിൽ ബംഗ്ലാദേശിലെ ധാക്കയിൽ നടന്ന സ്ഫോടനത്തിന്റേതാണെന്ന് പിഐബി വ്യക്തമാക്കി.
മുസഫറാബാദില്‍ ഇന്ത്യയുടെ സുഖോയ്-എസ്‌യു-30എംകെഐ എയര്‍ഫോഴ്‌സ് വിമാനം പാകിസ്താൻ വെടിവച്ചിട്ടതായി ഒരു ചിത്രം പ്രചരിക്കുന്നുണ്ട്. എന്നാല്‍ ഇത് 2014 ഒക്ടോബര്‍ 14ന് മഹാരാഷ്ട്രയിലെ പൂനെ-അഹമ്മദ് നഗര്‍ ഹൈവേയ്ക്ക് സമീപമുള്ള ഗ്രാമത്തില്‍ സുഖോയ് വിമാനം തകര്‍ന്നുവീണതിന്‍റെ ചിത്രമാണ്.
കശ്മീരിൽ കുറഞ്ഞത് മൂന്ന് ഇന്ത്യൻ ജെറ്റുകളെങ്കിലും തകർന്നുവീണതായി ചൈന ഡെയ്‌ലിയുടെ വാർത്ത പ്രചരിക്കുന്നുണ്ട്. ചിത്രം സഹിതമാണ് ഇവർ വാർത്ത നൽകിയിരിക്കുന്നത്. എന്നാൽ, ഈ വാർത്തിൽ ഇവർ പങ്കുവെച്ചിരിക്കുന്ന ചിത്രം, 2019ൽ നടന്ന ഒരു സംഭവത്തിന്റെ ചിത്രമാണെന്ന് പിഐബി കുറിച്ചു.
ഇന്ത്യയുടെ ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ പേരിൽ ഒരു ഫേസ്ബുക്ക് കുറിപ്പ് വ്യാപകമായി പ്രചരിക്കുന്നുണ്ട്. അജിത് ഡോവലിന്റെ പേരും ചിത്രവും ഉപയോഗിച്ച് സൃഷ്ട്ടിച്ച ഒരു വ്യാജ അക്കൗണ്ടിലൂടെയാണ് കുറിപ്പ് പങ്കുവെച്ചിട്ടുള്ളത്. 'ഇപ്പോൾ ഭീരുവായ പാകിസ്താൻ രഹസ്യമായി സൈബർ ആക്രമണത്തിന് തയ്യാറെടുക്കുകയാണ്. സന്ദേശങ്ങളിൽ ക്ലിക്ക് ചെയ്യുന്നതോ അജ്ഞാത നമ്പറിൽ നിന്ന് ഫോൺ എടുക്കുന്നതോ ഒഴിവാക്കുക. ഈ വിവരങ്ങൾ എല്ലാവരുമായും പങ്കിടുക. സഹകരിക്കുക, എല്ലാവരെയും അറിയിക്കുക. ഉണർന്നിരിക്കുക', എന്നിങ്ങനെയാണ് കുറിപ്പിൽ പറഞ്ഞിരിക്കുന്നത്. പിഐബി നടത്തിയ വസ്തുതാ പരിശോധനയിൽ ഈ പോസ്റ്റ് പൂർണ്ണമായും വ്യാജമാണെന്നും അജിത് ഡോവലിന് ഔദ്യോഗിക ഫേസ്ബുക്ക് അക്കൗണ്ട് ഇല്ലെന്നും കണ്ടെത്തി.
ഇന്ത്യ പാക് സംഘർഷം ശക്തമാകുന്ന സാഹചര്യത്തിൽ എടിഎമ്മുകൾ അടച്ചിടുന്നു എന്നൊരു മെസേജ് വ്യാപകമായി പ്രചരിക്കുന്നുണ്ട്. രാജ്യത്തെ എടിഎമ്മുകള്‍ രണ്ടുമൂന്ന് ദിവസത്തേക്ക് അടച്ചിടാന്‍ പോകുന്നു എന്നാണ് പ്രചാരണം. പാകിസ്താനുമായുള്ള സംഘര്‍ഷത്തിന്‍റെ പശ്ചാത്തലത്തില്‍ റാന്‍സംവെയര്‍ സൈബര്‍-അറ്റാക്ക് നടക്കാന്‍ സാധ്യതയുള്ള പശ്ചാത്തലത്തിലാണ് എടിഎമ്മുകള്‍ അടച്ചിടുന്നതെന്നും, ഇന്ന് ആരും ഓണ്‍ലൈന്‍ ട്രാന്‍സാക്ഷനുകള്‍ നടത്താന്‍ പാടില്ലെന്നും വാട്സ്ആപ്പ് ഫോര്‍വേഡില്‍ പറയുന്നു. ഇത് വ്യാജ സന്ദേശമാണെന്നും എടിഎമ്മുകൾ സാധാരണഗതിയിൽ പ്രവർത്തിക്കുമെന്നും ഈ സമയത്ത് സ്ഥിരീകരിക്കാത്ത വിവരങ്ങൾ പ്രചരിപ്പിക്കരുതെന്നും പിഐബി അറിയിച്ചു.
