Sunny Thomas Passes Away: ഷൂട്ടിങ് പരിശീലകന്‍ സണ്ണി തോമസ് അന്തരിച്ചു; അന്ത്യം 85ാം വയസിൽ

ഒളിംപിക്സ് ഷൂട്ടിങ്ങില്‍ ഇന്ത്യ സ്വര്‍ണ മെഡലും വെള്ളി മെഡലും നേടിയത് സണ്ണിതോമസ് പരിശീലകനായിരുന്ന സമയത്താണ്.

കോട്ടയം: ഷൂട്ടിങ് പരിശീലകന്‍ ദ്രോണാചാര്യ സണ്ണി തോമസ് അന്തരിച്ചു. 85 വയസായിരുന്നു. 19 വർഷക്കാലം ഇന്ത്യന്‍ ഷൂട്ടിങ് ടീമിന്റെ മുഖ്യ പരിശീലനകനായിരുന്നു സണ്ണി തോമസ്. സണ്ണിതോമസ് പരിശീലകനായിരുന്ന സമയത്താണ് ഒളിംപിക്സ് ഷൂട്ടിങ്ങില്‍ ഇന്ത്യ സ്വര്‍ണ, വെള്ളി മെഡലുകള്‍ നേടിയത്. ഷൂട്ടിങ്ങില്‍ അഞ്ചുതവണ സംസ്ഥാന ചാംപ്യനായിരുന്ന അദ്ദേഹം 1976ല്‍ ദേശീയ ചാംപ്യനുമായിരുന്നു.

Add Zee News as a Preferred Source

കോട്ടയം തിടനാട് മേക്കാട്ട് കെ.കെ.തോമസിന്റെയും മറിയക്കുട്ടിയുടെയും മകനായി 1941 സെപ്റ്റംബർ 26നാണ് സണ്ണി തോമസ് ജനിച്ചത്. 2004ൽ ആതൻസ് ഒളിംപിക്സിൽ രാജ്യവർധൻ സിങ് റാത്തോഡ് വെള്ളി നേടിയിരുന്നു. ഇന്ത്യയുടെ ഒളിംപിക് ചരിത്രത്തിലെ ആദ്യ വ്യക്തിഗത വെള്ളി മെഡലായിരുന്നു അത്. 

2008ൽ ബെയ്ജിങ് ഒളിംപിക്സിൽ അഭിനവ് ബിന്ദ്ര സ്വർണ മെഡൽ സ്വന്തമാക്കിയപ്പോൾ ഇന്ത്യയുടെ ആദ്യ വ്യക്തിഗത സ്വർണമായി മാറി. 2012ലെ ലണ്ടൻ ഒളിംപിക്സിൽ വിജയകുമാർ വെള്ളിയും ഗഗൻ നാരങ് വെങ്കലവും നേടി. അപ്പോഴും പരിശീലകൻ സണ്ണി തോമസ് ആയിരുന്നു. ഏഷ്യൻ ഗെയിംസുകളിൽ 29 മെഡലുകളും കോമൺ വെൽത്ത് ഗെയിംസിൽ 95 മെഡലുകളുമാണ് സണ്ണി തോമസിന്റെ ശിഷ്യർ സ്വന്തമാക്കിയത്. 

1965ൽ കോട്ടയം റൈഫിൾ ക്ലബ്ബിൽ ചേർന്നതോടെയാണ് സണ്ണി തോമസിന്റെ ജീവിതത്തിൽ വഴിത്തിരിവായത്. 5 തവണയാണ് അദ്ദേഹം സംസ്ഥാന ചാംപ്യനായത്. 1976ൽ ദേശീയ ചാംപ്യനുമായി. 1993 മുതലാണ് പരിശീലക സ്ഥാനത്തേക്ക് എത്തിയത്. 

കോട്ടയം സിഎംഎസ് കോളജിലായിരുന്നു വിദ്യാഭ്യാസം. ഉഴവൂർ സെന്റ് സ്റ്റീഫൻസിൽ ഇംഗ്ലിഷ് അധ്യാപകനായിരുന്നു, അതിന് മുൻപ് തേവര സേക്രഡ് ഹാർട്ട് കോളജിലും പഠിപ്പിച്ചു. ഉഴവൂർ കോളജിലെ ബോട്ടണി വിഭാഗം മേധാവിയായിരുന്ന പ്രഫ.കെ.ജെ.ജോസമ്മയാണ് ഭാര്യ. മക്കൾ മനോജ് സണ്ണി, സനിൽ സണ്ണി. ഇരുവരും മുൻ കേരള ചാംപ്യന്മാരാണ്. മകൾ സോണിയ സണ്ണി.