ലോകകപ്പില് ഇന്ത്യക്ക് ആദ്യ തോല്വി. ഇംഗ്ലണ്ടിനെതിരായുള്ള കളിയില് 31 റണ്സിനായിരുന്നു ഇന്ത്യയുടെ തോല്വി. 338 റണ്സ് പിന്തുടര്ന്നിറങ്ങിയ ഇന്ത്യയ്ക്ക് നിശ്ചിത 50 ഓവറില് 5 വിക്കറ്റ് നഷ്ടത്തില് 306 റണ്സെടുക്കാനേ സാധിച്ചുള്ളൂ.
ഇംഗ്ലണ്ട് പേസര്മാരുടെ ഉജ്ജ്വല പ്രകടനമാണ് അവര്ക്ക് ജയമൊരുക്കിയത്. 102 റണ്സെടുത്ത രോഹിത് ശര്മയാണ് ഇന്ത്യയുടെ ടോപ്പ് സ്കോറര്. 66 റണ്സെടുത്ത കൊഹ്ലി 45 റണ്സെടുത്ത പാണ്ഡ്യ എന്നിവരും ഇന്ത്യക്കു വേണ്ടി തിളങ്ങി. ലിയാം പ്ലങ്കറ്റ് ഇംഗ്ലണ്ടിനു വേണ്ടി 3 വിക്കറ്റ് വീഴ്ത്തി.
ആദ്യം ബാറ്റ് ചെയ്ത ഇംഗ്ലണ്ട് നിശ്ചിത 50 ഓവറില് ഏഴ് വിക്കറ്റ് നഷ്ടത്തില് 337 റണ്സെടുത്തു. ഓപ്പണര്മാര് നല്കിയ മികച്ച തുടക്കം മുതലെടുത്താണ് ഇംഗ്ലണ്ട് മുന്നൂറിന് മേല് സ്കോര് ചെയ്തത്. ഇന്ത്യക്കായി മുഹമ്മദ് ഷമി അഞ്ച് വിക്കറ്റ് നേടി മികച്ച പ്രകടനം കാഴ്ചവെച്ചു.
ഓപ്പണര്മാരായ ജെയ്സണ് റോയും (66) ജോണി ബെയര്സ്റ്റോയും (111) ചേര്ന്ന് തകര്പ്പന് തുടക്കമാണ് ഇംഗ്ലണ്ടിന് നല്കിയത്. ഇന്ത്യന് ബൗളര്മാരെ കണക്കിന് പ്രഹരിച്ച് ഇരുവരും സ്കോര് അതിവേഗം ഉയര്ത്തി.
ഇരുവരുടെയും വിക്കറ്റ് വീണ ശേഷം റണ്ണൊഴുക്ക് ചെറുതായി നിലച്ചെങ്കിലും ബെന് സ്റ്റോക്ക്സും (79) ജോ റൂട്ടും (44)ചേര്ന്ന് വീണ്ടും കളി വരുതിയിലാക്കി.
ആറു കളികളില് അപരാജിതരായി മുന്നേറി സെമിയുടെ പടിവാതില്ക്കല് എത്തിയ ഇന്ത്യയുടെ ആദ്യ തോല്വി മാത്രമാണിത്. ഇംഗ്ലണ്ടിന്റെ വിജയത്തോടെ പാക്കിസ്ഥാന്റെ സെമി സ്വപ്നം അവസാനിച്ചുവെന്നു തന്നെ പറയാം.
27 വര്ഷത്തിനിടയില് ആദ്യമായാണ് ഇന്ത്യ ഇംഗ്ലണ്ടിനോട് തോല്ക്കുന്നത്.