IPL 2025 RR vs MI: മുംബൈ ഇന്ത്യൻസ് നമ്പർ വൺ; രാജസ്ഥാൻ പ്ലേഓഫ് കാണാതെ പുറത്ത്

14 പോയിന്റോടെ മുംബൈ ഇന്ത്യൻസ് പട്ടികയിൽ ഒന്നാമതെത്തിയിരിക്കുകയാണ്. രാജസ്ഥാൻ റോയൽസ് പ്ലേഓഫ് കാണാതെ പുറത്തായി.

ജയ്പൂർ: ഇന്ത്യൻ പ്രീമിയർ ലീ​ഗിൽ‌ രാജസ്ഥാൻ റോയൽസിനെതിരെ മുംബൈ ഇന്ത്യൻസിന് 100 റൺസിൻ്റെ കൂറ്റൻ വിജയം. തുടർച്ചയായ ആറാം ജയം സ്വന്തമാക്കിയ മുംബൈ ഇന്ത്യൻസ് 14 പോയിൻ്റോടെ പട്ടികയിൽ ഒന്നാമതെത്തി. ഈ സീസണിലെ എട്ടാം തോൽവിയോടെ രാജസ്ഥാൻ റോയൽസ് പ്ലേഓഫ് കാണാതെ പുറത്തായി. മുംബൈ ഉയർത്തിയ 218 റൺസിൻ്റെ വിജയലക്ഷ്യം പിന്തുടർന്ന രാജസ്ഥാൻ റോയൽസിൻ്റെ ഇന്നിങ്സ് 117 റൺസിന് അവസാനിച്ചു. ബാറ്റും ബോളും കൊണ്ട് രാജസ്ഥാനെ വട്ടംകറക്കിയ മുംബൈ ഇന്ത്യൻസിനെയാണ് ഇന്ന് ജയ്പൂരിൽ കണ്ടത്.

മുംബൈ ഇന്ത്യൻസ് ഉയർത്തിയ വലിയ വിജയലക്ഷ്യം പിന്തുടർന്ന രാജസ്ഥാൻ ബാറ്റിങ് നിര ചീട്ടുകൊട്ടാരം തകരുന്നത് പോലെയാണ് തകർന്നത്. രാജസ്ഥാൻ്റെ കഴിഞ്ഞ മത്സരത്തിൽ അതിവേ​ഗ സെഞ്ച്വറി നേടിയ യുവതാരം വൈഭവ് സൂര്യവംശിയെ ആദ്യ ഓവറിൽ തന്നെ പൂജ്യത്തിന് മുംബൈ ഇന്ത്യൻസ് പുറത്താക്കി. ദീപക് ചഹാറിനായിരുന്നു വിക്കറ്റ്. രണ്ടാമത്തെ ഓവറിൽ 13 റൺസെടുത്ത യശ്വസി ജെയ്സ്വാൾ കൂടി പുറത്തായതോടെ രാജസ്ഥാൻ്റെ തുടക്കം പതറി. പിന്നീട് നിശ്ചിത ഇടവേളകളിൽ വിക്കറ്റ് വീഴ്ത്തി മുംബൈ ഇന്ത്യൻസ് രാജസ്ഥാനെ വരിഞ്ഞുകെട്ടുകയായിരുന്നു. 

 on the trot & now they’re on 

A massive-run win for #MI to sit right where they want to 

Scorecard  https://t.co/t4j49gXHDu#TATAIPL | #RRvMI | @mipaltan pic.twitter.com/20KEle7S6n

— IndianPremierLeague (@IPL) May 1, 2025

പവർപ്ല അവസാനിക്കുന്നതിന് മുമ്പ് തന്നെ രാജസ്ഥാന് അഞ്ച് വിക്കറ്റുകൾ നഷ്ടമായി.  നിതീഷ് റാണ (9), റിയാൻ പരാഗ് (16), ഷിമ്രോൺ ഹെറ്റ്മയർ (0) എന്നിവരാണ് പവർ പ്ലേയിൽ പുറത്തായ മറ്റ് താരങ്ങൾ. 30 റൺസെടുത്ത ജോഫ്ര ആർച്ചറാണ് രാജസ്ഥാൻ്റെ ടോപ് സ്കോറർ. ശുഭം ദൂബെ 15 റൺസെടുത്തു. മുംബൈക്ക് വേണ്ടി ട്രെൻ്റ് ബോൾട്ടും കരൺ ശർമയും മൂന്ന് വിക്കറ്റുകൾ വീതവും ജസ്പ്രീത് ബുമ്ര രണ്ട് വിക്കറ്റും വീഴ്ത്തി. ദീപക് ചഹാർ, ഹാർദ്ദിക് പാണ്ഡ്യ എന്നിവർ ഓരോ വിക്കറ്റും നേടി. 

ടോസ് നഷ്ടപ്പെട്ട് ആദ്യം ബാറ്റ് ചെയ്ത മുംബൈ 20 ഓവറിൽ രണ്ട് വിക്കറ്റ് നഷ്ടത്തിൽ 217 റൺസ് നേടി. ഓപ്പണർമാരായ രോഹിത് ശർമ്മയുടെയും റയാൻ റിക്കൽട്ടണിന്റെയും അർധ സെഞ്ച്വറികളുടെ കരുത്തിലാണ് മുംബൈ കൂറ്റൻ വിജയലക്ഷ്യം ഉയർത്തിയത്. റിക്കൽട്ടൺ 38 പന്തിൽ 61 റൺസും രോഹിത് 36 പന്തിൽ 53 റൺസും നേടി. അവസാന ഓവറുകളിൽ നായകൻ ഹാർദ്ദിക് പാണ്ഡ്യയും സൂര്യകുമാർ യാ​ദവും ചേർന്ന് കൊളുത്തിയ വെടിക്കെട്ടിൽ ടീം സ്കോർ 200 കടന്നു. ഇരുവരും 23 പന്തിൽ നിന്ന് 48 റൺസെടുത്ത് പുറത്താവാതെ നിന്നു. രാജസ്ഥാന് വേണ്ടി തീക്ഷണയും റിയാൻ പരാ​ഗും ഓരോ വിക്കറ്റുകൾ വീഴ്ത്തി.