ഹോങ്കോംഗ്: ടിയാന്‍ജിന്‍ ഓപ്പണ്‍ ടെന്നിസ് കിരീടം മുന്‍ ലോക ഒന്നാം നമ്പര്‍ താരം മരിയ ഷറപ്പോവയ്ക്ക്. ഷറപ്പോവ ഫൈനലില്‍ ബലാറസിന്‍റെ കൗമാര താരം ഐറീന സബലെന്‍കയെ തോല്‍പിച്ചു. രണ്ട് മണിക്കൂറും അഞ്ച് മിനിറ്റും നീണ്ട മത്സരത്തില്‍ 7-5, 7-6 എന്ന സ്കോറിനായിരുന്നു ഷറപ്പോവയുടെ ജയം. രണ്ട് സെറ്റിലും 4-1ന് പിന്നിട്ടുനിന്ന ശേഷം ശക്തമായി തിരിച്ചുവരികയായിരുന്നു ഷറപ്പോവ. പതിനഞ്ച് മാസത്തെ വിലക്ക് മാറിയതിന് ശേഷം ഷറപ്പോവ നേടുന്ന ആദ്യ കിരീടമാണിത്. കരിയറിലെ മുപ്പത്തിയാറാമത്തെ കിരീടം നേടിയ റഷ്യന്‍ സുന്ദരി 2015 മെയില്‍ ഇറ്റാലിയന്‍ ഓപ്പണു ശേഷം സ്വന്തമാക്കുന്ന ആദ്യ കിരീടം കൂടിയാണിത്.
