5 ജി സേവനം; കൈകോർക്കാൻ എയർടെലും നോക്കിയയും ഒരുങ്ങുന്നു

ന്യുഡൽഹി: 5 ജി സേവനം പ്രയോജനപ്പെടുത്തുന്നതിനായി എയർടെലും നോക്കിയയും കൈകോർക്കാൻ ഒരുങ്ങുന്നു.   ഇതിനായി ഭാരതി എയര്‍ടെല്‍ നോക്കിയയുമായി 7,636 കോടി രൂപയുടെ കരാറിലാണ് ഒപ്പിട്ടിരിക്കുന്നത് എന്നാണ് റിപ്പോർട്ട്. 

5 ജി സേവനം ആദ്യം നടപ്പാക്കുന്നത് രാജ്യത്തെ ഒമ്പത് സര്‍ക്കിളുകളിലായാണ്.  നോക്കിയയാണ് എയര്‍ടെല്‍ നെറ്റ് വര്‍ക്കിന് നിലവില്‍ തന്നെ 4ജിക്കുള്ള സാങ്കേതിക സേവനം നല്‍കിവരുന്നത്. 

2022ഓടെ ഈ സര്‍ക്കിളുകളില്‍ മൂന്നു ലക്ഷം റേഡിയോ യൂണിറ്റുകള്‍ സ്ഥാപിച്ച് 5ജി സേവനം നല്‍കാനാണ് കരാര്‍ കൊണ്ട് ഉദ്ദേശിക്കുന്നത്. ലോകത്തിലെ തന്നെ ഏറ്റവും വലിയ രണ്ടാമത്തെ ടെലികോം വിപണിയാണ് ഇന്ത്യ. 

കണക്കുകൂട്ടലുകളുടെ അടിസ്ഥാനത്തിൽ 2025ഓടെ 92 കോടി മൊബൈല്‍ ഉപഭോക്താക്കള്‍ രാജ്യത്തുണ്ടാകുമെന്നാണ് സൂചന.  ഇതിൽ 8.8 കോടിപേരും 5ജി യാകും ഉപയോഗിക്കുകയെന്നും വിലയിരുത്തപ്പെടുന്നുണ്ട്.