മുടി കൊഴിച്ചിൽ ആണോ പ്രശ്നം, എന്നാൽ നെല്ലിക്ക സൂപ്പറാ..
പലരേയും അലട്ടുന്ന വലിയൊരു പ്രശ്നമാണ് ഈ മുടികൊഴിച്ചിൽ. മുടികൊഴിച്ചിൽ പല കാരണങ്ങൾ കൊണ്ട് ഉണ്ടാകാം.
മുടിയുടെ ആരോഗ്യത്തിനും മുടിവളർച്ചയ്ക്കും നെല്ലിക്ക കിടിലനാണെന്ന് എത്രപേർക്കറിയാം.
നെല്ലിക്ക മുടിയുടെ വളർച്ചയെ ഉത്തേജിപ്പിക്കുകയും മുടിയുടെ ഗുണനിലവാരം മെച്ചപ്പെടുത്തുകയും ചെയ്യും.
നെല്ലിക്കയിൽ കാൽസ്യം അടങ്ങിയിട്ടുണ്ട്. ഇത് മുടിയെ സ്ട്രോങ്ങ് ആക്കാനും അതിലൂടെ മുടി കൊഴിച്ചിൽ കുറയ്ക്കാനും സഹായിക്കും.
ഭക്ഷണത്തിൽ നെല്ലിക്ക ചേർക്കുന്നത് ഓക്സിഡേറ്റീവ് സ്ട്രെസ് കുറയ്ക്കാൻ സഹായിക്കും.
നെല്ലിക്ക രക്തം ശുദ്ധീകരിക്കുകയും അകാല നര തടയുകയും മുടിയുടെ സ്വാഭാവിക നിറം വർദ്ധിപ്പിക്കുകയും ചെയ്യും. ഇതിന് ആന്റിഫംഗൽ, ആൻറിവൈറൽ ഗുണങ്ങളുണ്ട്.
ഇത് താരൻ, മറ്റ് ഫംഗസ് അണുബാധകൾ എന്നിവ തടയുകയും തലയോട്ടിയുടെ ആരോഗ്യം മെച്ചപ്പെടുത്തുകയും ചെയ്യും. മുടികൊഴിച്ചിൽ കുറയ്ക്കാൻ നെല്ലിക്ക എങ്ങനെ ഉപയോഗിക്കാമെന്നറിയാം...
കുറച്ച് വെളിച്ചെണ്ണ എടുത്ത് തിളപ്പിച്ച ശേഷം അതിലേക്ക് ഉണക്കിയ നെല്ലിക്കയുടെ കഷണങ്ങൾ ചേർക്കുക. ശേഷം ഈ എണ്ണ ആഴ്ചയിൽ രണ്ടോ മൂന്നോ തവണ തലയോട്ടിയിൽ പുരട്ടി മസാജ് ചെയ്യുന്നത് മുടികൊഴിച്ചിൽ അകറ്റുന്നതിന് നല്ലതാ.
നെല്ലിക്ക പൊടിയും തൈരും യോജിപ്പിച്ച് തലയിൽ പുരട്ടുക. 15 മിനുട്ടിന് ശേഷം കഴുകി കളയുക. ആഴ്ചയിൽ ഒന്നോ രണ്ടോ തവണ ഈ പാക്ക് ഇടാം.
തൈരിൽ സ്വാഭാവികമായും മുടിയെ പോഷിപ്പിക്കുന്ന ധാരാളം പോഷകങ്ങൾ അടങ്ങിയിട്ടുണ്ട്. ഇത് തലയോട്ടിയെ ശുദ്ധീകരിക്കുകയും ശക്തിപ്പെടുത്തുകയും ചെയ്യും.
രണ്ട് ടീസ്പൂൺ നെല്ലിക്ക ജ്യൂസും ബദാം ഓയിലും മിക്സ് ചെയ്ത് തലയോട്ടിയിൽ തേച്ച് പിടിപ്പിക്കുക. 15 മിനിട്ടിന് ശേഷം കഴുകി കളയുക.
ബദാമിന് ജലാംശം നൽകുന്നതും പോഷിപ്പിക്കുന്നതുമായ ഗുണങ്ങളുണ്ട്. അത് മുടിയെ ആരോഗ്യകരവും തിളക്കവുമുള്ളതാക്കും.