Volcano Eruption: ഇന്തോനേഷ്യയിൽ വൻ അ​ഗ്നിപർവതസ്ഫോടനം; ബാലിയിൽ നിന്നുള്ള വിമാനസർവീസുകൾ റദ്ദാക്കി

Indonesia Volcano Eruption: അ​ഗ്നിപർവ്വത സ്ഫോടനത്തെ തുടർന്ന് 10,000 മീറ്ററിലധികം ഉയരത്തിൽ ചാരം വ്യാപിച്ചതിനെ തുടർന്നാണ് വിമാന സർവീസുകൾ റദ്ദാക്കിയത്.

ജക്കാർത്ത: ഇന്തോനേഷ്യയിലെ ബാലിയിൽ വൻ അ​ഗ്നിപർവ്വത സ്ഫോടനം. നിരവധി വിമാന സർവീസുകൾ റദ്ദാക്കി. മൗണ്ട് ലെവോതോബി ലാകീ ലാകീ എന്ന അ​ഗ്നിപർവ്വതം ആണ് പൊട്ടിത്തെറിച്ചത്. ബാലി വിമാനത്താവളത്തിന് സമീപമാണ് ഈ അ​ഗ്നിപർവ്വതം സ്ഥിതി ചെയ്യുന്നത്.

അ​ഗ്നിപർവ്വത സ്ഫോടനത്തെ തുടർന്ന് 10,000 മീറ്ററിലധികം ഉയരത്തിൽ ചാരം വ്യാപിച്ചതിനെ തുടർന്നാണ് വിമാന സർവീസുകൾ റദ്ദാക്കിയത്. ബാലിയിലെ എൻ​ഗുര റായ് വിമാനത്താവളത്തിലേക്കുള്ള സർവീസുകൾ നിർത്തിവച്ചു.

സുരക്ഷാ നടപടികളുടെ ഭാ​ഗമായാണ് വിവിധ എയർലൈനുകൾ സർവീസ് നിർത്തിവച്ചത്. ഡൽഹിയിൽ നിന്ന് ബാലിയിലേക്ക് പുറപ്പെട്ട എയർഇന്ത്യ വിമാനം തിരിച്ചിറക്കി. യാത്രാമധ്യേ തിരിച്ച് വരാൻ നിർദേശം നൽകുകയായിരുന്നു. തുടർന്ന് ഡൽഹി വിമാനത്താവളത്തിൽ സുരക്ഷിതമായി ലാൻഡ് ചെയ്തു.

അ​ഗ്നിപർവ്വത സ്ഫോടനത്തിൽ ആളപായം റിപ്പോർട്ട് ചെയ്തിട്ടില്ല. 6.84 മൈൽ ഉയരത്തിൽ ചൊവ്വാഴ്ചയാണ് ആദ്യ സ്ഫോടനം ഉണ്ടായത്. ബുധനാഴ്ച രാവിലെ വീണ്ടും അ​ഗ്നപർവ്വത സ്ഫോടനം ഉണ്ടായി. ഇന്ത്യ, ഓസ്ട്രേലിയ, സിങ്കപ്പൂ‍ർ എന്നിവിടങ്ങളിൽ നിന്നുള്ള വിമാന സർവീസുകളാണ് അ​ഗ്നിപർവ്വത സ്ഫോടനത്തെ തുടർന്ന് റദ്ദാക്കിയത്.