Modi Meets Yunus: ബാങ്കോക്കില്‍ കൂടിക്കാഴ്ച നടത്തി മോദിയും യൂനുസും

ബാങ്കോക്കില്‍ നടക്കുന്ന ബിംസ്റ്റെക് ഉച്ചകോടിക്കിടെ ആയിരുന്നു കൂടിക്കാഴ്ച്ച.

പ്രധാനമന്ത്രി നരേന്ദ്ര മോദിയും പീപ്പിള്‍സ് റിപ്പബ്ലിക് ഓഫ് ബംഗ്ലാദേശിന്റെ മുഖ്യ ഉപദേഷ്ടാവ് മുഹമ്മദ് യൂനുസും കൂടിക്കാഴ്ച നടത്തി. ബാങ്കോക്കില്‍  നടക്കുന്ന ബംഗാള്‍ ഇനിഷ്യേറ്റീവ് ഫോര്‍ മള്‍ട്ടി-സെക്ടറല്‍ ടെക്നിക്കല്‍ ആന്‍ഡ് ഇക്കണോമിക് കോ-ഓപ്പറേഷന്‍ (ബിംസ്റ്റെക്) ഉച്ചകോടിക്കിടെ ആയിരുന്നു കൂടിക്കാഴ്ച്ച. 

Add Zee News as a Preferred Source

നോബല്‍ സമ്മാന ജേതാവായ യൂനുസ് ബംഗ്ലാദേശിന്റെ ചുമതല ഏറ്റെടുത്തതിനുശേഷം ഇരു നേതാക്കളും തമ്മിലുള്ള ആദ്യ കൂടിക്കാഴ്ചയാണിത്. ബീജിംഗുമായുള്ള ധാക്കയുടെ വര്‍ദ്ധിച്ചുവരുന്ന അടുപ്പത്തിനിടയിലാണ് ഈ കൂടിക്കാഴ്ച്ച.

ബംഗ്ലാദേശിലെ ഹിന്ദുക്കള്‍ ഉള്‍പ്പെടെയുള്ള ന്യൂനപക്ഷങ്ങളുടെ സുരക്ഷയെ കുറിച്ചുളള ഇന്ത്യയുടെ ആശങ്കകള്‍ പ്രധാനമന്ത്രി മോദി പറഞ്ഞതായും, ബംഗ്ലാദേശ് സര്‍ക്കാര്‍ അവരുടെ സുരക്ഷ ഉറപ്പാക്കുമെന്ന് പ്രതീക്ഷിക്കുന്നതായും വിദേശകാര്യ സെക്രട്ടറി വിക്രം മിസ്ര പറഞ്ഞു. എല്ലാ അതിക്രമങ്ങളിലും സമഗ്രമായ അന്വേഷണം നടത്തണമെന്നും പ്രധാനമന്ത്രി ആവശ്യപ്പെട്ടു. 

അതിര്‍ത്തി സുരക്ഷയും ചര്‍ച്ചയിലെ ഒരു പ്രധാന വിഷയമായിരുന്നു, നിയമവിരുദ്ധമായ കടന്നുകയറലുകള്‍ തടയുന്നതിന് നിയമം കര്‍ശനമായി നടപ്പിലാക്കേണ്ടതിന്റെ പ്രാധാന്യം പ്രധാനമന്ത്രി ഊന്നിപ്പറഞ്ഞു.

ബംഗ്ലദേശിലെ ഹിന്ദു ന്യൂനപക്ഷങ്ങളെ ലക്ഷ്യം വച്ചുള്ള അക്രമ സംഭവങ്ങളും ഷെയ്ഖ് ഹസീനയ്ക്ക് അഭയം നല്‍കിയ ഇന്ത്യയുടെ നിലപാടും കാരണം ഇരു രാജ്യങ്ങള്‍ക്കിടയിലെ ബന്ധത്തില്‍ വിള്ളല്‍ സംഭവിച്ചിരുന്നു.

ഇന്ത്യയുടെ വടക്ക് കിഴക്കന്‍ സംസഥാനങ്ങളും കരയാല്‍ ചുറ്റപ്പെട്ട പ്രദേശമാണെന്നും സമുദ്രത്തിലേക്ക് എത്താന്‍ ഒരു മാര്‍ഗ്ഗവും ഇല്ലെന്നും യൂനുസ്  അടുത്തിടെ  പറഞ്ഞിരുന്നു. യൂനുസിന്റെ ഈ പ്രസ്താവന ഇന്ത്യയില്‍ ഏറെ വിവാദം സൃഷ്ടിച്ചിരുന്നു. ഇതിനിടയിലാണ് മോദി യൂനുസ് കൂടിക്കാഴ്ച എന്നതും ശ്രദ്ധേയമാണ്.