കല്‍ക്കത്ത: ചൈനയ്ക്കൊപ്പം നില്‍ക്കാനാണു ടിബറ്റിലെ ജനത ആഗ്രഹിക്കുന്നതെന്നു ടിബറ്റന്‍ ആത്മീയ നേതാവ് ദലൈലാമ പറഞ്ഞു. ടിബറ്റിലെ ജനങ്ങള്‍ ഒരിക്കലും ചൈനയില്‍നിന്നു സ്വാതന്ത്ര്യം ആഗ്രഹിക്കുന്നില്ലെന്നും അദ്ദേഹം വ്യക്തമാക്കി. ഇന്ത്യന്‍ ചേംബര്‍ ഓഫ് കൊമേഴ്സ് സംഘടിപ്പിച്ച പരിപാടിയില്‍ സംസാരിക്കുകയായിരുന്നു ദലൈലാമ
ഇരുരാജ്യങ്ങളും തമ്മില്‍ ചില പ്രശ്നങ്ങളുണ്ടായിട്ടുണ്ടെങ്കിലും ഇപ്പോള്‍ സുദൃഢമായ ബന്ധമാണുള്ളത്. ടിബറ്റുകാര്‍ ഒരിക്കലും ചൈനയില്‍നിന്നു സ്വാതന്ത്ര്യം ആഗ്രഹിക്കുന്നില്ല. ചൈനയ്ക്കൊപ്പം നില്‍ക്കാനാണു ഞങ്ങള്‍ ആഗ്രഹിക്കുന്നത്. പക്ഷേ, ഏതാനും ദശകങ്ങളായി ചൈനയില്‍ എന്താണു സംഭവിക്കുന്നതെന്ന് ആര്‍ക്കും വ്യക്തമല്ല. കൂടുതല്‍ വികസനമാണു ടിബറ്റുകാര്‍ക്കു വേണ്ടതെന്നും ദലൈലാമ പറഞ്ഞു.
