 "सोनू सूदच्या अडचणीत वाढ, अभिनेत्याविरुद्ध अटक वॉरंट जारी, नेमकं प्रकरण काय?")
)
Sonu Sood: बॉलिवूड अभिनेता सोनू सूदच्या अडचणीत वाढ होण्याची शक्यता आहे. लुधियानाच्या एका न्यायालयाने सोनू सूदविरद्ध फसवणुकीच्या प्रकरणात अटक वॉरंट जारी केले आहे. लुधियाना येथील वकील राजेश खन्ना यांनी दाखल केलेल्या खटल्याच्या संदर्भात सोनू सूदला समन्स बजावण्यात आले होते. ज्यामध्ये मोहित शुक्ला नावाच्या एका व्यक्तीवर 10 लाख रुपयांच्या फसवणुकीचा आरोप होता. या प्रकरणी सोनू सूदला न्यायालयात साक्ष देण्यासाठी वारंवार बोलावण्यात आले होते. मात्र, तो एकदाही हजर राहिला नाही. या संदर्भात, आता त्याच्या अटकेसाठी वॉरंट जारी करण्यात आले आहे.
लुधियाना येथील वकील खन्ना यांनी आरोप केला होता की, मोहित शुक्लाने त्यांना बनावट रिजिका नाण्यांमध्ये गुंतवणूक करण्याचे आमिष दाखवले होते त्या प्रकरणी सोनू सूदला साक्ष द्यावी लागली. लुधियाना न्यायिक दंडाधिकारी रमणप्रीत कौर यांनी हे वॉरंट जारी केले आहे. हे वॉरंट मुंबईतील अंधेरी पश्चिम येथील ओशिवरा पोलिस ठाण्यात पाठविण्यात आले असून त्यांना अभिनेता सोनू सूदला अटक करून न्यायालयात हजर करण्याचे निर्देश देण्यात आले आहेत.
न्यायालयात हजर राहण्याच्या सूचना
दंडाधिकारी यांच्या आदेशात म्हटले आहे की, सोनू सूदला अनेक वेळा समन्स पाठवण्यात आले होते. अभिनेत्याला या प्रकरणी माहिती देखील देण्यात आली होती. परंतु तो कधीच हजर राहिला नाही. सोनू सूद एकदाही त्याची साक्ष देण्यासाठी न्यायालयात हजर राहिला नाही. हे लक्षात घेता, आता न्यायालयाने सोनू सूदविरुद्ध अटक वॉरंट जारी केले आहे. या प्रकरणी आता पुढील सुनावणी ही 10 फेब्रुवारी रोजी होणार आहे. आतापर्यंत अभिनेता किंवा त्याच्या टीमने या प्रकरणी कोणतेही निवेदन दिलेले नाही.
त्यामुळे न्यायालयाच्या आदेशांकडे दुर्लक्ष केल्याने त्याच्यासाठी कायदेशीर अडचणी निर्माण होऊ शकतात. सोनू सूद त्याच्या सामाजिक सेवेसाठी आणि स्थलांतरित मजुरांना मदत करण्यासाठी ओळखला जातो. परंतु, हे प्रकरण अभिनेत्यासाठी एक मोठी समस्या बनू शकते.
