Abhishek Manu Singhvi: 'मी राज्यसभेत 500...,' सीटखाली नोटांचा बंडल सापडल्यानंतर अभिषेक मनु सिंघवींचं स्पष्टीकरण

Parliament Cash Row Abhishek Manu Singhvi: संसदेचं हिवाळी अधिवेशन सुरु असून यादरम्यान मोठा गोंधळ झाला आहे. राज्यसभेचे सभापती जगदीप धनखड (Jagdeep Dhankhar) यांनी काल सभागृह स्थगित झाल्यानंतर सीट क्रमांक 222 च्या खाली नोटांचं बंडल सापडल्याची माहिती दिली. ही सीट काँग्रेस खासदार आणि ज्येष्ठ वकील अभिषेक मनु सिंघवींच्या (Abhishek Manu Singhvi) नावे आहेत. दरम्यान, अभिषेक मनु सिंघवी यांनी याप्रकरणी स्पष्टीकरण दिलं आहे. 

Add Zee News as a Preferred Source

अभिषेक मनु सिंघवी यांनी सांगितलं की, "मी याबद्दल ऐकूनच हैराण आहे. मी याबद्दल कधीच ऐकलेलं नाही. मी काल दुपारी 12.57 ला सभागृहात दाखल झालो होतो. सभागृह दुपारी 1 वाजता स्थगित झालं होतं. यानंतर दुपारी 1 ते 1.30 वाजेपर्यंत मी अयोध्याचे खासदार अवधेश प्रसाद यांच्यासह कँटीनमध्ये जेवायला बसलो होतो. दुपारी 1.30 वाजता मी सभागृहात गेलो. यामुळे मी काल सभागृहात 3 मिनिट आणि कँटीनमध्ये 30 मिनिट होतो. या मुद्द्यांचं राजकारण केलं जातं याचं मला फार विचित्र वाटतं. लोक कुठेही आणि कोणत्याही सीटवर काहीही ठेवून जातात याची नक्कीच चौकशी झाली पाहिजे".

'500 रुपयांची नोट सोबत घेऊन जातो'

अभिषेक मनु सिंघवी यांनी पुढे सांगितलं आहे की, "याचा अर्थ आमच्यापैकी प्रत्येकाकडे एक सीट असली पाहिजे आणि ती सीट लॉक करता आली पाहिजे. चावी सोबत नेण्याची परवानगी असावी, अन्यथा कोणी काहीही करु शकतं आणि यावरुन आरोप लावू शकतं. जर हे दु:खद आणि गंभीर नसतं तर हास्यास्पद असतं.मला वाटतं याच्या मुळाशी जाण्यासाठी प्रत्येकाने सहकार्य केलं पाहिजे. जर सुरक्षा यंत्रणांमध्ये काही त्रुटी असेल तर त्यादेखील उघड करायला हव्यात". मी जेव्हा कधी सभागृहात जातो तेव्हा 500 रुपयेच घेऊन जातो असंही स्पष्टीकरण त्यांनी दिलं आहे. 

नेमकं काय झालं?

राज्यसभा सुरू झाल्यानंतर सकाळच्या सत्रात अचानकपणे राज्यसभा सभापती जगदीप धनकड यांनी सर्व सदस्यांच्या निदर्शनास एक घटना आणून दिली. काल रात्री संसदेतील सुरक्षा कर्मचारी तपासणी करत असताना 222 क्रमांकाच्या सीटखाली काही नोटांचं बंडल आढळलं. या नोटा काँग्रेस खासदार अभिषेक मनु सिंघवी यांच्या सीटखाली सापडल्याचं सभापतींनी सांगितलं. या नोटा ख-या आहेत की खोट्या आणि नोटा राज्यसभेत कशा आल्या यावर चौकशी करणे गरजेचं असल्याचं सभापतींनी सांगितले आणि चौकशीचे आदेश दिले. 

दरम्यान ही संसदेच्या प्रतिष्ठेला धक्का पोहोचवणारी घटला असल्याचं सांगून जे पी नड्डा यांनी काँग्रेस खासदारांवर आरोप केले. तर कांग्रेस खासदार असं कृत्य करणार नसल्याचा मल्लिकार्जुन खरगे यांनी दिला.