ITR फाइल केल्यानंतरही टॅक्स रिफंडला लागतो उशीर? तुम्ही कुठे चुकता? सर्वकाही जाणून घ्या!

इनकम टॅक्स

ITR Filing: रिफंड लवकर मिळावा म्हणून इन्कम टॅक्स रिटर्न लवकर भरणारे अनेकजण असतात. पण तुमचा आयटीआर दाखल केल्यानंतर किती दिवसांनी परतफेड प्रक्रिया केली जाते? याची तुम्हाला कल्पना आहे का? प्रत्यक्षात टॅक्स पेयर्सनी आयटीआर दाखल केल्यानंतर त्यांचे रिटर्न ई-व्हेरिफाय केले की रिफंड प्रक्रिया सुरू होते. यानंतर साधारण 4 ते 5 आठवड्यांत रिफंड येतो. पण जर इतका वेळ होऊनही तुमचा रिफंड मिळाला नाही तर कुठेतरी काहीतरी गडबड असू शकते. हे एकदा तपासून बघायला हवे. आयटीआर रिफंड स्टेटस तपासण्याची पद्धत आणि रिफंड अडकण्याचे कारण समजून घेऊया.

अशा प्रकारे तापासा स्टेटस 

सर्वप्रथम आयकर विभागाच्या अधिकृत वेबसाइट https://www.incometax.gov.in/iec/foportal/ वर जा.
युजर आयडी, पासवर्ड आणि कॅप्चा टाकून लॉग इन करा.
आता तुम्हाला स्क्रीनवर इन्कम टॅक्स रिटर्न फॉर्म दिसेल.
यानंतर फॉर्मच्या खाली असलेल्या ड्रॉप-डाउन लिस्टमधील पर्यायावर क्लिक करा आणि ITR निवडा.
आता तुम्हाला असेसटमेंट इयर भरुन सबमिट करावे लागेल.
यानंतर रिफंडचा स्टेटस तपासण्यासाठी तुम्हाला आयटीआर पावती क्रमांकावर क्लिक करावे लागेल.
यानंतर स्क्रीनवर आयटीआर रिफंडचे स्टेटस दिसून येईल.

दुसरा पर्याय काय?

सर्वप्रथम https://tin.tin.nsdl.com/oltas/refundstatuslogin.html वर जा.
पेज खाली स्क्रोल केल्यावर तुम्हाला 2 प्रकारची माहिती विचारली जाईल. एक पॅन क्रमांक आणि रिफंड बाकी असलेले वर्षे. ही माहिती भरा.
आता तुम्हाला कॅप्चा कोड भरा.
यानंतर Proceed वर क्लिक करा. स्टेटस तुमच्या समोर असेल.
एसएमएसद्वारेही माहिती उपलब्ध होईल.

आयकर विभाग तुम्हाला तुमच्या रिटर्नच्या स्टेट्सबद्दल तुमच्या ईमेल आणि एसएमएसद्वारे माहिती देतो. जर तुमचा रिटर्न प्रोसेसमध्ये असेल तर तुम्हाला त्याबद्दल एसएमएस किंवा ईमेलद्वारे माहिती मिळू शकते. रिटर्नबाबत काही समस्या किंवा त्रुटी असल्यास विभागाकडून त्यासंदर्भातील माहिती तुम्हाला दिली जाते.

कोणत्या चुकांमुळे अडकतो रिटर्न्स 

रिफंड मिळविण्यासाठी तुम्हाला तुमचे आयकर रिटर्न तर भरावे लागेलच. सोबत ते ई-व्हेरिफाय देखील करावे लागेल. जोपर्यंत तुम्ही तुमचा आयटीआर ई-व्हेरिफाय करत नाही तोपर्यंत तुमचा रिटर्न प्रोसेस केला जाणार नाही. ई-व्हेरिफिकेशननंतर रिफंड येण्यासाठी 4 ते 5 आठवडे लागू शकतात. म्हणून हे काम करायला विसरू नका. ई-व्हेरिफिकेशन व्यतिरिक्त आधार पॅनशी लिंक न होणे, आयकर विभागाने पाठवलेल्या ई-मेलला उत्तर न देणे, टीडीएस न जुळणे, तुमचा खाते क्रमांक किंवा आयएफएससी कोड चुकीचा असणे इत्यादी काही चुकांमुळेही रिटर्न्स अडकू शकते.