तीर्थयात्रेचे बुकिंग ऑनलाइन करताय? आत्ताच सावध व्हा! सायबर विभागाने जारी केलाय अलर्ट, कारण...

Indian Cyber Crime Unit warns of rising online booking scams targeting religious pilgrims and tourists in India

Indian Cyber Crime: तुम्हीदेखील ऑनलाइन जाहिरीती बघून इंटरनेटवरच तीर्थयात्रेचे पॅकेज बुकिंग करण्याच्या विचारात असाल तर आत्ताच सावध व्हा. कारण यामुळं तुमची लाखो रुपयांची फसवणूक होऊ शकते. गृह मंत्रालयाच्या अंतर्गत येणाऱ्या भारतीय सायबर गुन्हे समन्वय केंद्राने शनिवारी देशभरातील नागरिकांसाठी धोक्याचा इशारा जारी केला आहे. धार्मिक यात्रेकरुंना लक्ष्य करुन काही सायबर भामटे नागरिकांनी फसवणूक करत असल्याचे समोर आले आहे. सायबर विभागाने देशातील नागरिकांना या ऑनलाइन होणाऱ्या फसवणुकीबाबत अलर्ट जारी केला आहे. 

गृह मंत्रालयाने जारी केलेल्या पत्रकानुसार, अधिकृत सरकारी पोर्टल किंवा विश्वासार्ह ट्रॅव्हल एजन्सीद्वारेच यात्रेकरुंनी बुकिंग करावी. तसंच, पेमेंट करण्यापूर्वी त्या वेबसाईटची सत्यता पडताळावी, असं अवाहन केलं आहे. तसंच, अत्यंत सावधगिरी बाळगण्याचा सल्ला सायबर विभागाने दिला आहे. बनावट साइट्स, सोशल मीडिया पेजेस, फेसबुक पोस्ट आणि गुगलसारख्या सर्च इंजिनवर सशुल्क जाहिरीतींद्वारे फसवणूक केली जात आहे. त्यामुळं नागरिकांनी बुकिंग करताना सावधगिरी बाळगावी, असं अवाहन करण्यात येत आहे. पर्यटकांची फसवणूक होऊ नये म्हणून फसव्या जाहिराती देणाऱ्या वेबसाइट्स बंद केल्या जात आहेत. 

केदारनाथ आणि चार धामसाठी हेलिकॉप्टर बुकिंग, यात्रेकरूंसाठी हॉटेल आरक्षण, ऑनलाइन टॅक्सी सेवा आणि धार्मिक टुर पॅकेजस अशा कमी किंमतीतील ऑफर देऊन पर्यटकांना आकर्षित केले जाते. त्यानंतर त्यांची लाखो रुपयांची फसवणूक केली जात असल्याचे समोर आले आहे. 

सायबर विभागाचे अवाहन

जर कोणत्या पर्यटकांची फसवणूक झाली असेल तर तात्काळ राष्ट्रीय सायबर क्राइम रिपोर्टिंग पोर्टलवर www.cybercrime.gov.in वर किंवा 1930 वर फोन करुन तक्रार नोंद करू शकता. 

केदारनाथ आणि चारधामसाठी अधिकृत बुकिंग कुठे कराल?

केदारनाथ हेलिकॉप्टर बुकिंग https://www.heliyatra.irctc.co.in/ या द्वारे करता येते. तर, सोमनाथ ट्रस्टची अधिकृत बेवसाइट https://somnath.org/ ही आहे. याद्वारे गेस्ट हाउस बुकिंग करता येते. तसंच, चारधाम यात्रेच्या बुकिंगसाठी या https://uttarakhandtourism.gov.in/experiences/char-dham बेवसाइटचा वापर करा.