रतन टाटांच्या मृत्यूपत्राने भुवया उंचावल्या, अज्ञात व्यक्तीच्या नावे 500 कोटींची संपत्ती; कोण आहेत मोहिनी मोहन दत्ता?

Who is Mohini Mohan Dutta: दिवंगत उद्योजक रतन टाटा (Ratan Tata) यांच्या मृत्यूपत्राने सर्वांच्या भुवया उंचावल्या आहेत. रतन टाटा यांनी त्यांच्या संपत्तीपैकी जवळजवळ एक तृतीयांश संपत्ती एका रहस्यमय व्यक्तीसाठी सोडली आहे. 9 ऑक्टोबर 2024 रोजी रतन टाटा यांचं निधन झालं. रतन टाटा यांनी आपली 500 कोटींची मालमत्ता मोहिनी मोहन दत्ता यांना दिली. मोहिनी मोहन दत्ता यांची कुटुंबाला फारशी माहिती नाही किंवा त्यांच्या जवळच्या वर्तुळातही माहिती नव्हती, असं वृत्त 'द इकॉनॉमिक टाईम्स'ने दिलं आहे.

मृत्यूपत्रात मोहिनी मोहन दत्ता यांचा उल्लेख रतन टाटांच्या संपत्तीच्या वारसांपैकी एक म्हणून करण्यात आला आहे. मात्र असं असंल तरी प्रोबेट झाल्यानंतर आणि उच्च न्यायालयाने प्रमाणित केल्यानंतरच ती वाटली जाईल. यासाठी किमान सहा महिने लागण्याची शक्यता आहे.

कोण आहेत मोहिनी दत्ता?

मोहिनी मोहन दत्ता हे जमशेदपूर येथील उद्योजक आहेत. ते स्टॅलियनचे सह-मालक आहेत, ज्या नंतर टाटा सर्व्हिसेसचा भाग बनल्या. विलीनीकरणापूर्वी, दत्ता यांची स्टॅलियनमध्ये 80 टक्के भागीदारी होती. तर उर्वरित 20 टक्के भाग टाटा इंडस्ट्रीजकडे होता.

रतन टाटा यांच्या अंत्यसंस्कारात दत्ता यांनी खुलासा केला होता की, ते फक्त 24 वर्षांचे असताना जमशेदपूरमध्ये डीलर्स हॉस्टेलमध्ये पहिल्यांदा भेटले होते.

मृत्युपत्रात नाव येण्यापूर्वी मोहिनी मोहन दत्ता यांच्याबद्दल फारसं कोणी ऐकलं नव्हतं. परंतु समूहातील सूत्रांच्या माहितीनुसार, उद्योजक नेहमीच कुटुंबाच्या जवळचे होते. "त्यांनी मला मदत केली आणि मला खरोखरच उभारी दिली," असं मोहिनी मोहन दत्ता दत्ता यांनी माध्यमांना सांगितलं होतं.

मोहिनी मोहन दत्ता यांचे रतन टाटा यांच्याशी जवळजवळ सहा दशकांचे संबंध असल्याचं मानलं जातं. डिसेंबर २०२४ मध्ये मुंबईतील एनसीपीए येथे झालेल्या रतन टाटा यांच्या जयंती समारंभात ते आमंत्रित होते असंही सांगितलं जातं. या कार्यक्रमाला फक्त जवळचे सहकारी आणि कुटुंबातील सदस्य उपस्थित होते.

फॉर्च्यूनच्या एका वृत्तानुसार, मोहिनी मोहन दत्ता यांच्या मुलीनेही या समूहासोबत काम केलं आहे.  प्रथम 2015 पर्यंत ताज हॉटेल्समध्ये आणि नंतर टाटा ट्रस्टमध्ये जिथे 2024 पर्यंत ती कार्यरत होती.

रतन टाटा यांचे मृत्यूपत्र

रतन टाटा यांचे मृत्यूपत्र त्यांच्या निधनानंतर दोन आठवड्यांनी सार्वजनिक करण्यात आलं होतं. यामध्ये त्यांचे भाऊ, सावत्र बहिणी, त्यांचे घरातील कर्मचारी आणि कार्यकारी सहाय्यक शंतनू नायडू यांच्यासह अनेक लाभार्थ्यांना संपत्तीचे वाटप करण्यात आले. रतन टाटा यांनी त्यांच्या पाळीव श्वान टिटोची काळजी घेण्यासाठी अनेक तरतुदी देखील केल्या. टाटा सन्समधील हिस्सेदारी रतन टाटा एंडोमेंट ट्रस्टकडे हस्तांतरित करण्यात आली आहे.

त्यांच्या मालमत्तेत अलिबागमधील समुद्रकिनारी असलेला बंगला, जुहूमधील एक दोन मजली घर, 350 कोटी रुपयांपेक्षा जास्त मुदत ठेवी आणि टाटा सन्समधील हिस्सा यांचा समावेश होता.