Pahalgam Terrorist Attack: मेंदी, हातात चुडा अन् पतीचा मृतदेह; Viral फोटोतील 'ते' दोघं कोण?

Lieutenant Vinay Narwal was tragically killed in a terrorist attack in pahalgam terror attack

Pahalgam Terrorist Attack: पहलगाम दहशतवादी हल्ल्यानंतर एक फोटो चांगलाच व्हायरल होतोय. एक नववधू पतीच्या निष्प्राण देहाच्या बाजूला बसली आहे. अजून हातावरची मेंदीही उतरली नाहीये. हातात चूडा आणि चेहऱ्यावर अतिव दुख. या फोटोने समस्त देशवासियांना हळवं केलं आहे. हा व्हायरल झालेला फोटो नौदलाचे अधिकारी विनय नरवाल आणि त्यांची पत्नी हिमानी यांचा आहे. 

जम्मू काश्मीर येथे झालेल्या दहशतवादी हल्ल्यात हरयाणाचे रहिवाशी असलेले लेफ्टनेंट विनय नरवाल यांचा मृत्यू झाला. विनय नरवाल यांचा सहा दिवसांपूर्वीच विवाह झाला होता. काही दिवसांपूर्वी त्यांच्या कुटुंबीयांनी त्यांच्या लग्नाचे रिसेप्शन दिले होते. विनय आणि त्यांची पत्नी हिमानी हनिमूनसाठी काश्मीरला आले होते. मात्र संसार सुरू होण्याआधीच हिमानीचे संपूर्ण आयुष्य उद्ध्व्स्त झाले.

मिळालेल्या माहितीनुसार, विनय दोन वर्षांपूर्वीच भारतीय नौदलात भरती झाले होते. 16 एप्रिलला रिसेप्शन झाल्यानंतर ते 21 एप्रिलला हनिमूनसाठी काश्मीरला गेले होते. या घटनेनंतर त्यांच्या कुटुंबाला मोठा धक्का बसला होता. त्यांच्या कुटुंबातील काही सदस्य श्रीनगरसाठी रवाना झाले आहेत. 26 वर्षीय विनय सध्या कोचीयेथे तैनात होते. विनय नरवाल यांना दहशतवाद्यांनी छाती, गळा आणि पाठीवर गोळ्या चालवल्या त्यामुळं जागीच त्यांचा मृत्यू झाला. 13 एप्रिल रोजीच विनय यांचे लग्न झाले होते. 

महिलेचा व्हिडिओ व्हायरल

पहलगाममध्ये घटनेनंतर विनय यांच्या पत्नीचा एक व्हिडिओ व्हायरल होतोय. यात ती म्हणताना दिसतेय की, आम्ही भेलपुरी खात होतो. तेव्हा दहशतवादी तिथे आले आणि त्याने विचारलं मुस्लिम आहेस का? आणि नंतर पतीला गोळी घातली. 

मृतांचा आकडा 27

पहलगाम पर्यटक हल्ल्यात मृतांचा आकडा 27 वर पोहोचला आहे, काही जखमींची प्रकृती गंभीर असल्याचे सांगितले जात आहे. यात महाराष्ट्रातील 6 पर्यटकांचा मृत्यू झाला आहे. पनवेलमधील 1, डोंबिवीलीतल 3 आणि पुण्यातील 2 जणांचा समावेश आहे.

बुधवारी सुरक्षा दल आणि दहशतवाद्यांमध्ये जोरदार गोळीबार

सुरक्षा दल आणि दहशतवाद्यांमध्ये जोरदार चकमक झाली असून दोन दहशतवाद्यांचा खात्मा करण्यात आला आहे, सर्च ऑपरेशनमध्ये सुरक्षा दलांनी घुसखोरीचा प्रयत्न हाणून पाडला असून दहशतवाद्यांकडून मोठ्या प्रमाणात शस्त्रे, दारूगोळा आणि इतर युद्धसाहित्य जप्त करण्यात आले आहे.