'त्यांनी नैतिकतेवर...'; धनंजय मुंडेंच्या राजीनाम्यावर अजित पवारांची अवघ्या 5 शब्दांत प्रतिक्रिया

अजित पवारांनी नोंदवली पहिला प्रतिक्रिया

Dhananjay Munde Resig Ajit Pawar First Comment: मुख्यमंत्री देवेंद्र फडणवीस यांनी त्यांच्या मंत्रिमंडळातील सहकारी आणि अजित पवारांच्या राष्ट्रवादी काँग्रेसचे आमदार मंत्री धनंजय मुंडेंचा राजीनामा स्वीकारल्याची घोषणा केली. विधानसभेच्या अर्थसंकल्पीय अधिवेशनाच्या दुसऱ्याच दिवशी अजित पवारांच्या पक्षातील मंत्र्याचा राजीनामा घेण्याची नामुष्की फडणवीस यांच्यावर ओढावली आहे. बीडमधील मस्साजोग येथील सरपंच संतोष देशमुख यांची डिसेंबर महिन्यात क्रूरपणे हत्या करण्यात आली. या प्रकरणातील प्रमुख आरोपी असलेला वाल्मिक कराड हा धनंजय मुंडेंचा निकटवर्तीय असून हे प्रकरण समोर आल्यानंतर आणि 31 डिसेंबर रोजी वाल्मिक कराडला अटक झाल्यापासूनच धनंजय मुंडेंच्या राजीनाम्याची मागणी केली जात होती. अखेर सोमवारी संतोष देशमुखांना अमानुषपणे मारहाण केल्याचे फोटो आणि व्हिडीओ समोर आल्यानंतर संतापाची लाट असतानाच फडणवीस यांनी धनंजय मुंडेंना राजीनामा देण्याचे आदेश दिले. या राजीनाम्यावर उपमुख्यमंत्री अजित पवारांनी पहिली प्रतिक्रिया नोंदवली आहे.

Add Zee News as a Preferred Source

अजित पवारांभोवती गर्दी अन् अखेर ते बोलले

धनंजय मुंडेंनी राजीनामा दिल्याची माहिती समोर आल्यानंतर विधानसभा अधिवेशनाच्या दुसऱ्या दिवसाच्या कामाकाजासाठी पोहोचलेल्या अजित पवारांना पत्रकारांनी घेराव घातला. अजित पवारांचं या राजीनाम्यावर काय म्हणणं आहे हे जाणून घेण्यासाठी त्यांच्यावर प्रश्नांचा भडीमार करण्यात आला. मात्र नेहमीप्रमाणे पत्रकारांशी संवाद साधतात त्या पोडियमजवळ न थांबता अजित पवारांनी थेट विधानसभेच्या इमारतीत प्रवेश करण्यात सुरुवात केली. त्यावेळी पत्रकारांनी त्यांच्याभोवती गराडा घालत त्यांची प्रतिक्रिया जाणून घेण्याचा प्रयत्न केला.

अजित पवारांनी अखेर पत्रकारांना पडलेल्या चेहऱ्याने धनंजय मुंडेंच्या राजीनाम्यावर पहिली प्रतिक्रिया दिली. "त्यांनी नैतिकतेवर राजीनामा दिलेला आहे," असं अजित पवार म्हणाले. 

मध्यरात्री अजित पवारांच्याच 'देवगिरी'वर झाली महत्त्वाची बैठक अन् राजीनामा देण्याचं ठरलं

सोमवारी सायंकाळी संतोष देशमुखांना मारहाण झाल्याचे फोटो आणि व्हिडीओ समोर आल्यानंतर रात्री उशीरा अजित पवारांच्या 'देवगिरी' बंगल्यावर झालेल्या बैठकीत फडणवीसांनी धनंजय मुंडेंना स्पष्ट शब्दांमध्ये 'राजीनामा द्या' असं सांगितलं. मस्साजोगचे सरपंच संतोष देशमुख यांच्या हत्याप्रकरणावरुन सातत्याने धनंजय मुंडे आणि राज्य सरकारवर टीका होत होती. धनंजय मुंडेंनी या प्रकरणातील प्रमुख आरोपी वाल्मिक कराडला पाठबळ दिलं. वाल्मिकच्या इशाऱ्यानेच हे हत्याकांड झाल्याची माहिती समोर आली आहे. यासंदर्भातील अनेक पुरावे समोर आल्यानंतर धनंजय मुंडेंनी राजीनामा द्यावा अशी मागणी केली जात होती. धनंजय मुंडेंच्या राजीनाम्यासंदर्भात 'देवगिरी' बंगल्यावर रात्री साडेबारा वाजता मुख्यमंत्री देवेंद्र फडणवीस स्वत: पोहचले. त्यांनी या ठिकाणी अजित पवार, धनंजय मुंडे आणि सुनिल तटकरे उपस्थित होते. या चारही नेत्यांची जवळपास दीड तास चर्चा झाल्यानंतर मुंडेंचा राजीनामा घेण्यावर एकमत झालं.