पुण्यात खळबळ! कचऱ्याच्या ढिगाऱ्यात सापडली 6 ते 7 भ्रूण आणि मानवी अवशेष

Daund Crime News : पुण्यातील दौंड शहरा लगत असणाऱ्या बोरावके नगरमध्ये प्राईम टाऊनच्या पाठीमागे असणाऱ्या कचऱ्याच्या ढिगार्‍यात भ्रूण आणि मानवी शरीराचे काही अवशेष आढळून आल्याची माहिती मिळत समोर आली आहे. यामुळे तेथील परिसरात एकच खळबळ उडाली आहे. प्रथमदर्शनी ही भ्रूण आणि मानवी शरीराचे अवशेष हे प्रयोग शाळेतील नमुने असल्याची माहिती मिळत आहे. मात्र, हा गर्भपाताचा प्रकार आहे का या दृष्टीने देखील दौंड पोलीस सध्या तपास करत आहेत. 

दौंडमधील स्थानिक नागरिकांच्या निदर्शनास ही बाब आल्यानंतर त्यांनी पोलिसांच्या 112 क्रमांकाला फोन करून या संदर्भातील माहिती दिली. घटनेची माहिती मिळताच दौंड पोलीस घटनास्थळी दाखल झाले. या घटनेची पाहणी करताच पोलिसांनी पाहणी अंती पंचनामा करून डॉक्टरांचे वैद्यकीय पथक देखील या ठिकाणी बोलावले आहे. हे भ्रूण आणि अवशेष ताब्यात घेण्यात आले असून हे या ठिकाणी कसे आले याचा शोध आता दौंड पोलीस करत आहेत. वैद्यकीय तज्ञांच्या अहवालानुसार यानंतर पोलीस पुढील कारवाई करणार आहेत. 

कचऱ्याच्या ढिगाऱ्यात हे भ्रूण कसे आले? 

दौंडमधील या घटनेने परिसरात एकच खळबळ उडाली आहे. स्थानिक पोलिसांनी या ठिकाणी येऊन पाहणी केली आहे. त्यानंतर या ठिकाणी हे भ्रूण कसे आले की कोणी टाकले आहेत याचा देखील शोध पोलीस घेत आहेत. मिळालेल्या माहितीनुसार, हे भ्रूण आणि काही मानवी शरीराचे अवशेष सीलबंद बरण्यांमध्ये ठेवली असून त्यावरती त्या संदर्भातील माहिती देखील आहे आणि ते 2020 मधील आहेत अशी प्राथमिक माहिती आता समोर आली आहे. मात्र, या कचऱ्याच्या ढिकाऱ्यात हे भ्रूण आणि मानवी शरीराचे अवशेष कसे आले याचा शोध दौंड पोलीस घेत आहेत.