कोणतीही निवडणूक न लढवता डायरेक्ट मुख्यमंत्री बनलेला महाराष्ट्रातील सर्वात लोकप्रिय नेता

Uddhav Thackeray Birthday : मुख्यमंत्री... महाराष्ट्राच्या राजकारणातील अत्यंत महत्वाचे पद. महाराष्ट्र विधानसभेची निवडणूक लढवणाऱ्या आमदारांमधून मुख्यमंत्री निवडला जातो. महाराष्ट्रात एक असा नेता आहे ज्याने  कोणतीही निवडणूक लढवली नाही तरी देखील हा नेता थेट महाराष्ट्राचा मुख्यमंत्री बनला. या नेत्याचे नाव आहे उद्धव ठाकरे. फोटोग्राफर ते मुख्यमंत्री असा उद्धव ठाकरे यांचा जीवनप्रवास आहे. जाणून घेऊया कोणतीही निवडणूक न लढवता उद्धव ठाकरे महाराष्ट्राचे मुख्यमंत्री कसे बनले?

महाराष्ट्राच्या राजकारणात उद्धव ठाकरे यांनी आपला वेगळा ठसा उमटवला आहे. अगदी थोड्या कालावधीत ते लोकप्रिय मुख्यमंत्री बनले. 27 जुलै 1960 रोजी मुंबईत उद्धव ठाकरेंचा जन्म झाला.  उद्धव यांनी जेजे स्कूलमधून पदवीचे शिक्षण घेतले. पत्नी रश्मी ठाकरे, दोन मुले आदित्य आणि तेजस असा त्यांचा परिवार आहे. आदित्य ठाकरे आमदार आणि युवा सेनेचे अध्यक्ष आहेत. तर तेजस ठाकरे याला देखील फोटग्राफीची आवड आहे. 

उद्धव ठाकरेंना राजकारणापेक्षा फोटोग्राफीची जास्त आवड होती.  उद्धव ठाकरे 2000 पर्यंत राजकारणापासून दूर राहिले. त्यापूर्वी ते शिवसेनेचे मुखपत्र 'सामना'चे काम पाहत होते आणि या वृत्तपत्राचे संस्थापकही होते. बाळ ठाकरे यांची प्रकृती बिघडल्यानंतर उद्धव राजकारणात सक्रिय झाले. बाळासाहेबांनी सर्वात अगोदर 2002 मध्ये उद्धव यांच्याकडे बीएमसी निवडणुकीची जबाबदारी सोपवली होती. यात त्यांनी मोठे यश मिळवले. यानंतर बाळासाहेबांनी 2003 मध्ये उद्धव यांचा राजकारणातला सहभाग वाढवण्यासाठी त्यांना शिवसेनेचा कार्यकारी अध्यक्ष नियुक्त केले होते. यानंतर बाळासाहेबांनी 2004 मध्ये त्यांना पक्षाचा पुढील अध्यक्ष बनवण्याची घोषणा केली होती. या घोषणेमुळे कुटूंबात फूट पडली.  चुलत भाऊ राज ठाकरे यांनी 2006 मध्ये शिवसेनेपासून वेगळे होऊन स्वतःचा नवीन पक्ष स्थापन केला. 

उद्धव ठाकरे यांनी त्यांच्या वडिलांच्या धर्तीवर राजकारण सुरू ठेवले. 2014 साली झालेल्या विधानसभा निवडणुकीमध्ये कोणत्याही राजकीय पक्षाशी युती न करता उद्धव ठाकरे यांनी शिवसेनेचे 63 आमदार निवडून आणले. 2019  साली झालेल्या विधानसभा निवडणुकीत उद्धव ठाकरे यांनी पुन्हा भाजप बरोबर युती करून निवडणूक लढवली आणि 56 आमदार निवडून आणले. पण सत्ता वाटप करण्यात वाद निर्माण झाल्यामुळे युती तुटली आणि उद्धव ठाकरे यांनी राष्ट्रवादी काँग्रेस, काँग्रेस आय सोबत महाराष्ट्र विकास आघाडीचे सरकार स्थापन केले. उद्धव ठाकरे यांनी निवडणूक लढवली नाही किंवा कोणतेही पद स्वीकारले नाही, मात्र, 2019 च्या निवडणुकीत त्यांनी पहिल्यांदाच त्यांचा मुलगा आदित्य ठाकरे यांना उमेदवारी दिली. 28 नोव्हेंबर 2019 रोजी महाराष्ट्र राज्याचे 19 वे मुख्यमंत्री म्हणून शपथ घेतली.

उद्धव ठाकरे यांच्या आधी, काँग्रेस नेते ए.आर. अंतुले ,  वसंतदादा पाटील ,  शिवाजीराव निलंगेकर पाटील ,  शंकरराव चव्हाण ,  सुशील कुमार शिंदे आणि पृथ्वीराज चव्हाण हे अशा नेत्यांमध्ये आहेत जे मुख्यमंत्री म्हणून शपथ घेताना राज्य विधिमंडळाच्या कोणत्याही सभागृहाचे सदस्य नव्हते. तत्कालीन काँग्रेस नेते आणि सध्याचे राष्ट्रवादी काँग्रेसचे अध्यक्ष शरद पवार यांचेही या नेत्यांमध्ये नाव आहे.