Maharashtra Breaking News Today LIVE: ग्राहकांसाठी दिलासादायक बातमी, सोन्याच्या दरात मोठी घसरण

सोलापूर जिल्ह्यात भाजप कडून पक्ष प्रवेश

सोलापूर जिल्ह्यामध्ये भारतीय जनता पक्षाकडून ऑपरेशन लोटस सुरू झाले आहे. याची सर्व जबाबदारी पालकमंत्री जय कुमार गोरे यांनी घेतली आहे. आज सांगोला तालुक्यात शेकापला धक्का देऊन याची सुरुवात झाली आहे. आगामी स्थानिक स्वराज्य संस्थांच्या निवडणुकीत सोलापूर जिल्ह्यातील 11 तालुक्यातून अनेक दिग्गज मंडळी भाजपत प्रवेश करणार आहेत. त्यामुळे भाजप कडून सत्ताधारी मित्र पक्षासह विरोधी पक्षाला खिंडार पाडण्याचे मनसुबे रचले जातं आहेत

सांगली पोलिसांकडून 1 कोटी 11 लाख सहा हजार रुपयांच्या बनावट नोटांचा साठा जप्त

सांगली पोलिसांकडून 1 कोटी 11 लाख सहा हजार रुपयांच्या बनावट नोटांचा साठा जप्त करण्यात आल्या आहेत. अंतरजिल्हा टोळीचा पर्दाफाश करत 5 जणांना करण्यात आली अटक करण्यात आली. अटक करण्यात आलेल्यांमध्ये कोल्हापूर मधील एका पोलीस कर्मचाऱ्याचा समावेश आहे. 99 लाख 23 हजार 300 रुपयांच्या नोटा जप्त, 500 आणि 200 रुपयांच्या बनावट नोटांचा समावेश आहे. 

संभाजी ब्रिगेडचे विकास पासलकर यांचा अजित पवारांच्या उपस्थितीत राष्ट्रवादीत प्रवेश

संभाजी ब्रिगेडचे विकास पासलकर यांचा आज अजित पवारांच्या उपस्थितीत राष्ट्रवादी काँग्रेस पक्षात प्रवेश झाला. यावेळी बोलताना उपमुख्यमंत्री अजित पवार म्हणाले की, 'राष्ट्रवादीत हा पक्ष देखील शाहू फुले आंबेडकरांच्या विचाराचा असल्याने मीच विकास पासलकर यांना पार्टीत आमंत्रित केलं. त्यांच्या कामाचा आम्हाला नक्कीच फायदा होईल. त्यांना पक्ष प्रवक्ते पद देऊ केलंय. कारण चेहरा नेहमी चांगलाच असला पाहिजे. ती जबाबदारी पासलकर नक्कीच निश्चित पार पाडतील'. 

दौंड तालुक्यातील बोरीऐंदी गावात यवत पोलिसांची मोठी कारवाई

दौंड तालुक्यातील बोरीऐंदी गावात यवत पोलिसांनी मोठी कारवाई करत तब्बल 27 लाख 97 हजार 624 रुपयांचा गुटखा पानमसाला आणि तंबाखूचा अवैध साठा जप्त केला आहे. आरोपी नवनाथ रतन झुरंगे याने आपल्या घरासमोरील पत्र्याच्या खोलीत आरएमडी डायरेक्टर स्पेशल शॉट 999 विमल आणि व्ही-1 टोबॅको या विविध ब्रँडचा मोठा साठा साठवून ठेवला होता. महाराष्ट्र राज्य अन्न सुरक्षा आयुक्तांच्या आदेशानुसार अशा गुटखा पानमसाला आणि तंबाखूजन्य पदार्थांच्या साठा विक्री आणि वितरणावर बंदी असून आरोपीने या आदेशाचे उल्लंघन केले आहे. त्यामुळे त्याच्याविरुद्ध गुन्हा दाखल करण्यात आला असून ही कारवाई यवत पोलीस स्टेशनचे पोलीस निरीक्षक निरीक्षक नारायण देशमुख यांच्या मार्गदर्शनाखाली करण्यात आली आहे. पुढील तपास पोलिस उपनिरीक्षक विजय कोल्हे करीत आहेत.

म्हाडाच्या कोकण मंडळाच्या घरांसाठी शनिवारी सोडत

म्हाडाच्या कोकण मंडळाच्या ५ हजार २८५ घरांसह ७७ भूखंडांच्या विक्रीसाठी शनिवारी सोडत काढण्यात येणार आहे. उपमुख्यमंत्री तथा गृहनिर्माण मंत्री एकनाथ शिंदे यांच्या हस्ते ठाण्यातील डाॅ. काशीनाथ घाणेकर नाट्यगृहात शनिवारी सकाळी ११ वाजता सोडतीचा कार्यक्रम आयोजित करण्यात आला आहे. या सोडतीत एक लाख ५८ हजार ४२४ अर्जदार सहभागी होणार आहेत. त्यामुळे शनिवारी कोणाचे हक्काच्या घराचे स्वप्न पूर्ण होते याकडे सर्वांचे लक्ष लागले आहे.

नांदेडचा समावेश करुन नवीन जीआर काढला

अतिवृष्टी मुळे नुकसान झालेल्या शेतकऱ्यांना दिलासा देण्यासाठी सरकारने विशेष पॅकेज ची घोषणा केली. पण काल काढलेल्या जी आर मध्ये नांदेड जिल्ह्याचेच नाव वगळण्यात आले. राज्यात सर्वाधिक 6 लाख 48 हजार हेक्टरवरील पिकांचे नुकसान नांदेड जिल्ह्यात झालेले असताना नांदेडचा समावेश नसल्याचा प्रकार झी 24 तासाने लावून धरला. नांदेडमध्ये संतप्त शेतकऱ्यांनी आंदोलन केले. त्यांनंतर सरकारला जाग आली. नांदेडचे नाव टाकून सुधारित जी आर आजच निघेल असे नांदेडचे पालकमंत्री अतुल सावे यांनी झी 24 तासशी बोलताना सांगितले होते. त्यानुसार सुधारित जी आर काढून त्यामध्ये नांदेड चा समावेश करण्यात आला. नांदेड सह इतर दोन जिल्ह्याचाही नव्याने समावेश करण्यात आलाय. कालच्या जी आर मध्ये एकूण 31 जिल्ह्याची नावे होती. आजच्या जी आर मध्ये एकूण 34 जिल्ह्याची नावे आहेत

जळगावमध्ये दोघांनी केलेल्या मारहाणीनंतर तरुणाने विष प्राशन करून आत्महत्या केल्याची घटना 

जळगावच्या जामनेर तालुक्यातील वाकोद येथे दोघांनी केलेल्या मारहाणीनंतर तरुणाने विष प्राशन करून आत्महत्या केल्याची घटना समोर आली आहे. अकबर वजीर तडवी असे 29 वर्षीय आत्महत्या करणाऱ्या मृत तरूणाचे नाव आहे. घराजवळ लघवी केल्याच्या कारणावरून तरुणाला सरपंच पतीसह आणखी एक जणाने शिवीगाळ करत मारहाण केली होती. या मारहाणीचा अपमान सहन न झाल्याने तरुणाने विष प्राशन केले, त्यानंतर त्याचा उपचारादरम्यान मृत्यू झाला होता. गुन्हा दाखल करण्याच्या मागणीसाठी कुटुंबीयांसह नातेवाईकांनी तरुणाचा मृतदेह पहूर पोलिस ठाण्यात नेत ठिय्या आंदोलन केले, गुन्हा दाखल झाला नाही तर अंत्यसंस्कार न करण्याचा पावित्रा घेतला होता. याप्रकरणी आत्महत्येस प्रवृत्त केल्याप्रकरणी सरपंच पती दिपक बाबुराव गायकवाड व भैय्या मधुकर बोराडे या दोन जणांविरुद्ध पहूर पोलिसात गुन्हा दाखल करण्यात आला. 

पूरग्रस्त शेतकऱ्यांच्या मागण्यांसाठी अखिल भारतीय किसान सभेची निदर्शने

पूरग्रस्त शेतकऱ्यांच्या विविध मागण्यांसाठी सांगलीमध्ये अखिल भारतीय किसान सभेच्यावतीने आंदोलन करण्यात आले.जिल्हाधिकारी कार्यालयासमोर निदर्शने करत महाराष्ट्रातल्या पूरग्रस्त शेतकऱ्यांना एकरी 50 हजार रुपयांची मदत द्यावी जनावरांसाठी एक लाख रुपयांची तरतूद करावी आणि शेतमजुरांना देखील नुकसान भरपाई द्यावी,अशी मागणी अखिल भारतीय किसान सभेच्या वतीने यावेळी करण्यात आली आहे.तसेच राज्य सरकारकडून पूरग्रस्तांसाठी देण्यात आलेले पॅकेज फसवे असल्याचा आरोप देखील यावेळी करण्यात आला.

कोकणातील ग्रामीण भागात बिबट्याचा वावर वाढला 

कोकणातील ग्रामीण भागात बिबट्याचा वावर वाढत आहे. गणपतीपुळे जवळच्या मालगुंड गावात दिवसाढवळ्या बिबट्याचा वावर आढळून आला आहे. धावडेवाडी भागात या बिबट्याचा वावर असल्याने नागरीकांमध्ये काळजीचं वातावरण आहे

ओबीसींच्या मानेवर सरकारकडून सुरा - विजय वडेट्टीवार 

नागपुरात ओबीसी मोर्चाचं आयोजन करण्यात आलं असून यात विजय वडेट्टीवार यांनी हल्लाबोल केला. यात ते म्हणाले सरकारने ओबीसींचा हक्क सुरक्षित ठेवावा. सरकारकडून ओबीसींच्या मानेवर सुरा चालवण्याचं काम होत आहे. 

चिपी विमानतळावरील विमानसेवा डिसेंबरपासून सुरु

चिपी विमानतळावरील विमानसेवा डिसेंबरपासून सुरु होणार असल्याची माहिती सिंधुदुर्गचे पालकमंत्री नितेश राणेंनी घोषणा केलीये. मुख्यमंत्री देवेंद्र फडणवीसांमुळे व्हीजेएफला परवानगी मिळाल्याने उडानाचा मार्ग मोकळा झाला असून डिसेंबरपासून दिवस रात्र विमानसेवा सुरू होणार असल्याचं मंत्री नितेश राणेंनी म्हटलंय.

कोल्हापूरच्या वसतिगृहातील एका विद्यार्थ्याला काही विद्यार्थ्यांकडून बेदम मारहाण

कोल्हापूरच्या वसतिगृहातील एका विद्यार्थ्याला काही विद्यार्थ्यांकडून बेदम मारहाण करण्यात आली. कोल्हापूरच्या तळसंदे येथील हा धक्कादायक प्रकार आहे. या मारहाणीत सिद्धीविनायक मोहिते नावाचा विद्यार्थी जखमी झालाय. त्याच्यावर रुग्णालयात उपचार सुरु आहेत. विद्यार्थ्याला मारहाण करतानाचा व्हिडीओ सोशल मीडियावर व्हायरल झालाय. याप्रकरणानंतर मनसे विद्यार्थी सेना आक्रमक झालीय. व्हायरल व्हिडिओबाबत जिल्हा प्रशासन आणि शाळा प्रशासनाला जाब विचारून तीव्र आंदोलन छेडणार. असा इशारा मनसेकडून देण्यात आला.

ग्राहकांसाठी दिलासादायक बातमी, सोन्याच्या दरात मोठी घसरण 

जळगावच्या सराफ बाजारामध्ये सोन्याच्या दरात महिनाभरात पहिल्यांदाच मोठी घसरण झाली आहे. जळगावच्या सराफ बाजारामध्ये सोन्याच्या दरामध्ये 1 हजार 800 रुपयांची घसरण झाली आहे. सोन्याचे दर विना जीएसटी 1 लाख 21 हजार रुपयांवर आले आहेत. तब्बल महिनाभरापासून सोन्याच्या दरामध्ये सातत्याने वाढ होत असल्याचे चित्र पाहायला मिळत आहे. सोन्याच्या दरात मोठी घसरण झाल्यामुळे दिवाळीच्या मुहूर्तावर सोने खरेदी करणाऱ्या ग्राहकांना काही प्रमाणात दिलासा मिळाला आहे..

वीज कर्मचाऱ्यांचा संप मागे

वीज कर्मचाऱ्यांचा संप मागे.  वीज कर्मचाऱ्यांनी पुकारला होता 72 तासांचा संप.  मात्र, सरकारनं वाटाघाटी करण्यासंदर्भात अनुकूलता दाखवल्याने 24 तासांनंतर संप स्थगित. आपल्या मागण्यांसदर्भात 14, 15 आॅक्टोबर रोजी सरकारसोबत कर्मचाऱ्यांची चर्चा पार पडणार.

राज ठाकरे-फडणवीस उद्या एका मंचावर येणार

राज ठाकरे-फडणवीस उद्या एका मंचावर येणार. सिनेमा ट्रेलर लाँच सोहळ्यावेळी एकत्र येणार. महेश मांजरेकर यांच्या सिनेमा ट्रेलर लाँचवेळी एकत्र येणार. पुन्हा शिवाजीराजे भोसले याजसाठी केला होता अट्टहास चित्रपटाचा ट्रेलर.

नागपुरात ओबीसी समाजाचा आरक्षण बचाव महामोर्चा सुरु

राज्य सरकारने 2 सप्टेंबरला काढलेल्या हैदराबाद गॅझेटियर जीआरनंतर ओबीसी समाजात अस्वस्थता आहे. हा जीआर रद्द करावा या मागणीसाठी नागपुरात सकल ओबीसी समाजाचा आरक्षण बचाव महामोर्चा सुरु झाला आहे.

भूषण गवईंवर झालेल्या हल्ल्याचा निषेध, अंधारे पोलीस स्टेशनमध्ये

सर्वोच्च न्यायाधीश भूषण गवईंवर झालेल्या हल्ल्याचा ठाकरेंच्या शिवसेनेच्या उपनेत्या सुषमा अंधारेंकडून निषेध व्यक्त करण्यात आला. पुण्यातील विश्रांतवाडी पोलीस स्टेशनमध्ये अंधारेंसह अनेक सामाजिक कार्यकर्ते पोलीस स्टेशनमध्ये जमले होते. हल्लेखोरांवर गुन्हा दाखल करण्याची मागणी करण्यात आली. मात्र आम्ही तुमची तक्रार घेऊ शकत नाही वरिष्ठांशी परवानगी घेऊ. असं पोलीस म्हणाले. तर गुन्हा दाखल करण्यासाठी आम्ही तुमच्या पाया पडू का? असा सवाल अंधारेंनी केला.

मुख्यमंत्री देवेंद्र फडणवीस नाशिकमध्ये दाखल

मुख्यमंत्री देवेंद्र फडणवीस नाशिकमध्ये दाखल झाले आहेत. ते उत्तर महाराष्ट्राचा आढावा घेणार आहेत. मुख्यमंत्री देवेंद्र फडणवीस यांच्यासह प्रदेशाध्यक्ष रवींद्र चव्हाण, मंत्री चंद्रशेखर बावनकुळे गिरीश महाजन पंकजा मुंडे जयकुमार रावल उपस्थित आहेत. आगामी स्थानिक स्वराज्य संस्थेच्या निवडणुकीच्या पार्श्वभूमीवर मुख्यमंत्री देवेंद्र फडणवीस उत्तर महाराष्ट्राचा आढावा घेऊन पदाधिकाऱ्यांना देणार सूचना.

BCCI अध्यक्ष मिथुन मन्हासला डेट करते वीरेंद्र सेहवागची पत्नी आरती? Viral Photo मुळे खळबळ!

 

BCCI अध्यक्ष मिथुन मन्हासला डेट करते वीरेंद्र सेहवागची पत्नी आरती? Viral Photo मुळे खळबळ! https://t.co/rQDA0MF33g#bccipresident #BCCI #MithunManhas #virendersehwag #AartiSehwag #viralpost

— ZEE २४ तास (@zee24taasnews) October 10, 2025

मराठी चित्रपटांना प्राधान्य मिळण्यासाठी महाराष्ट्र सरकारचा मोठा निर्णय

चित्रपटगृहामध्ये मराठी चित्रपटांना प्राधान्य मिळण्यासाठी महाराष्ट्र शासनाकडून समितीची स्थापना. अपर मुख्य सचिव यांच्या अध्यक्षतेखाली 21 सदस्यांची समिती स्थापन. समितीत उच्चस्तरीय अधिकाऱ्यांसोबतच, महेश मांजरेकर, सुशांत शेलार, अमेय खोपकर आधी चित्रपट सृष्टीशी निगडित प्रतिनिधींचा समावेश. पुढील 45 दिवसात याबाबतचा अहवाल समितीने सरकार पुढे सादर करण्याचे आदेश.

कल्याणमधील पदाधिकाऱ्यांचा शिवसेना UBTमध्ये पक्षप्रवेश

कल्याणमधील अनेक पदाधिकाऱ्यांनी शिवसेना UBT मध्ये पक्षप्रवेश केला आहे. यावेळी बोलताना उद्धव ठाकरे म्हणाले की, सत्ताधाऱ्यांना सध्या प्रसिद्धीचं वेड लागलं आहे. कामं केली तर प्रसिद्धीची गरज पडत नाही असं उद्धव ठाकरे यांनी म्हटलं आहे. 

जालन्यात धनगर समाजाची आज राज्यस्तरीय बैठक

धनगर समाजाची आज राज्य स्तरीय बैठक होणार आहे. जालना शहरातील मुक्तेश्वर लॉन्स या ठिकाणी दुपारी 1 वाजता ही बैठक आयोजित करण्यात आलीये. या बैठकीत आंदोलनाची पुढील दिशा ठरवण्यात येणार आहे. त्यानंतर दुपारी साडेतीनवाजता धनगर आंदोलक दीपक बो-हाडे यांची पत्रकार परिषद होणार आहे.

'पक्ष सोडण्यासाठी 100 कोटी मिळतात'- संजय राऊत

मंत्री बाबासाहेब पाटील यांच्या वादग्रस्त विधानावरुन संजय राऊतांनी हल्लाबोल केलाय. पक्ष सोडण्यासाठी नेत्यांना शंभर कोटी मिळतात. तसे शेतक-यांना 100 कोटी मिळाले तर शेतकरी कर्जमाफी मागणार नाहीत अशा शब्दांत राऊतांनी निशाणा साधलाय. 

योगेश कदम एकनाथ शिंदेंच्या भेटीला 

उच्च पदावरच्या व्यक्तीच्या सांगण्यावरुन योगेश कदमांनी बंदूक परवान्यासाठी शिफारसपत्र दिलं असा खळबळजनक खुलासा रामदास कदमांनी केलाय. तर राम शिंदेंच्या सांगण्यावरुन योगेश कदमांनी शिफारसपत्र दिलं असावं असा आरोप रोहित पवारांनी केला आहे. 

शेतकरी संकटात असताना माणिकराव कोकाटे सरकारी पैशांने दुबई दौऱ्यावरhttps://t.co/zwLuYIcxiY

— ZEE २४ तास (@zee24taasnews) October 10, 2025

क्रीडामंत्री माणिकराव कोकाटे परदेश दौऱ्यावर

अतिवृष्टीमुळे लाखो हेक्टर शेती बाधित झाल्याने शेतकऱ्यांचे जीवन उद्ध्वस्त झालेले असताना, क्रीडा संकुलांचा अभ्यास करण्यासाठी राज्याच्या क्रीडा व युवक कल्याण खात्याचे मंत्री माणिकराव कोकाटे अधिकाऱ्यांसह दुबई तसेच कतारच्या दौऱ्यावर रवाना झाले आहेत. धक्कादायक बाब म्हणजे या दौऱ्यासाठी जो काही खर्च येणार आहे तो पुण्यातील शिवछत्रपती क्रीडा संकुलाच्या सोयीसुविधांच्या वापरापोटी जमा होणाऱ्या निधीतून भागविण्यात येणार आहे. विशेष म्हणजे, या संदर्भातील शासन निर्णय शालेय शिक्षण व क्रीडा विभागाकडून काढण्यात आला असला तरी तो राज्य सरकारच्या अधिकृत संकेतस्थळावर प्रसिद्ध करण्यात आलेला नाही. क्रीडा खात्यातही याबाबत कमालीची गुप्तता पाळण्यात आलीय. त्यामुळे या दौऱ्याच्या वेळेवर आणि नैतिकतेवर प्रश्नचिन्ह निर्माण झाले आहे

लोकांना कर्जमाफीचा नाद लागलाय-बाबासाहेब पाटील

राज्याचे सहकार मंत्री आणि राष्ट्रवादीचे नेते बाबासाहेब पाटील यांनी कर्जमाफीबाबत केलेल्या वक्तव्याने वाद निर्माण होण्याची शक्यता आहे. लोकांना कर्जमाफीचा नाद लागलाय असं म्हणत त्यांनी शेतक-यांच्या जखमेवर मीठ चोळलंय. निवडणुकीत निवडून येण्यासाठी आश्वासने द्यावी लागतात असंही त्यांनी म्हटलंय. कर्जमाफी हा शेतकऱ्यांसाठी एक महत्त्वाचा आणि संवेदनशील मुद्दा आहे. नैसर्गिक आपत्ती आणि इतर कारणांमुळे संकटात सापडलेल्या शेतकऱ्यांना कर्जमाफीमुळे दिलासा मिळतो. मात्र अशा वक्तव्यांमुळे शेतक-यांमध्ये नाराजी आहे. याआधी अजित पवारांच्या पक्षाचे नेते आणि माजी कृषिमंत्री माणिकराव कोकाटे यांनी शेतक-यांबाबत वादग्रस्त वक्तव्य केली होती. त्यामुळे त्यांना कृषिमंत्रीपदही गमवावं लागलं. आता बाबासाहेब पाटील यांच्या विधानानं विरोधकांना सत्ताधा-यांना घेरण्याची संधी मिळालीय.. 

नाशिक सरकारवाडा गोळीबार प्रकरणी पोलिसांची मोठी कारवाई

नुकताच ठाकरे गटातून भाजपमध्ये प्रवेश केलेला मामा राजवाडे याला पोलिसांनी अटक केली आहे. मुख्यमंत्री देवेंद्र फडणवीसांच्या नाशिक दौऱ्याच्या पार्श्वभूमीवर पोलिसांची जलद हालचाल. गोळीबार प्रकरणातील मोठा मामा राजवाडे अखेर पोलिसांच्या जाळ्यात. शहरातील गुन्हेगारीविरोधात पोलिसांचे निर्णायक पाऊल.

गँगस्टर निलेश घायवळच्या पासपोर्ट चा आज फैसला

घायवळचा पासपोर्ट रद्द व्हावा, यासाठी पुणे पोलिसांचा कोर्टात अर्ज. आज पुणे कोर्टात घायवळच्या पासपोर्टवर सुनावणी. घायवळने बनावट आधार कार्ड आणि नगरचा फेक पत्ता दाखवून पासपोर्ट काढल्याचा पोलिसांचा आरोप. कोथरूड पोलिसात घायवळ विरोधात रितसर गुन्हा दाखल.पुणे पासपोर्ट विभागाला पुणे पोलिसांकडून घायवळ पासपोर्ट प्रकरणी सर्व कागदपत्रे सादर करण्याचे निर्देश.

एसटीची नवी योजना! 60 दिवसांचे पैसे द्या अन् 90 दिवस प्रवास करा, वाचा संपूर्ण माहितीhttps://t.co/stYQRFzWJS

— ZEE २४ तास (@zee24taasnews) October 10, 2025

रक्षा खडसेंच्या मालकीच्या पेट्रोल पंपावर दरोडा 

केंद्रीय राज्यमंत्री रक्षा खडसे यांच्या मालकीच्या पेट्रोल पंपावर दरोड्याची घटना घडलीय. मुक्ताईनगर तालुक्यातल्या तळवेल गावाजवळ असलेल्या पंपावर 5 दरोडेखोरांनी सशस्त्र दरोडा टाकला होता. बंदुकीचा धाक दाखवून त्यांनी लाखोंचा ऐवज पळवला. घटनेची माहिती मिळताच पोलीस पेट्रोल पंपावर दाखल झाले मात्र पोलिसांची चाहूल लागताच दरोडेखोर दुचाकी घेऊन पसार झाले. पोलिसांनी सिनेस्टाईल पाठलाग करत तीन दरोडेखोरांना ताब्यात घेतलं असून दोन दरोडेखोर मात्र पसार झाले आहेत. या घटनेमुळे मुक्ताईनगरमध्ये एकच खळबळ उडाली आहे.

मराठा-कुणबी जीआरमुळे ओबीसी समाज रस्त्यावर

राज्य सरकारने 2 सप्टेंबरला काढलेल्या हैदराबाद गॅझेटियर जीआरनंतर ओबीसी समाजात अस्वस्थता आहे. हा जीआर रद्द करावा या मागणीसाठी नागपुरात सकल ओबीसी समाजाचा आरक्षण बचाव महामोर्चा निघणार आहे. या मोर्चात ओबीसी संघटनांसह ओबीसी समाज मोठ्या संख्यने सहभागी होणार आहे. दुपारी 12 वाजता नागपुरातील यशवंत स्टेडियम येथून हा मोर्चा निघेल. तर संविधान चौकात जाहीर सभेनंतर मोर्चाची सांगता होईल.

संभाजीनगरात मित्रानेच केली मित्राची हत्या, प्रेमप्रकरणाच्या वादातून चाकून भोसकून संपवलं 

संभाजीनगरच्या वाळूजमध्ये मैत्रीच्या नात्याला काळिमा फासणारी घटना घडली. लहानपणापासून सोबत वाढलेल्या जिवलग मित्रानेच 22 वर्षीय तरुणाला धारदार चाकूने भोसकून त्याचा खून केला. प्रेमप्रकरणातून निर्माण झालेल्या वैमनस्यामुळे घडलेल्या या घटनेनंतर परिसरात मोठी खळबळ उडाली असून, वाळूज पोलिसांनी अवघ्या काही तासांत आरोपींना परभणी शहरातून अटक केली. वाळूज-लांजी रोड येथील शिवराई स्मशानभूमीसमोच्या गल्लीत राहणारा प्रथमेश गायकवाड हा बुधवारी रात्री जेवण करून बाहेर गेला. गल्लीतील सुजित देवघाटोळे आणि विकास मनाळ या मित्रांसोबत तो लांजी रोडवरील बंद दुकानासमोर गप्पा मारत होता. दरम्यान, रितेश नरवडे आणि त्याचा साथीदार सुकासे  हे दुचाकीवर आले. रितेश काही काळ प्रथमेशसोबत बोलला. अचानक त्याने धारदार चाकू काढून प्रथमेशच्या बरगडीत भोसकले. प्रथमेश रक्ताच्या थारोळ्यात कोसळला.

राज्यातील धरणक्षेत्रात रंगणार दारुपार्टी, धरणक्षेत्रात पर्यटनस्थळी मद्यविक्रीला परवानगी

राज्यातील धरणक्षेत्रातील पर्यटन स्थळांवर आता दारुपार्ट्या रंगणार आहेत... धरण क्षेत्रातील पर्यटनस्थळांवर मद्यविक्री आणि मद्यसेवनाला परवानगी देण्यात आलीये... जलसंपदा विभागाने याबाबत शासन निर्णय जारी केलाय..च राज्यात जलसंपदा विभागाअंतर्गत १३८ मोठे आणि २५५ मध्यम तसंच २ हजार ८६२ लघु पाटबंधारे, असे एकूण ३ हजार २५५ प्रकल्प आहेत. बहुतांश धरणे डोंगर- द-यांमध्ये निसर्गरम्य ठिकाणी आहेत. महत्त्वाच्या १४६ महत्त्वाच्या ठिकाणी विभागाची विश्रामगृहे आहेत. त्यासह जलाशयांच्या जवळ पर्यटनक्षम विश्रांतीगृहे, निरीक्षण बंगले, निरीक्षण कुटी अथवा वसाहती आणि कर्मचा-यांच्या वसाहती आहेत. पण, कमी मनुष्यबळ आणि देखभाल, दुरुस्ती अभावी ही सर्व मालमत्ता नादुरुस्त असून, विना वापर पडून आहेत.. या मालमत्तांचा व्यवसायीक विकास व्हावा, संरक्षण व्हावे आणि सरकारला महसूल मिळावा, तसच अवैध मद्य विक्रीला आळा बसावा यासाठी या ठिकाणी मद्यविक्रीला परवानगी देण्यात आलीये. 

नागपूरमध्ये आज ओबीसी महामोर्चाचं आयोजन

नागपूरमध्ये आज ओबीसी महामोर्चाचं आयोजन, 2 सप्टेंबरचा जीआर रद्द करण्याची मागणी, विजय वडेट्टीवारांच्या नेतृत्वात ओबीसी बांधव एकवटणार. 

पुण्यातील भोर नगरपालिकेसाठी चौरंगी लढतीची शक्यता

भोर नगरपालिकेच्या सार्वत्रिक निवडणुकीसाठी 20 सदस्यांच्या आरक्षणाची सोडत प्रांताधिकारी आणि मुख्याधिकारी यांच्या उपस्थितीत काढण्यात आली. 10 प्रभागांत प्रत्येकी 2 नगरसेवक असतील. अनुसूचित जाती-जमातींसाठी 2 जागा राखीव असून, 1 महिला व 1 पुरुषाचा समावेश असेल. यावेळी दोन जागा वाढल्याने चुरस वाढली आहे. स्थानिक पातळीवर सर्वच पक्ष उमेदवार देणार असल्याने चौरंगी लढत होणार असल्याची शक्यता आहे.

कात्रज-देहूरोड बायपासवर अवजड वाहनांना बंदी 

कात्रज देहू रोडवर अवजड वाहनांच्या वाहतुकीवर निर्बंध लावण्याचा आदेश जिल्हाधिकारी यांनी जारी केला आहे. 15 ऑक्टोबरपासून सकाळी 8 ते 11 वाजेपर्यंत कात्रजकडून किवळ्याकडे आणि सायंकाळी 5 ते 9 वाजेपर्यंत किवळेकडून कात्रजकडे अवजड वाहनांना बंदी असेल. सातारा, सांगली, कोल्हापूरकडून येणारी वाहने शिंदेवाडी टोलनाक्यापुढे थांबवली जातील. मात्र, अत्यावश्यक सेवेतील वाहनांना या बंदीचा अपवाद असेल. आदेशाची काटेकोर अंमलबजावणी केली जाणार आहे.

पुण्यात अनधिकृत होर्डिंगवर पालिकेची धडक कारवाई

पुण्यात अनधिकृत होर्डिंगवर पालिकेची धडक कारवाई. पुणे महानगरपालिकेकडून शहराचे विद्रूपीकरण करणाऱ्या अनधिकृत फलक, बॅनर आणि होर्डिंगविरोधात मोठी कारवाई सुरू आहे.71 जणांविरोधात पोलिसांना गुन्हे दाखल करण्याचे पत्र देण्यात आले असून, 27 प्रकरणांत गुन्हे नोंदवले गेले आहेत. गेल्या चार-पाच दिवसांत पाच हजारांहून अधिक बेकायदा फलक हटवण्यात आले.