अबू आझमींना 100% जेलमध्ये टाकीन! फडणवीसांनी संतापून 'हिंमत आहे का?' म्हणत विचारले, 'नेहरुंनी...'

फडणवीसांनी व्यक्त केला संताप

CM Devendra Fadnavis Angry: समाजवादी पार्टीचे आमदार अबू आझमी यांना महाराष्ट्राच्या अर्थसंकल्पीय अधिवेशन संपेपर्यंत निलंबित करण्यात आल्याचा निर्णय घेण्यात आला आहे. विधानसभेमध्ये एकमताने हा निर्णय घेण्यात आला आहे. मात्र त्यापूर्वी विधानसभा आणि विधानपरिषदेत झालेल्या चर्चेदरम्यान मुख्यमंत्री देवेंद्र फडणवीसांनी आक्रमक भूमिका घेत विरोधकांना निवड टीका करु नका असं सुनावत थेट माजी पंतप्रधान जवाहरलाल नेहरुंचा उल्लेख करत निशाणा साधला. 

Add Zee News as a Preferred Source

अबू आझमींना जेलमध्ये टाकणार

अबू आझमींनी केलेल्या विधानावरुन विधानपरिषदेमध्ये विरोधी पक्षातील आमदारांनी अबू आझमींच्या अटकेची मागणी केली. या विषयावर उत्तर देण्यासाठी उभे राहिलेले मुख्यमंत्री देवेंद्र फडणवीस यांनी, "सभापती मोहोदय जेलमध्ये टाकीन. 100 टक्के टाकू," असं अगदी मोठ्या आवाजात सांगितलं.

आव्हाडांच्या त्या विधानाचा फडणवीसांनी घेतला समाचार

पुढे बोलताना मुख्यमंत्री फडणवीसांनी विरोधकांच्या बाकावर बसलेल्या आमदारांना उद्देशून, "तुम्ही नीट माहिती घेतली असती तर बरं झालं असतं. त्या कोरटकरने न्यायालयाकडून अटकेपासून संरक्षण मिळवलं आहे. मात्र मी त्याच्यावर जायला सांगितलं आहे. मला सांगा जितेंद्र आव्हाड काय बोलले त्यावर तुम्ही कधी निषेध केला नाही. जितेंद्र आव्हाड या ठिकाणी म्हणतात की, औरंगजेब होता म्हणून छत्रपती शिवाजी महाराज होते. औरंगजेब किती बलाढ्या होता. महाराज पाच फुटाचे होते, हे रेकॉर्डवर बोलले. तेव्हा नाही निषेध केला तुम्ही. असा सिलेक्टीव्ह निषेध करु नका. तेव्हा तुम्ही निषेध नाही केला," असं म्हणत सुनावलं.

पंडित जवाहरलाल नेहरुंच्या 'त्या' लिखाणाचा निषेध करणार का?

इतक्यावरच न थांबता मुख्यमंत्री फडणवीस यांनी माजी पंतप्रधान जवहारलाल नेहरुंच्या  'डिस्कव्हरी ऑफ इंडिया' या पुस्तकाचा उल्लेख करत त्यामधील माहितीला निषेध विरोधक करणार आहेत का? असा सवाल उपस्थित केला. "पंडित जवाहरलाल नेहरुंनी 'डिस्कव्हरी ऑफ इंडिया'मध्ये छत्रपती शिवाजी महाराजांबद्दल जे लिहिलं आहे त्याचा निषेध करणार आहात का? आहे हिंमत? आहे का हिंमत? आहे का हिंमत तुमच्यामध्ये? आम्ही या ठिकाणी छत्रपती संभाजी महाराजांचा अपमान सहन करणार नाही. देश धर्म पर मिटने वाला, शेर शिवा का छावा था! महा पराक्रमी परम प्रतापी, एक ही शंभू राजा था!" असं मुख्यमंत्री फडणवीस यांनी संतापून म्हटलं.

सभागृह 10 मिनिटांसाठी तहकूब

यादरम्यान विरोधक आणि सत्ताधारी आमदारांनी गोंधळ सुरु केल्याने अध्यक्ष रामराजे शिंदेंनी सभागृह 10 मिनिटांसाठी तहकूब केलं.