Mumbai News : मुंबईतील ईडी कार्यालयात लागलेली आग जवळपास 10 तासांनंतर विझवण्यात आली. या आगीत मेहूल चोक्सी, नीरव मोदी, भुजबळ प्रकरणांच्या फाईल जळाल्याची शक्यता वर्तवण्यात येत आहे.
)
ओम देशमुख, झी मीडिया, मुंबई : (Mumbai ED Office Fire) कैक महत्त्वाच्या प्रकरणांचे पुरावे असणाऱ्या आणि आतापर्यंत अनेक मोठ्या प्रकरणांच्या चौकशीसत्रांसाठीच्या महत्त्वाच्या स्थळांपैकी एक असणाऱ्या ईडी कार्यालयासंदर्भातील मोठी माहिती समोर आली आहे. गेल्या काही वर्षांपासून महाराष्ट्राचं राजकारण ईडी चौकशीच्या तपासाभोवती फिरतंय. अशातच रविवारी पहाटे मुंबईत ईडीच्या ऑफिसला आग लागली. या आगीत मोठं नुकसान झालंय. मात्र या आगीत महत्त्वाच्या फाईल्स जळाल्याची शक्यता आहे. मेहूल चोक्सी, नीरव मोदी, छगन भुजबळ प्रकरणासह महत्त्वाच्या फाईलचा समावेश असल्याची चर्चा आहे. या आगीमुळे ईडीच्या तपासात अडखळा येण्याची शक्यता आहे.
रविवारी रात्री लागलेल्या आगीत ईडी ऑफिसच्या चौथ्या मजल्यावर असलेल्या मालमत्तेचं मोठ्या प्रमाणात नुकसान झालं आहे. यामध्ये काही महत्त्वाच्या फाईल आणि इलेक्ट्रॉनिक उपकरणं जळाल्याचंही बोललं जात आहे. ईडीने अद्याप याबाबत कुठलीही अधिकृत माहिती किंवा तक्रार पोलिसात दाखल केली नसल्याचे देखील माहिती समोर आली आहे.
मुंबईतील अंमलबजावणी संचालनालयाच्या (ईडी) कार्यालयात रविवारी सकाळी 11 वाजण्याच्या सुमारास लागलेल्या आगीत मेहुल चोक्सी, नीरव मोदी आणि छगन भुजबळ यांच्या प्रकरणांशी संबंधित महत्त्वाच्या फाईल आगीत जळून खाक झाल्याची भीती व्यक्त केली जात आहे. ही आग सुमारे 10 तासांनंतर रात्री 9 वाजता आग आटोक्यात आली. आग विझवण्यासाठी मुंबई अग्निशमन दलाच्या 10 गाड्या आणि 100 कर्मचाऱ्यांनी अथक प्रयत्न केल्याचं सांगितलं जातं. सदर प्रकरणात विशेष चौकशी सुरू असून, नेमक्या कोणत्या फाईल जळाल्या याची माहिती समोर आली नसून, ईडीनं अनेक कारवाया आणि चौकशांचं डिडिटलायजेशन केल्यानं मोठं नुकसान झालं नसल्याची शक्यतासुद्धा व्यक्त केली जात आहे. मात्र ज्या चौकशांचं डिजिटलायजेशन झालं नाही त्या पुराव्यांचं काय? हाच प्रश्न इथं उपस्थित केला जात आहे.
दरम्यान, ईडीच्या मुंबई कार्यालयात लागलेल्या आगीमुळे चौथ्या मजल्यावरील कार्यालयाचं मोठे नुकसान झालं असं सांगण्यात येत आले. इथं मेहुल चोक्सी आणि नीरव मोदी यांच्यावरील पंजाब नॅशनल बँक (पीएनबी) गैरव्यवहार प्रकरण (14000 कोटी रुपये) आणि छगन भुजबळ यांच्यावरील महाराष्ट्र सदन घोटाळा तसेच मनी लाँडरिंग प्रकरणांच्या फायली याच कार्यालयात होत्या. आगीचे कारण अद्याप अस्पष्ट असून, शॉर्ट सर्किटची शक्यता वर्तवली जात आहे. आगीमुळ झालेल्या नुकसानामुळे तपासात अडथळा येण्याची शक्यता आहे, कारण काही कागदपत्रे डिजिटल स्वरूपात उपलब्ध नसतील. यापूर्वी 2018 मध्येही आयकर विभागाच्या कार्यालयात लागलेल्या आगीत चोक्सी, मोदी आणि विजय माल्या यांच्या फाईल जळाल्या होत्या.
