नाशकात 100, 200 रुपयांत कपल्सला कोपरे उपलब्ध करून देणाऱ्या कॅफेवर धाड!

Nashik Crime News: नाशिक शहरात गंगापूर रोड सारख्या उच्चभ्रु वस्तीत विद्याविकास सर्कल परिसरामध्ये एका कॅफेमध्ये आमदार देवयानी फरांदे यांनी छापा टाकला. या ठिकाणी तरुण-तरुणी गैरप्रकार करत असल्याची माहिती देवयानी फरांदे यांना मिळाली होती. त्यानंतर देवयानी फरांदे यांनी थेट या कॅफेवर छापा टाकला. यावेळी काही तरुण-तरुणी यांना देखील ताब्यात घेण्यात आले असून या प्रकारामुळे नाशिक शहरात चांगलीच खळबळ उडाली आहे.

Add Zee News as a Preferred Source

नाशिकसारख्या धार्मिक शहरात असे अनेक गैरप्रकार सुरु आहेत. कॅफेच्या माध्यमातून तरुण-तरुणींना गैरप्रकार करण्यासाठी जागा उपलब्ध करुन दिली जात असल्याची माहिती समोर आली. यानंतर माहिती मिळताच आमदार देवयानी फरांदे यांच्या कार्यकर्त्यांनी त्यांना या कॅफे प्रकरणी ही माहिती दिली होती. त्यानंतर घटनेचे गांभीर्य ओळखून देवयानी फरांदे यांनी थेट धडक कारवाई करण्याचे ठरविले. अचानक कॅफेवर छापा टाकताच कॅफेमध्ये सुरु असलेले प्रकार पाहून त्यांना देखील मोठा धक्का बसला. आमदार पोहचल्याचे कळताच पोलीसही त्या ठिकाणी दाखल झाले.

100 ते 200 रुपयांमध्ये रूम उपलब्ध

कॅफे उघडून त्या ठिकाणी मुला-मुलींना प्रवेश दिला जात होता. तर काही कॅफेमध्ये तासांनुसार दर घेतले जात होते. या कॅफेमध्ये अंधार करुन काळे पडदे लावले जात होते. नाशिकमध्ये मोगली नामक कॅफेत हा गैरप्रकार सुरु असल्याची माहिती आमदार देवयानी फरांदे यांना मिळाली होती. त्यानंतर त्यांनी स्वतः त्या ठिकाणी जावून छापा टाकत ही कारवाई केली. त्यावेळी तरुण मुला मुलींना सुमारे 100 ते 200 रुपयांमध्ये रूम उपलब्ध करुन दिला जात असल्याची धक्कादायक माहिती त्यांना मिळाली. यावेळी पोलिसांनी कॅफेमधील अनेक मुला मुलींना अश्लील चाळे करताना ताब्यात घेतले. याप्रकरणी गुन्हा दाखल करण्यात येणार असून अशाच प्रकारे आणखी काही कॅफेवर कारवाई होण्याची शक्यता आहे.

या घटनेमुळे सध्या नाशिक शहरात नेमकं काय सुरु आहे. असा प्रश्न नागरिकांच्या मनात आहे. या प्रकरणी आता कॅफेचालकांवर पोलिस काय करवाई करणार हे पाहावे लागेल. तर सध्या ताब्यात घेतलेल्या मुला-मुलींना त्यांच्या पालकांना बोलवून समज देण्यात येणार आहे.