फराह खानचा कुक दिलीप पहिल्यांदाच इंटरनॅशनल ट्रिपवर; विमानतळावर वाटली मिठाई!

कोरिओग्राफर-दिग्दर्शिका फराह खान आपल्या यूट्यूब चॅनलमुळे नेहमीच चर्चेत असते. तिच्या व्हिडिओंमध्ये ती तिचा खास स्वयंपाकी दिलीपसोबत धमाल मस्ती करताना दिसते.

फराहची आणि दिलीपची मजेशीर केमिस्ट्री प्रेक्षकांच्या विशेष पसंतीस उतरली आहे. गेल्या काही महिन्यांत दिलीपची लोकप्रियता लक्षणीयरित्या वाढली आहे आणि यामुळेच तो प्रचंड आनंदी आहे.

आता त्याच्या आयुष्यात आणखी एक खास क्षण आला आहे. दिलीप पहिल्यांदाच आंतरराष्ट्रीय सहलीला रवाना झाला आहे.

अलिकडेच दिलीप फराह खानसोबत मुंबई विमानतळावर दिसला. तिथे उपस्थित असलेल्या पापाराझींनी त्याला आपल्या कॅमेऱ्यात टिपलं.

दिलीपच्या चेहऱ्यावर आनंद होता आणि त्याने फराहसोबत पापाराझींना मिठाई वाटली. त्यावेळी त्याची नेहमीची मजेशीर स्टाईलही दिसून आली.

फराह आणि दिलीप यांचे हे फोटो आणि व्हिडीओ सध्या सोशल मीडियावर जोरदार व्हायरल होत आहेत. चाहते त्यावर कौतुकाचे आणि प्रेमाने भरलेले कमेंट्स करत आहेत.

फराह खानच्या साध्या आणि गोड वागणुकीने अनेक नेटकरी भारावून गेले आहेत. काहींनी कमेंट करत लिहिलं, 'फराहने खरंच दिलीपला रस्त्यावरून उचलून स्टार बनवलं आहे.'

तर दुसऱ्या एका नेटकऱ्याने मजेशीर पद्धतीने लिहिलं, 'आता आपल्यालाही फराह खानसारखी व्यक्ती शोधावी लागेल, तेव्हाच इंटरनॅशनल ट्रिप शक्य होईल.'

फराह खानचे यूट्यूब चॅनल अल्पावधीतच लोकप्रिय झाले असून, तिला एका वर्षात 10 लाखांहून अधिक सबस्क्रायबर्स मिळाले आहेत.

तिच्या चॅनलवर अनेक लोकप्रिय सेलिब्रिटी येतात आणि मजेशीर किस्से शेअर करत विविध चविष्ट पदार्थ बनवतात.