वाढलेलं वजन हा जगभरातील अनेकांसाठी समस्या ठरत आहे.
अनेकांची इच्छा असूनही त्यांना वजन कमी करता येत नाही.
काही काळ टाएट किंवा जीम जॉइन केल्यानंतर अगदी आठवड्याभरात पुन्हा 'ये रे माझ्या मागल्या' म्हणत दैनंदिन आयुष्य सुरु होतं आणि वजन कमी करायचा उत्साह मावळतो.
मात्र आपले कर्मचारी सुदृढ असावेत या हेतूने एका कंपनीने कर्मचाऱ्यांचं वजन कमी करण्यासाठी एक खास ऑफर दिली आहे.
या कंपनीत काम करणाऱ्या कर्मचाऱ्यांनी वजन कमी केलं तर त्यांना कंपनीकडून भरपूर पैसे दिले जात आहेत.
समोर आलेल्या माहितीनुसार, वजन कमी केल्यावर कर्मचाऱ्यांना अधिक वेतन देणारी ही कंपनी चीनमधील गुआंग्डोंग प्रांतातील शेनजेन येथे आहे. या कंपनीचं नाव 'इन्स्टा 360' असं आहे.
कंपनीने वजन कमी करण्याची ही अनोखी अट ऐच्छिक ठेवली असून सहभागी लोकांचे तीन गट करण्यात आले आहेत. दर आठवड्याला त्यांच्या वजनाची नोंद ठेवली जाते.
ग्रुपमधल्या प्रत्येकाने अर्धा किलो वजन कमी केलं तर त्यांना प्रत्येकी 400 युआन म्हणजेच भारतीय चलनानुसार पाच हजार रुपये वेट लॉस बोनस म्हणून दिले जातात.
मात्र या उलट वजन वाढलं तर वेतनकपात किंवा 500 युआन दंडही भरावा लागतो.
कंपनीने ही योजना सुरु केल्यापासून कंपनीतील 150 लोकांनी एकूण 800 किलो वजन कमी केलं आहे.
(Disclaimer - वरील माहिती सामान्य संदर्भांवरून घेण्यात आली आहे. 'झी २४ तास' याची खातरजमा करत नाही. यामधून कोणत्याही प्रकारच्या उपचाराचा दावा केला गेलेला नाही. कुठलाही निर्णय घेण्याआधी आपल्या फॅमेली डॉक्टरांचा सल्ला घ्या.)