भारतातील रेल्वेचं जाळं हे जगातील चौथ्या क्रमांकाचं सर्वात मोठं रेल्वे नेटवर्क आहे.
भारतीय रेल्वेचा पसारा एवढा मोठा आहे की आज देशातील कानाकोपऱ्यात रेल्वे मार्ग पोहोचले आहेत.
भारतासारख्या मोठ्या देशामध्ये रेल्वे हा सर्वात स्वस्त सार्वजनिक वाहतुकीचा पर्याय आहे. त्यामुळेच रेल्वेचा वापर मोठ्या प्रमाणात केला जातो.
भारतात एकूण 7,349 रेल्वे स्थानकं आहेत.
मात्र भारतात असलेल्या या जवळपास साडेसात हजार रेल्वे स्थानकांपैकी सर्वात छोटं नाव असणारं रेल्वे स्थानक कोणतं हे तुम्हाला माहितीये का?
या रेल्वे स्थानकाच्या आजूबाजूला राहणाऱ्यांनाच याबद्दलची कल्पना आहे. मात्र बहुतांश भारतीयांना या प्रश्नाच उत्तर ठाऊक नाही.
भारतामधील सर्वात छोटं नाव असलेल्या रेल्वे स्थानकाच्या नावात दोनच अक्षरं आहेत.
आता तुम्हाला गोवा असं उत्तर वाटत असेल तर तुम्ही चुकत आहात कारण गोवा नावाचं कोणतंही रेल्वे स्थानक नाही.
देशातील सर्वात छोट्या नावाचं रेल्वे स्थानकाचं नाव 'ईब' असं आहे.
ओडिशामध्ये असलेल्या या रेल्वे स्थानकाचं इंग्रजीमध्ये नाव IB असं लिहिलं जातं.
ईब रेल्वे स्थानक हे नावाप्रमाणेच छोटसं आहे. या रेल्वे स्थानकावर दोनच प्लॅटफॉर्म आहेत.
1891 मध्ये हे स्थानक बांधण्यात आलं. या स्थानकापासून ईब नदी हाकेच्या अंतरावर असल्याने या स्थानकाला हे नाव देण्यात आलं.