चीनमध्ये अगदी काही दिवसांमध्ये मोठमोठ्या आकाराच्या इमारती, उड्डाण पूल उभारले जातात. यासंदर्भातील वेगवेगळे व्हिडीओ वेळोवेळी व्हायरल होत असतात.
मात्र असले व्हिडीओ पाहिल्यानंतर, बातम्या वाचल्यानंतर या देशातील मजूर नेमके किती तास काम करत असतील असा प्रश्न पडतो.
इमारत किंवा एखादी वास्तू उभी करण्याचा चीनमधील वेग पाहता असा प्रश्न पडणं सहाजिक आहे.
चीनमधील कामगार कायद्यानुसार रोजचे आठ तास किंवा आठवड्यातून 44 तासांपेक्षा अधिक वेळ मजुरांकडून काम करुन घेऊ नये असं सांगितलं जातं.
मात्र अनेक प्रसारमाध्यमांनी दिलेल्या बातम्यांनुसार, चीनमध्ये मजुरांकडून 12-12 तास काम करुन घेतलं जातं.
ओव्हर टाइम केल्यानंतरही चिनी मजुरांना त्याच्या देशात त्या कामाचा योग्य मोबदला दिला जात नाही.
चीनमधील राष्ट्रीय सांख्यिक ब्युरोने दिलेल्या माहितीनुसार, संपूर्ण देशाचा विचार केल्यास एप्रिलमध्ये चीनमधील मजुरांनी आठवड्याला 48.8 तास काम केलं आहे.
सर्वात वाईट परिस्थितीमध्ये काही चिनी मजूर दिवसातील 18 तासही काम करतात.
हा आकडा खरोखर कोणत्याही भारतीय कर्मचाऱ्यांना दिलासा देणार आहे. कारण भारतात एवढा काळ काम करुन घेतलं जात नाही.
चीनमध्ये ओव्हर टाइमचा कालावधी हा दिवसाला जास्तीत जास्त तीन तासांपर्यंत असावा असा नियम आहे.
मात्र महिन्याभरामध्ये कोणत्याही कर्मचाऱ्याला 36 तासांपेक्षा अधिक काळ ओव्हर टाइम करायला लागू नये असंही नियमांमध्ये सांगितलेलं आहे.