मानवी शरीराच्या क्षमतेला आव्हान देणारी सर्वात मोठी गोष्ट म्हणजे मॅरेथॉन रेस, असं मानलं जातं.
कोणतीही पूर्ण मॅरेथॉन म्हणजेच किमान 42 किलोमीटरचं अंतर पूर्ण करण्यासाठी प्रशिक्षित धावपटूंनाही विशेष तयारी करावी लागते.
एखादी साधी मॅरेथॉन धावाची तरी काही तास सतत पळावं लागतं.
त्यामुळे अनेकांना केवळ मॅरेथॉन पूर्ण करणं हे सुद्धा काहीतरी मिळवल्यासारखंच आनंद देणारं असतं.
पूर्ण मॅरेथॉन धावण्याचं स्वप्न उराशी बाळगणाऱ्यांना ती पूर्ण करण्यासाठी किती वेळ लागतो याच्याशी काही देणंघेणं नसतं.
मात्र तुम्हाला जाणून आश्चर्य वाटेल पण मॅरेथॉन पूर्ण करण्यासाठी लागलेली सर्वाधिक काळावधी हा 55 वर्षांचा आहे.
मॅरेथॉन पूर्ण करण्यासाठी 55 वर्षांचा वेळ लावण्याचा विक्रम जपानमधील शिंजो कानाकुरी यांच्या नावावर आहे. ते 54 वर्ष 8 महिने, 6 दिवस 5 तास 32 मिनिटं आणि 20.3 सेकंद मॅरेथॉन धावत होते.
स्वीडनमध्ये स्टॉकहोम्स येथे झालेल्या 1912 च्या मॅरेथॉनमध्ये शिंजो कानाकुरी यांनी कठीण परिस्थितीमुळे शर्यत अर्ध्यात सोडली. अधिकाऱ्यांना कोणतीही कल्पना न देता शिंजो शर्यतीमधून घरी निघून गेले.
शिंजो कानाकुरी यांनी 1916 आणि 1924 च्या ऑलिम्पिकमध्ये भाग घेतला. मात्र यावेळेस त्यांनी वेगळ्या शर्यतीमध्ये भाग घेतला होता.
1966 साली शिंजो कानाकुरी यांनी शर्यत पूर्ण करण्यासाठी आमंत्रित करण्यात आलं. 20 मार्च 1967 रोजी शिंजो कानाकुरी उर्वरित मॅरेथॉन धावले. त्यावेळेस त्यांनी मॅरेथॉन पूर्ण करण्यासाठी घेतलेला वेळ हा 5 दशकांहून अधिकचा गृहित धरण्यात आला.
शिंजो कानाकुरी यांचं 1983 साली निधन झालं. ते 92 वर्षांचे असताना त्यांनी अखेरचा श्वास घेतला. आजही मॅरेथॉन पूर्ण करण्यासाठी सर्वाधिक वेळ घेण्याचा विक्रम त्यांच्याच नावे आहे.