 "ஓய்வூதியம் அதிகரிப்பு! தமிழ்நாடு அரசு வெளியிட்ட குட் நியூஸ் - யாருக்கு தெரியுமா?")
Tamil Nadu Government : தமிழ்நாடு அரசின் இந்து சமய அறநிலையத்துறை, அதன் கட்டுப்பாட்டில் உள்ள திருக்கோயில்களில் பணிபுரிந்து ஓய்வுபெற்ற ஊழியர்களின் நீண்ட நாள் கோரிக்கையை ஏற்று, அவர்களின் ஓய்வூதியம் மற்றும் குடும்ப ஓய்வூதியத்தை கணிசமாக உயர்த்தி அரசாணை வெளியிட்டுள்ளது. இந்த அறிவிப்பு, ஆயிரக்கணக்கான ஓய்வூதியதாரர்கள் மற்றும் அவர்களின் குடும்பத்தினருக்கு ஒரு பெரிய மகிழ்ச்சியை கொடுத்துள்ளது.
2025-2026 ஆம் ஆண்டுக்கான மானியக் கோரிக்கை மீதான விவாதத்தின்போது, இந்து சமய அறநிலையத்துறை அமைச்சர் மாண்புமிகு சேகர்பாபு அவர்கள், சட்டமன்றப் பேரவையில் இந்த முக்கிய அறிவிப்பை வெளியிட்டார். அவர், "தற்போது ரூ.4,000/- ஓய்வூதியமாகப் பெறும் கோயில் பணியாளர்களுக்கு, அது ரூ.5,000/- ஆக உயர்த்தி வழங்கப்படும். அதேபோல, துறை நிலை குடும்ப ஓய்வூதியம் பெறும் குடும்பங்களுக்கு, தற்போது வழங்கப்படும் ரூ.2,000/- என்பது ரூ.2,500/- ஆக உயர்த்தி வழங்கப்படும்" என்று அறிவித்தார். அதற்கான அரசாணை இப்போது வெளியிடப்பட்டுள்ளது.
ஓய்வூதியம் உயர்வு
இந்த ஓய்வூதியத் திட்டம் என்பது புதிதல்ல. ஈ.பி.எஃப் (EPF) திட்டத்தின் கீழ் வராத திருக்கோயில்களின் நிரந்தரப் பணியாளர்களுக்காக, துறை நிலையிலான ஓய்வூதியத் திட்டம் 01.01.2006 அன்று நடைமுறைப்படுத்தப்பட்டது. தொடக்கத்தில், மாத ஓய்வூதியமாக வெறும் ரூ.750 மட்டுமே வழங்கப்பட்டு வந்தது. இந்தத் திட்டத்தைச் செயல்படுத்துவதற்காக, நிதி வசதியுள்ள திருக்கோயில்களின் உபரி நிதியிலிருந்து ரூ.50 கோடி ஒதுக்கப்பட்டு, அதன் வட்டி வருவாயைக் கொண்டு ஓய்வூதியம் வழங்கப்பட்டது.
காலப்போக்கில், ஊழியர்களின் பொருளாதாரச் சூழல் மற்றும் வாழ்க்கைச் செலவினங்கள் அதிகரித்ததைக் கருத்தில் கொண்டு, இந்த ஓய்வூதியம் பல்வேறு நிலைகளில் உயர்த்தப்பட்டு வந்தது. இறுதியாக, ஓய்வூதியத் திட்டத்தின் கீழ் உள்ள கோயில் பணியாளர்களுக்கான மாத ஓய்வூதியம் ரூ.3,000-லிருந்து ரூ.4,000 ஆகவும், குடும்ப ஓய்வூதியம் ரூ.1,500-லிருந்து ரூ.2,000 ஆகவும் உயர்த்தப்பட்டது.
இது தொடர்பாக கோயில் பணியாளர்கள் இந்துசமய அறநிலையத்துறை அமைச்சர் சேகர்பாபவுவிடம் பலமுறை கோரிக்கைகளை வைத்தனர். அவர் இதனை முதலமைச்சரின் கவனத்துக்கு எடுத்துச் சென்றார். தீர பரிசீலித்த அரசு, கடந்த சட்டப்பேரவைக் கூட்டத்தொடரில் கோயில் பணியாளர்களுக்கு ஓய்வூதியம் அதிகரிப்பது தொடர்பான அறிவிப்பை வெளியிட்டது. இந்துசமய அறநிலையத்துறை விவாதத்தின்போது அமைச்சர் இந்த அறிவிப்பை வெளியிட்டார்.
அமைச்சர் சேகர்பாபு அவர்களின் அறிவிப்பைச் செயல்படுத்தும் வகையில், இந்து சமய அறநிலையத்துறை ஆணையரின் பரிந்துரையை அரசு ஏற்றுக்கொண்டு, கீழ்க்காணும் முக்கிய முடிவுகளை உள்ளடக்கிய அரசாணையை வெளியிட்டுள்ளது:
மாத ஓய்வூதியம் உயர்வு: இந்து சமய அறநிலையத்துறையின் கீழ் உள்ள திருக்கோயில்களில் பணிபுரிந்து ஓய்வுபெற்ற பணியாளர்களுக்கு, தற்போது வழங்கப்பட்டு வரும் மாத ஓய்வூதியம் ரூ.4,000-லிருந்து ரூ.5,000 ஆக உயர்த்தி வழங்க அனுமதி அளிக்கப்பட்டுள்ளது. இது அவர்களின் மாதாந்திர வருமானத்தை அதிகரித்து, அடிப்படைத் தேவைகளை நிறைவேற்ற உதவும்.
குடும்ப ஓய்வூதியம் உயர்வு: ஓய்வுபெற்ற பணியாளர் இறந்த பிறகு, அவருடைய நேரடி வாரிசான கணவன் அல்லது மனைவிக்கு வாழ்நாள் முழுவதும் வழங்கப்படும் குடும்ப ஓய்வூதியமானது ரூ.2,000-லிருந்து ரூ.2,500 ஆக உயர்த்தப்பட்டுள்ளது. இந்த குடும்ப ஓய்வூதியம், பணியாளர் கடைசியாகப் பெற்ற மாத ஓய்வூதியத்தில் 50 சதவீதமாக இருக்கும். இது குடும்பத்தின் நிதிப் பாதுகாப்பை உறுதி செய்கிறது.
இந்த அரசாணை, ஓய்வுபெற்ற கோயில் பணியாளர்களின் பொருளாதார நிலையை மேம்படுத்துவதுடன், அவர்களின் குடும்பங்களுக்கும் ஒரு நிதிப் பாதுகாப்பை உறுதி செய்கிறது. அரசின் இந்த நடவடிக்கை, திருக்கோயில்களின் வளர்ச்சிக்கும், அங்கு பணியாற்றிய ஊழியர்களின் நலனுக்கும் முக்கியத்துவம் அளிப்பதாகப் பார்க்கப்படுகிறது. இதன் மூலம், ஆயிரக்கணக்கான ஓய்வுபெற்ற ஊழியர்கள் மற்றும் அவர்களின் குடும்பங்கள் பயன்பெறுவார்கள் என எதிர்பார்க்கப்படுகிறது.
இந்த அறிவிப்பு, அரசு ஊழியர்களுக்கு வழங்கப்படும் சலுகைகள் மற்றும் ஊதிய உயர்வு போன்ற பல்வேறு கோரிக்கைகளை நிறைவேற்றுவது போன்று, கோயில் ஊழியர்களின் கோரிக்கையையும் நிறைவேற்றியுள்ளது.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
)