கோவாவை தொடர்ந்து மேகாலயாவில் HIV நோய் பாதிப்பு அதிகரித்து வரும் நிலையில், திருமணத்துக்கு முன் HIV பரிசோதனையை கட்டாயமாக்கும் சட்டத்தை கொண்டு வர அம்மாநில அரசு ஆலோசித்து வருகிறது.
)
இந்தியாவின் வடகிழக்கு மாநிலமான மேகாலயாவில் HIV /ஏய்ட்ஸ் நோய் பாதிப்பு அதிகரித்து வரும் நிலையில், திருமணத்துக்கு முன் HIV பரிசோதனையை கட்டாயமாக்கும் சட்டத்தை கொண்டு வர அம்மாநில அரசு ஆலோசித்து வருகிறது. இதனை மாநில சுகாதார அமைச்சர் ஆம்பரீன் லிங்டோ உறுதிப்படுத்தியுள்ளார். கோவா மாநிலத்தில் இதே போன்ற சட்டம் அமலில் உள்ளதால், மேகாலயாவும் இதை பின்பற்றலாம் என அவர் கூறியுள்ளார். இந்த முடிவு, மேகாலயா ஏய்ட்ஸ் கட்டுப்பாட்டு சங்கத்தின் (MACS) அறிக்கையைத் தொடர்ந்து எடுக்கப்பட்டுள்ளது. மேகாலயாவில் ஹெச்ஐவி பாதிப்பு தேசிய அளவில் ஆறாவது இடத்தில் உள்ளது, இதன் காரணமாக மாநில அரசு இந்த அவரச முடிவை எடுத்துள்ளது.
மேகாலயாவில் HIV பாதிப்பு
மேகாலயா அரசு, HIV /ஏய்ட்ஸ் பாதிப்பை கட்டுப்படுத்த பல்வேறு நடவடிக்கைகளை எடுத்து வருகிறது. சமீபத்தில் நடைபெற்ற உயர்மட்டக் கூட்டத்தில், துணை முதலமைச்சர் பிரெஸ்டோன் டின்சாங் தலைமையில் இந்த விவகாரம் பேசப்பட்டுள்ளது. சமூக நல அமைச்சர் பால் லிங்டோ உள்ளிட்ட 8 எம்எல்ஏக்கள் கலந்து கொண்ட இந்தக் கூட்டத்தில், மேகாலயாவுக்கு ஏற்ற விரிவான ஹெச்ஐவி/ஏய்ட்ஸ் கொள்கை உருவாக்க முடிவு செய்யப்பட்டது. அமைச்சர் ஆம்பரீன் லிங்டோ கூறுகையில், "கோவாவில் திருமணத்துக்கு முன் HIV சோதனை கட்டாயம். ஏன் மேகாலயாவில் இல்லை? இந்த சட்டம் சமூகத்துக்கு பயனளிக்கும்" என்றார். இந்த கொள்கையை அமல்படுத்த சுகாதாரத் துறைக்கு அறிவுறுத்தப்பட்டுள்ளது.
மேகாலயாவில் ஹெச்ஐவி பாதிப்பு தேசிய அளவில் ஆறாவது இடத்தில் உள்ளது. வடகிழக்கு மாநிலங்கள் இந்த நோயால் அதிக மக்கள் பாதிக்கப்படுகின்றன. கிழக்கு காசி ஹில்ஸ் மாவட்டத்தில் மட்டும் 3,432 HIV வழக்குகள் பதிவாகியுள்ளன. இதில் 1,581 பேர் மட்டுமே சிகிச்சை பெறுகின்றனர். ஜெயிந்தியா ஹில்ஸ் பகுதியில் பாதிப்பு இன்னும் அதிகம். கடந்த 20 ஆண்டுகளில் மேகாலயா ஏய்ட்ஸ் கட்டுப்பாட்டு சங்கம் (MACS) பல நடவடிக்கைகளை எடுத்துள்ளது, ஆனால் HIV பாதிப்பு குறையவில்லை. பாலியல் தொடர்பு மூலமே பெரும்பாலான பரவல் ஏற்படுகிறது. போதிய விழிப்புணர்வு இல்லாததே இதற்கு காரணம் என்று கூறப்படுகிறது.
திருமணத்துக்கு முன் HIV சோதனை
HIV சோதனையை கட்டாயமாக்குவதன் நோக்கம், நோய் பரவலை தடுப்பதே என்று மாநில அரசு சார்பில் தெரிவிக்கப்பட்டுள்ளது. கோவா மாநிலத்தில் இதேபோன்ற சட்டம் 2006-இலிருந்து அமலில் உள்ளது. அங்கு திருமணத்துக்கு முன் ஹெச்ஐவி சோதனை கட்டாயம், இது நோய் கட்டுப்பாட்டில் உதவியுள்ளது. மேகாலயாவில் இந்த சட்டம் வந்தால், திருமண பதிவு அலுவலகங்களில் HIV சோதனை சான்றிதழ் காட்ட வேண்டும். இது நோய் பாதிப்பை குறைக்கும் என்றாலும், தனியுரிமை உரிமை குறித்த கேள்விகளை எழுப்பலாம் என்றும் கூறப்படுகிறது. இந்த சோதனை இரு தரப்புக்கும் கட்டாயம் ஆக்க வேண்டும் என்றும் சிலர் தெரிவித்து வருகின்றனர்.
"இந்த சோதனை ஆரம்ப கட்டத்தில் நோயை கண்டறிய உதவும். ஆனால், விழிப்புணர்வு மற்றும் சிகிச்சை வசதிகளை அதிகரிக்க வேண்டும்" என மருத்துவர்கள் தெரிவிக்கின்றனர். அந்த பகுதி மக்களும், ஹெச்ஐவி பாதிப்பு அதிகமாக இருப்பதால், இந்த சட்டம் அவசியம் என்கின்றனர். HIV சோதனை மற்றும் சிகிச்சை வசதிகளை அதிகரிக்க மாநில அரசு சார்பில் அறிவுறுத்தப்பட்டுள்ளது. இந்த திட்டம் அமலானால், மேகாலயாவின் சுகாதார வரலாற்றில் முக்கிய இடம் பிடிக்கும்.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
