 "ஐசிஐசிஐ வங்கியில் கணக்கு இருக்கிறதா? UPI பரிவர்த்தனைக்கு கட்டணம் ஆரம்பம்!")
இந்தியாவின் மிகப்பெரிய தனியார் வங்கிகளில் ஒன்றான ஐசிஐசிஐ வங்கி, வணிகர்களுக்கான UPI பரிவர்த்தனைகளை கையாளும் Google Pay, PhonePe, Mobikwik மற்றும் Razorpay போன்ற பேமெண்ட் அக்ரிகேட்டர்களுக்கு புதிய கட்டணத்தை அறிமுகப்படுத்தியுள்ளது. ஆகஸ்ட் 1, 2025 முதல் அமலுக்கு வந்துள்ள இந்த மாற்றம், UPI உள்கட்டமைப்பை பணமாக்குவது குறித்த ஒரு முக்கிய விவாதத்தை மீண்டும் தொடங்கியுள்ளது. பேமெண்ட் அக்ரிகேட்டர்கள் என்பவர்கள், வங்கிகளுக்கும் வணிகர்களுக்கும் இடையே ஒரு பாலமாக செயல்பட்டு, பண பரிமாற்றங்களை சேகரித்து, செட்டில்மென்ட் செய்யும் நிறுவனங்கள் ஆவர். ஐசிஐசிஐ வங்கியின் புதிய விதிகளின்படி, இந்த நிறுவனங்களிடம் இருந்து கீழ்க்கண்டவாறு கட்டணம் வசூலிக்கப்படும்:
புதிய கட்டணங்கள்
- ஐசிஐசிஐ வங்கியில் எஸ்க்ரோ கணக்கை (Escrow Account) பராமரிக்கும் பேமெண்ட் அக்ரிகேட்டர்களுக்கு, ஒவ்வொரு பரிவர்த்தனைக்கும் 2 அடிப்படை புள்ளிகள் கட்டணமாக விதிக்கப்படும். இதன் அதிகபட்ச வரம்பு ஒரு பரிவர்த்தனைக்கு ரூ.6 ஆகும்.
- ஐசிஐசிஐ வங்கியில் எஸ்க்ரோ கணக்கு இல்லாத நிறுவனங்களுக்கு, ஒவ்வொரு பரிவர்த்தனைக்கும் 4 அடிப்படை புள்ளிகள் கட்டணமாக விதிக்கப்படும். இதன் அதிகபட்ச வரம்பு ஒரு பரிவர்த்தனைக்கு ரூ.10 ஆகும்.
இந்த கட்டணம் ஏன்?
வாடிக்கையாளர் செலுத்தும் UPI பணம், நேரடியாக வணிகரின் ஐசிஐசிஐ வங்கி கணக்கில் செட்டில் செய்யப்பட்டால், இந்த கட்டணங்கள் பொருந்தாது. இதன் மூலம், அந்த பணத்தை தற்காலிகமாக தனது கணக்கில் வைத்திருப்பதால் வங்கி பயனடைகிறது. UPI பரிவர்த்தனைகள், குறிப்பாக வாடிக்கையாளர்-வணிகர் பரிவர்த்தனைகள் மிக வேகமாக வளர்ந்து வருவதால், வங்கிகளுக்கான உள்கட்டமைப்பு செலவுகள் அதிகரித்துள்ளன . ஆனால், UPI பரிவர்த்தனைகளுக்கு வணிகர் தள்ளுபடி விகிதம் இல்லாததால், வங்கிகளுக்கு இந்த பரிவர்த்தனைகள் மூலம் வருவாய் கிடைப்பதில்லை. இந்த செயல்பாட்டு செலவுகளை ஈடுகட்டும் ஒரு வழியாகவே ஐசிஐசிஐ வங்கி இந்த கட்டணத்தை அறிமுகப்படுத்தியுள்ளது. ஏற்கனவே, யெஸ் பேங்க் மற்றும் ஆக்சிஸ் பேங்க் போன்ற வங்கிகள் இதே போன்ற கட்டணங்களை வசூலித்து வருவது குறிப்பிடத்தக்கது.
வாடிக்கையாளர்களுக்கு என்ன பாதிப்பு?
இந்த மாற்றத்தால், வாடிக்கையாளர்களுக்கு UPI பரிவர்த்தனைகளுக்கு எந்தவிதமான நேரடி கட்டணமும் விதிக்கப்படாது. இந்த புதிய கட்டண சுமையை பேமெண்ட் அக்ரிகேட்டர்கள் (Google Pay, PhonePe போன்றவை) ஏற்க வேண்டும். இந்த நிறுவனங்கள், தாங்கள் வணிகர்களுடன் செய்துள்ள ஒப்பந்தத்தை பொறுத்து, இந்த கூடுதல் செலவை அவர்களே ஏற்கலாம் அல்லது பிளாட்பார்ம் கட்டணம், வசதி கட்டணம் போன்ற பெயர்களில் வணிகர்களிடம் இருந்து வசூலிக்கலாம். இந்த நடவடிக்கை, UPI சேவைகளை வழங்கி வரும் வங்கிகள், தங்களின் உள்கட்டமைப்பு செலவுகளை ஈடுகட்ட எடுக்கும் ஒரு முக்கிய முயற்சியாக பார்க்கப்படுகிறது. இது எதிர்காலத்தில் வணிகர்களுக்கான பரிவர்த்தனை செலவுகளை அதிகரிக்க கூடும். இறுதியில் மக்கள் கூடுதல் பணம் செலுத்த வேண்டிய சூழ்நிலை ஏற்படலாம்!
சார்பில்லாத சமரசமில்லாத செய்திகள் உங்கள் உள்ளங்கைகளில்! உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
)