Today Election News Live Updates In Tamil: டெல்லியில் உள்ள மொத்தம் 70 சட்டப்பேரவை தொகுதிகளுக்கும் இன்று ஒரே கட்டமாக தேர்தல் நடைபெறுகிறது. ஆளும் ஆம் ஆத்மி கட்சி மீண்டும் ஆட்சியை கைப்பற்றவும், 2013க்கு பின் ஆட்சி அமைக்காத காங்கிரஸ் கட்சியும், 1998க்கு பின் ஆட்சிக்கு வராத பாஜகவும் டெல்லியை கைப்பற்ற களம் கண்டுள்ளன. மொத்தம் 699 வேட்பாளர்கள் இன்று டெல்லி தேர்தல் களத்தில் மோதுகின்றனர். இந்த தேர்தல் மத்தியில் ஆளும் பாஜகவுக்கு மட்டுமின்றி எதிர்க்கட்சிகளுக்கும் முக்கியமான ஒன்றாக பார்க்கப்படுகிறது.
அதேபோல், கடந்த டிசம்பர் மாதம் மறைந்த காங்கிரஸ் எம்எல்ஏ ஈவிகேஎஸ் இளங்கோவனின் ஈரோடு கிழக்கு சட்டப்பேரவைக்கு தொகுதிக்கும் இன்றுதான் வாக்குப்பதிவு நடைபெறுகிறது. 2021இல் காங்கிரஸ் சார்பில் திருமகன் ஈவேராவும், 2023இல் திருமகன் ஈவேராவின் மறைவுக்கு பின் நடந்த இடைத்தேர்தலில் அவரது தந்தை விகேஎஸ் இளங்கோவன் மீண்டும் காங்கிரஸ் சார்பில் களமிறங்கினார்.
ஆனால், இம்முறை இத்தொகுதியில் திமுகவே போட்டியிடுகிறது. அதிமுக, பாஜக, தவெக உள்ளிட்ட கட்சிகள் இந்த இடைத்தேர்தலை புறக்கணித்துள்ள நிலையில், திமுக vs நாம் தமிழர் கட்சி என இந்த இடைத்தேர்தல் களம் அமைந்துள்ளது. திமுக சார்பில் வி.சி. சந்திரகுமார் மற்றும் நாம் தமிழர் கட்சி சார்பில் சீதாலட்சுமி உள்பட மொத்தம் 46 வேட்பாளர்கள் இன்று களம் காண்கின்றனர்.
டெல்லி சட்டப்பேரவை தேர்தல் மற்றும் ஈரோடு கிழக்கு சட்டப்பேரவை இடைத்தேர்தல் ஆகிய இரண்டின் வாக்கு எண்ணிக்கையும் வரும் பிப். 8ஆம் தேதி (சனிக்கிழமை) நடைபெறுகிறது. இந்நிலையில், இன்று காலை 7 மணிக்கு வாக்குப்பதிவு தொடங்கிய நிலையில், மாலை 6 மணிவரை வாக்குப்பதிவு நடைபெறும். இன்றைய தேர்தல் வாக்குப்பதிவு செய்திகள் மட்டுமின்றி அனைத்து வகையான செய்திகளின் உடனடி அப்டேட்களையும் இங்கு காணலாம்.
