 "சாய் அபயங்கருக்கு எப்படி இத்தனை படங்கள்? உண்மையை சொன்ன சாம் சி.எஸ்!")
தமிழ் மற்றும் தெலுங்கு திரையுலகில் பிரபல இசையமைப்பாளர்களில் ஒருவரான சாம் சி.எஸ், சமீபத்தில் சக இசையமைப்பாளர் சாய் அபயங்கரின் வெற்றிகரமான பயணம் குறித்து தனது கருத்துகளை பகிர்ந்துள்ளார். இது தற்போது வைரல் ஆகி வருகிறது. கடந்த சில வாரங்களாக சாய் அபயங்கருக்கு புதிய படங்கள் கிடைப்பது பற்றியும், சாம் சிஎஸ்க்கு கிடைக்கவில்லை என்றும் பலரும் கருத்து தெரிவித்து வந்தனர். இது சர்ச்சைகளை ஏற்படுத்திய நிலையில், இதற்கு பதிலளித்த சாம் சிஎஸ், திறமையின் முக்கியத்துவத்தை பற்றி வலியுறுத்தியுள்ளார். மேலும் இசைத்துறையில் வாய்ப்புகள் எப்படி கிடைக்கின்றன என்பதை பற்றியும் தெளிவாக விளக்கி உள்ளார்.
சாம் சி.எஸ்-ன் இசைப்பயணம்
சாம் சி.எஸ், தமிழ் சினிமாவில் தனது தனித்துவமான இசையால் கவனம் ஈர்த்தவர். 'விக்ரம் வேதா', 'இஸ்பேட் ராஜாவும் இதய ராணியும்', 'கைதி' போன்ற படங்களின் இசை அவருக்கு பெரும் வெற்றியைத் தேடி தந்தது. கடந்த ஆண்டு வெளியான 'புஷ்பா 2' திரைப்படத்திற்கு அவர் அமைத்த பின்னணி இசை, அவருக்கு உலகளாவிய புகழைப் பெற்றுத் தந்தது. இது தெலுங்கு திரையுலகிலும் அவரது பங்களிப்பை எடுத்து காட்டுகிறது. பின்னணி இசை என்றாலே சாம் சிஎஸ் கூப்பிடுங்கள் என்று சொல்லும் அளவிற்கு சிறந்தவராக மாறி உள்ளார். இத்தகைய சாதனைகளுடன், தனது தொழில் வாழ்க்கையில் திருப்தியாக இருப்பதாக சாம் சிஎஸ் தெரிவித்துள்ளார்.
சாய் அபயங்கரின் எழுச்சி
இளம் இசையமைப்பாளர் சாய் அபயங்கர் வெறும் மூன்று ஆல்பம் பாடல்களை வெளியிட்டிருந்தாலும், தற்போது எட்டு பெரிய படங்களில் இசையமைக்க ஒப்பந்தமாகியுள்ளார். இதில் சூர்யா, அல்லு அர்ஜுன், கார்த்தி போன்ற முன்னணி நட்சத்திரங்களின் படங்களும் அடங்கும். இன்னும் ஒரு படம் கூட வெளியாகாத நிலையில், அவருக்கு இத்தனை வாய்ப்புகள் எப்படி கிடைத்தன என்பது இணையத்தில் பெரும் விவாதத்தை ஏற்படுத்தி உள்ளார். சிலர், அவர் பிரபல பாடகரின் மகன் என்பதால் இந்த வாய்ப்புகள் வந்ததாக கூறுகின்றனர். இதனால், சாம் சி.எஸ் போன்ற அனுபவமிக்க இசையமைப்பாளர்களுக்கு ஏன் பெரிய படங்கள் கிடைப்பதில்லை என்றும் இணையவாசிகள் கேள்வி எழுப்பினர்.
சாம் சி.எஸ்-ன் கருத்து
இந்த கேள்விகளுக்கு பதிலளித்த சாம் சி.எஸ், சாய் அபயங்கரின் திறமையைப் பாராட்டினார். "சாய் ஒரு திறமைமிக்க இசைக்கலைஞர் என்பது எனக்குத் தெரியும். அவரை ஒப்பந்தம் செய்த இயக்குநர்களும் அவரது திறனை அறிவார்கள். ரசிகர்களுக்கு ஏன் இது தெரியவில்லை என்றால், அவரது படங்கள் ஒன்று கூட இன்னும் வெளியாகவில்லை. ஆனால் உண்மையில் அவரிடம் ஏராளமான திறமை உள்ளது. அவர் பல பாடல்களை உருவாக்கியுள்ளார். இயக்குநர்கள் அவரது வேலையை பிடித்ததால் மட்டுமே அவரை தேர்வு செய்கின்றனர். அவர் எந்த PR வேலைகளும் செய்யவில்லை. வெறும் இரண்டு அல்லது மூன்று பாடல்களே வெளியாகியுள்ள நிலையில், இத்தனை பட வாய்ப்புகள் எப்படி என கேட்கின்றனர். ஒரு படம் வெளியானால் இந்த பேச்சு இருக்காது," என்று தெரிவித்துள்ளார்.
"சிலர் நான் என்னுடைய சொந்த லாபத்திற்காக சாய் அபயங்கரை PR வைத்து விமர்சிப்பதாக கூறுகின்றனர். அப்படி நான் செய்திருந்தால், ஆதாரத்துடன் காட்டுங்கள். அப்படி நிரூபிக்கப்பட்டால், நான் சினிமாவை விட்டு விலகிவிடுகிறேன்," எனத் தெரிவித்துள்ளார். சாய் அபயங்கருக்கு அதிக பட வாய்ப்புகள் கிடைப்பதால் தனக்கு எந்த பொறாமையும் இல்லை என்றும், தனது பணியில் முழு திருப்தி அடைவதாகவும் அவர் குறிப்பிட்டார். சாம் சிஎஸ்-ன் இந்த பேச்சு இசை உலகில் திறமை மற்றும் வாய்ப்புகள் இடையிலான தொடர்பை வெளிப்படுத்துகிறது. சாய் அபயங்கரின் வெற்றி, இளம் திறமையாளர்களுக்கு உத்வேகமாக அமைகிறது. வருங்காலத்தில் சாயின் படங்கள் வெளியாகும்போது, அவரது திறமை மேலும் உறுதிப்படுத்தப்படும் என எதிர்பார்க்கப்படுகிறது.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
)