 "சித்தார்த்தின் 3 BHK படம் எப்படி உள்ளது? திரை விமர்சனம்!")
)
தமிழ் சினிமா அதிரடி சண்டை காட்சிகள் கொண்ட படங்கள் மக்களிடையே பெரும் வரவேற்பை பெற்ற காலம் மறைந்து போய், தற்போது பீல் குட் படங்கள் மக்களிடையே நல்ல வரவேற்பை பெற்று வருகிறது. இந்த ஆண்டு வெளியான மாமன், டூரிஸ்ட் பேமிலி போன்ற படங்கள் மக்கள் மத்தியில் நல்ல வரவேற்பை பெற்ற நிலையில், இந்த வாரம் 3 BHK படம் வெளியாக உள்ளது. ஸ்ரீ கணேஷ் இயக்கத்தில் உருவாகியுள்ள இந்த படத்தில் சித்தார்த், சரத்குமார், தேவயானி, மீதா ரகுநாத், சைத்ரா ஆகியோர் நடித்துள்ளனர். இந்த படத்தை சாந்தி டாக்கீஸ் நிறுவனம் தயாரித்துள்ளது. இந்த படத்தின் டிரைலர் வெளியானதில் இருந்து படத்தின் மீது அதிக எதிர்பார்ப்பு ஏற்பட்ட நிலையில் இந்த வாரம் திரையரங்குகளில் படம் வெளியாகி உள்ளது.
படத்தின் கதை!
கணவன் மனைவியான சரத்குமார் மற்றும் தேவயானிக்கு சித்தார்த், மீதா என இரண்டு குழந்தைகள் உள்ளனர். சென்னையில் வசித்து வரும் இந்த குடும்பத்தின் ஒரே கனவு சொந்த வீடு வாங்குவது தான். இதற்காக சிறுக சிறுக பணத்தை சேர்த்து வைக்கின்றனர். ஆனால் எதிர்பாராத விதமாக ஒவ்வொரு கட்டத்திலும் ஒவ்வொரு செலவு வருகிறது. இவை அனைத்தையும் கடந்து இறுதியில் அவர்கள் சொந்த வீடு வாங்கினார்களா? இல்லையா? என்பது தான் 3 BHK படத்தின் கதை.
படம் எப்படி உள்ளது?
சரத்குமார் பிரபு என்ற கதாபாத்திரத்தில் நடித்துள்ளார். நடித்துள்ளார் என்று சொல்வதற்கு பதிலாக அந்த கதாபாத்திரத்தில் வாழ்ந்துள்ளார் என்று சொல்லலாம். தன்னுடைய அனுபவத்தை பிரபு என்ற கதாபாத்திரத்திற்கு உயிர் கொடுத்துள்ளார். ஒரு மிடில் கிளாஸ் அப்பாவாக தனது மகனின் ஆசையை நிறைவேற்ற முடியாத தந்தையாக, தனது மனைவியிடம் கோபப்படும் கணவனாக ஒரு தேர்ந்த நடிப்பை வெளிப்படுத்தியுள்ளார். தேவயானிக்கு படத்தில் பெரிதாக டயலாக்குகள் இல்லையென்றாலும் தனது எக்ஸ்பிரஷன் மூலம் ஒவ்வொரு காட்சிகளுக்கும் உயிர் கொடுக்கிறார்.
சித்தார்த் ஒரு பள்ளி மாணவர் என்று சொன்னால் கூட நம்ப முடியும் அளவிற்கு சிறப்பாக நடித்துள்ளார். பள்ளி, கல்லூரி, வேலைக்கு செல்லும் இளைஞர் என அனைத்து தோற்றங்களுக்கும் அப்படியே பொருத்துகிறார். குறிப்பாக இரண்டாம் பாதியில் நன்றாகவே நடித்திருந்தார் சித்தார்த். இவரின் தங்கையாக குட் நைட் படத்தின் மூலம் நமக்கு பரிச்சயமான மீதா நல்ல ஒரு நடிப்பை கொடுத்துள்ளார். இவருக்கு படத்தில் முக்கிய கதாபாத்திரம் என்பதை உணர்ந்து நன்றாகவே நடித்துள்ளார். குறிப்பாக இரண்டாம் பாதியில் வீட்டிற்குள் நடக்கும் ஒரு காட்சியில் கைத்தட்டல்களை பெறுகிறார்.
மற்றொரு பெண் கதாபாத்திரத்தில் நடித்திருக்கும் சைத்ராவும் இரண்டாம் பாதியில் முழுவதும் நல்ல ஒரு நடிப்பை கொடுத்துள்ளார். படத்தில் கதாநாயகி என்று சொல்ல முடியவில்லை என்றாலும் அந்த கதாபாத்திரத்திற்கு கச்சிதமாக பொருந்தியுள்ளார். எட்டு தோட்டாக்கள் படத்தின் மூலம் நம் அனைவரையும் கவர்ந்த ஸ்ரீ கணேஷ் இந்த 3 BHK படத்தின் மூலம் மீண்டும் ஒருமுறை கவர்ந்துள்ளார். ஒரு மிடில் கிளாஸ் குடும்பத்தின் வாழ்க்கையை இரண்டு மணி நேர படமாக எடுத்துக் காட்டியுள்ளார். ஒரு குடும்பத்திற்கு ஒரு சொந்த வீடு எவ்வளவு முக்கியம் என்பதை தன்னுடைய அற்புதமான திரைக்கதை மூலம் சொல்லியுள்ளார். ஒவ்வொரு முறையும் பிரபு மற்றும் அவரது குடும்பம் வீடு பார்க்க செல்லும் போது நாமும் அவர்களுடன் சேர்ந்து பயணிக்கின்றோம். 3 BHK படத்தில் இடம்பெற்றுள்ள காட்சிகள் அனைத்தும் கண்டிப்பாக நம் அனைவரின் வீட்டிலும் நிச்சயம் நடந்திருக்கும். அதுதான் நம்மை படத்துடன் ஒன்ற வைக்கிறது.
படத்தொகுப்பு, ஒளிப்பதிவு, இசை என அனைத்தும் படத்திற்கு பலர் சேர்க்கிறது. 2 மணி நேரம் 20 நிமிடங்கள் மட்டுமே படத்தின் நீளம் இருந்தாலும் ஒரு சில இடங்களில் படம் மெதுவாக நகருகிறது. கிளைமேக்ஸ் காட்சிகளுக்கு முன்பு இருந்தே சரத்குமாருக்கும், மற்ற கதாபாத்திரங்களுக்கும் கொடுக்கப்பட்ட கெட்டப்பும், ஒட்டு தாடியும், விக்கும் அப்பட்டமாக தெரிந்தது. மேக்கப் விஷயங்களில் இன்னும் சற்று கூடுதல் கவனம் சேர்த்திருக்கலாம். அதேபோல தேவயானி கதாபாத்திரத்திற்கு இன்னும் கூடுதல் காட்சிகளை வைத்திருந்திருக்கலாம். மொத்தத்தில் 3 BHK குடும்பத்துடன் சென்று ரசிக்கக்கூடிய ஒரு அழகிய படைப்பு.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
