கலைஞர் மகளிர் உரிமைத் தொகை விண்ணப்பம் நிராகரிக்கப்பட்டால், மேல்முறையீடு எங்கு செய்ய வேண்டும்?

கலைஞர் மகளிர் உரிமைத் தொகை (Kalaingar Magalir Urimai Thogai) திட்டம் ஜூன் 4 ஆம் தேதி முதல் விரிவாக்கம் செய்யப்பட இருக்கிறது. அன்றைய நாளில் தமிழ்நாடு முழுவதும் 9000 சிறப்பு முகாம்கள் நடக்க உள்ளது.

மக்களுடன் முதல்வர் என்ற திட்டத்தின் கீழ் நடக்கும் இந்த சிறப்பு முகாமில் கலைஞர் மகளிர் உரிமைத் தொகை திட்டத்திற்கு பொதுமக்கள் விண்ணப்பிக்க வேண்டும் என்பதற்காகவே நடத்தப்படுகிறது.

இதுவரை கலைஞர் மகளிர் உரிமைத் தொகை திட்டத்துக்கு விண்ணப்பிக்காதவர்கள், ஏற்கனவே விண்ணப்பித்து விண்ணப்பம் நிராகரிக்கப்பட்டவர்கள் எல்லாம் இந்த முகாமில் கலந்து கொண்டு எளிதாக விண்ணப்பிக்கலாம்.

ரேஷன் கார்டு கட்டாயம் இருக்க வேண்டும். ரேஷன் கார்டு இல்லாதவர்கள் இந்த திட்டத்தில் விண்ணப்பிக்க முடியாது. இதுதவிர ஆதார் அட்டை, வங்கி பாஸ்புக், புகைப்படம், சிலிண்டர் ரசீது, மொபைல் எண், உள்ளிட்ட ஆவணங்கள் கட்டாயமாக இருக்க வேண்டும். 

கலைஞர் மகளிர் உரிமைத்தொகை விண்ணப்பத்தில் கேட்கப்பட்டிருக்கும் அனைத்து தகவல்களையும் கட்டாயம் நிரப்ப வேண்டும். அவை உண்மையான தகவல்களாக இருக்க வேண்டும்.

ஏனென்றால் கலைஞர் மகளிர் உரிமைத் தொகை விண்ணப்பத்தில் இடம்பெற்றிருக்கும் தகவல்கள் உண்மையா? என்பதை அதிகாரிகள் களத்தில் வந்து ஆய்வு செய்வார்கள். 

அப்போது உண்மைக்கு மாறான தகவல்கள் இருந்தால் உங்களின் விண்ணப்பம் நிராகரிக்கப்படும். ஒருவேளை தவறாக உங்களின் விண்ணப்பம் நிராகரிக்கப்பட்டால், அதாவது, இந்த திட்டத்துக்கான எல்லா தகுதிகள் இருந்தபோதும் உங்கள் கலைஞர் மகளிர் உரிமைத் தொகை விண்ணப்பம் நிராகரிக்கப்பட்டிருந்தால் மேல்முறையீடு செய்யலாம்.

விண்ணப்பம் நிராகரிக்கப்பட்ட தேதியில் இருந்து 30 நாட்களுக்குள் தாலுகா அலுவலகத்துக்கு நேரில் சென்று முறையிடலாம். அப்போது, அங்கிருக்கும் அதிகாரிகள் நீங்கள் என்ன செய்ய வேண்டும் என்பதற்கு வழிகாட்டுவார்கள்.

கலைஞர் மகளிர் உரிமைத் தொகை திட்டத்துக்கு விண்ணப்பிப்பதற்கு முன், இந்த திட்டத்துக்கான தகுதிகளை கலைஞர் மகளிர் உரிமைத் தொகை வெப்சைட்டில் சென்று தவறாமல் பார்த்துக் கொள்ளுங்கள். 

உங்களுக்கு எல்லா தகுதிகளிலும் இருந்தால் மட்டும் விண்ணப்பிக்கவும். மாறாக, தவறான தகவல்களை கொண்டு விண்ணப்பிப்பவர்களின் விண்ணப்பம் நிராகரிக்கப்படுவதை தவிர்க்க முடியாது.

வார்டு உறுப்பினரைத் தவிர மக்களால் தேர்வு செய்யப்பட்ட மக்கள் பிரதிநிதிகளான ஊராட்சி மன்ற தலைவர் முதல் எம்பி, எம்எல்ஏ, கவுன்சிலர், நகர்மன்ற தலைவர், மேயர் உள்ளிட்டோரின் குடும்ப உறுப்பினர்கள் இந்த திட்டத்துக்கு விண்ணப்பிக்க முடியாது.

அரசு ஊழியர்கள் இந்த திட்டத்தில் விண்ணப்பிக்க முடியாது. மத்திய மாநில அரசு பணிகளில் இருந்து ஓய்வு பெற்றவர்கள் இந்த திட்டத்தில் விண்ணப்பிக்க முடியாது. உயிர்கொல்லி நோய்வாய்பட்டவர்களுக்கு சிறப்பு விலக்கு உள்ளது. அதனை கலைஞர் மகளிர் உரிமைத் தொகை வெப்சைட்டில் தெரிந்து கொள்ளுங்கள்.