இன்னும் 5 வருஷம்.. ஆனால்! ஓய்வு குறித்து மனம் திறந்த எம். எஸ். தோனி!

2025 ஐபிஎல் தொடரில் சிஎஸ்கே அணி மிகவும் மோசமாக விளையாடியது. தொடரில் இருந்து முதலில் வெளியே சென்ற அணியும் சென்னை சூப்பர் கிங்ஸ் அணிதான். 

 

அந்த அளவிற்கு பேட்டிங் மற்றும் பந்து வீச்சில் சொதப்பியது. இதுவரை நடந்த ஐபிஎல் தொடர்களில் இப்படி சென்னை சூப்பர் கிங்ஸ் அணி மோசமாக விளையாடியது கிடையாது. 

இந்த சூழலில், வரும் 2026 ஐபிஎல் தொடரிலாவது சிறப்பாக விளையாடி கோப்பையை வெல்ல வேண்டும் என்ற எதிர்பார்ப்பு ரசிகர்கள் இடையே உள்ளது. அதற்கேற்ப சென்னை சூப்பர் கிங்ஸ் அணியும் எதிர்வரும் ஐபிஎல் தொடருக்காக தயாராகி வருகிறது. 

இதற்கிடையில், எம்.எஸ். தோனி, அடுத்து வரும் ஐபிஎல் தொடர்களில் விளையாடுவாரா? அல்லது ஓய்வை அறிவிப்பாரா? என்ற கேள்வி ரசிகர்களிடையே எழுந்துள்ளது. இந்த நிலையில், இந்த கேள்விக்கு பதில் அளித்துள்ளார் எம். எஸ். தோனி. 

சென்னையில் நடந்த நிகழ்ச்சி ஒன்றில் கலந்து கொண்டு பேசிய அவர், அடுத்த 5 ஆண்டுகள் கிரிக்கெட் விளையாடும் அளவிற்கு என்னுடைய கண்கள் நன்றாக உள்ளது என மருத்துவர்கள் கூறிவிட்டனர். இதில் சூட்சமம் என்னவென்றால், உடல் தகுதிக்கு இன்னும் டிக் மார்க் கிடைக்கவில்லை. கண்களை வைத்து மட்டும் கிரிக்கெட் விளையாட முடியாது அள்ளவா என கிண்டலாக தெரிவித்தார்.