இந்திய அணியில் இருந்து ஓரம்கட்டப்பட்ட யுஸ்வேந்திர சாஹல், தற்போது வெளிநாட்டு அணியில் விளையாட தேர்வாகி உள்ளார். ஐபிஎல் தொடர் முடிந்த பிறகு விளையாட உள்ளார்.
இந்திய அணியின் சுழற்பந்து வீச்சாளர் யுஸ்வேந்திர சாஹல் நீண்ட நாட்களாக இந்திய அணியில் இடம் பெறவில்லை. கடைசியாக 2023 ஆம் ஆண்டு நடைபெற்ற தொடரில் இந்திய அணிக்காக விளையாடினார்.
2024 டி20 உலகக் கோப்பை அணியில் இடம் பெற்று இருந்தாலும், பிளேயிங் 11ல் அவருக்கு வாய்ப்பு கிடைக்கவில்லை. அடுத்ததாக ஐபிஎல் 2025ல் விளையாட உள்ளார் சாஹல்.
இந்திய அணியில் தொடர்ந்து வாய்ப்பு மறுக்கப்படுவதால் ஐபிஎல் 2025க்குப் பிறகு, கவுண்டி சாம்பியன்ஷிப் தொடரில் நார்தாம்ப்டன்ஷையருக்காக விளையாடுவார் என்று கூறப்படுகிறது.
இதற்கு முன்பு 2023ல் இதே அணிக்காக விளையாடியுள்ளார். அப்போது சிறப்பாக விளையாடி 4 போட்டிகளில் 21.10 சராசரியாக 19 விக்கெட்டுகளை வீழ்த்தினார்.
கவுண்டி சாம்பியன்ஷிப்பில் விளையாடுவது குறித்து பேசிய சாஹல், "கடந்த சீசனில் சிறப்பாக விளையாடி இருந்தேன். மீண்டும் அதில் ஒரு பகுதியாக இருக்க வாய்ப்பு கிடைத்துள்ளது. பெரிய வெற்றிகளைப் பெற முடியும் என்று நம்புகிறேன்" என்று கூறினார்.
நார்தாம்ப்டன்ஷையரின் தலைமை பயிற்சியாளர் டேரன் லெஹ்மனும், "இந்த சீசனில் சாஹல் மீண்டும் இணைந்திருப்பது எனக்கு மகிழ்ச்சி அளிக்கிறது. அவரது அனுபவம் எங்களுக்கு நிச்சயம் உதவும். அவர் இருப்பது மிகப்பெரிய ஊக்கமாக இருக்கும்" என்று அவர் கூறினார்.
