 "Ooty Closed: மொத்தமாக மூடப்பட்ட ஊட்டி! ஊருக்குள் வர அனைவருக்கும் தடை!")
நீலகிரி மாவட்டத்தில் அடுத்த சில நாட்களுக்கு மிக கனமழை முதல் அதி கனமழை வரை பெய்யக்கூடும் என இந்திய வானிலை ஆய்வு மையம் தெரிவித்துள்ளது. இதனையடுத்து அங்கு "ரெட் அலர்ட்" விடுக்கப்பட்டுள்ளது. முன்னெச்சரிக்கை நடவடிக்கையாக, மாவட்டத்தில் உள்ள அனைத்து சுற்றுலா மையங்களையும் மறு அறிவிப்பு வரும் வரை மூட மாவட்ட நிர்வாகம் உத்தரவிட்டுள்ளது. தென்மேற்கு பருவமழை தீவிரமடைந்துள்ள நிலையில், நீலகிரி மற்றும் கோயம்புத்தூர் மாவட்டத்தின் மலை பகுதிகளில் ஆகஸ்ட் 4 மற்றும் 5 ஆகிய தேதிகளில் மிக கனமழை முதல், ஓரிரு இடங்களில் அதி கனமழை வரை பெய்யக்கூடும் என வானிலை ஆய்வு மையம் எச்சரித்துள்ளது. இந்த ரெட் அலர்ட் எச்சரிக்கையை தொடர்ந்து, பொதுமக்களின் பாதுகாப்பை உறுதி செய்யும் வகையில் மாவட்ட நிர்வாகம் பல்வேறு அதிரடி நடவடிக்கைகளை எடுத்து வருகிறது.
சுற்றுலாத் தலங்கள் மூடல்
ஊட்டியில் உள்ள தாவரவியல் பூங்கா, ரோஜா பூங்கா, தொட்டபெட்டா காட்சி முனை, பைன் மரக்காடுகள், படகு இல்லங்கள் மற்றும் பைக்காரா நீர்வீழ்ச்சி உள்ளிட்ட அனைத்து முக்கிய சுற்றுலா மையங்களும் மூடப்பட்டுள்ளன. சுற்றுலா பயணிகள் தங்களது பயண திட்டங்களை மறுபரிசீலனை செய்யுமாறும், தற்போதைய சூழலில் நீலகிரிக்கு வருவதை தவிர்க்குமாறும் மாவட்ட நிர்வாகம் கேட்டு கொண்டுள்ளது. எந்தவொரு அவசர நிலையையும் சமாளிக்க, அரக்கோணத்தில் இருந்து தேசிய பேரிடர் மீட்பு படையின் (NDRF) 30 பேர் கொண்ட குழுவினர் நீலகிரிக்கு வரவழைக்கப்பட்டுள்ளனர். மேலும், மாநில பேரிடர் மீட்பு படையும் கூடலூர் மற்றும் பந்தலூர் போன்ற பாதிப்புக்குள்ளாகக்கூடிய பகுதிகளில் தயார் நிலையில் வைக்கப்பட்டுள்ளது.
ஆபத்தான பகுதிகள்
மாவட்டம் முழுவதும் வெள்ளம் மற்றும் நிலச்சரிவு ஏற்பட வாய்ப்புள்ள 283 இடங்கள் கண்டறியப்பட்டு, அங்குத் தீவிரமாக கண்காணிக்கப்பட்டு வருகிறது. எனவே பொதுமக்கள் மற்றும் சுற்றுலா பயணிகள் ஆறுகள், நீர்வீழ்ச்சிகள் மற்றும் பிற நீர்நிலைகளுக்கு அருகில் செல்ல வேண்டாம் என மாவட்ட நிர்வாகம் கடுமையாக அறிவுறுத்தியுள்ளது. ஊட்டி, குன்னூர், கூடலூர், பந்தலூர் உள்ளிட்ட மாவட்டத்தின் பல பகுதிகளில் தொடர்ந்து கனமழை பெய்து வருகிறது. இதனால், பல இடங்களில் சிறிய அளவிலான நிலச்சரிவுகள், மரங்கள் வேரோடு சாய்வது போன்ற சம்பவங்கள் பதிவாகியுள்ளன.
பொதுமக்களின் பாதுகாப்பை உறுதி செய்ய, வருவாய்த்துறை, தீயணைப்புத் துறை மற்றும் காவல்துறை ஆகியவை இணைந்து 24 மணி நேரமும் கண்காணிப்புப் பணியில் ஈடுபட்டுள்ளன. வானிலை சீரடையும் வரை, பொதுமக்கள் தேவையற்ற பயணங்களைத் தவிர்த்து, பாதுகாப்பாக இருக்குமாறு மாவட்ட நிர்வாகம் கேட்டுக் கொண்டுள்ளது. இதனால் ஊட்டி முழுவதும் பரபரப்பான சூழ்நிலையில் உள்ளது. இந்த வார இறுதியில் சுற்றுலா செல்ல திட்டமிட்டு இருந்தவர்கள் என்ன செய்வது என்று தெரியாமல் குழம்பி உள்ளனர்.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
)