திமுக முன்னாள் எம்பி வசந்தி ஸ்டான்லி காலமானார்!

திமுக முன்னாள் எம்.பி.யும் பத்திரிகையாளருமான வசந்தி ஸ்டான்லி (56) உடல் நலக்குறைவால் நேற்றிரவு  காலமானார். 

சிவகங்கை மாவட்டம், தேவக்கோட்டையில் பிறந்தவர் வசந்தி ஸ்டான்லி. சட்டம் பயின்ற அவர், திரைப்பட தணிக்கைக் குழு உறுப்பினர், தமிழ்நாடு சிறுபான்மை ஆணைய உறுப்பினராக பதவி வகித்துள்ளார். 2008 முதல் 2014-ம் ஆண்டு வரை மாநிலங்களவை உறுப்பினராக இருந்தார். 

உடல்நலக்குறைவு காரணமாக சென்னை அப்போலோ மருத்துவமனையில் சிகிச்சை பெற்று வந்தார். இந்நிலையில் அவரது உடல்நிலை மோசமடைந்ததால், நேற்றிரவு உயிரிழந்தார். வசந்தி ஸ்டான்லியின் உடல் சென்னை லாயிட்ஸ் காலனியில் உள்ள அவரது வீட்டில் மாலை 6 மணி வரை பொதுமக்கள் அஞ்சலிக்காக வைக்கப்படுகிறது.