 "அஜித்குமார் லாக்கப் மரணம்: சிபிஐயிடம் வழக்கை ஒப்படைக்க அவசியமே இல்லை - ஹென்றி திபேன் பளிச்!")
)
Ajithkumar Lockup Death: மதுரை மாவட்ட ஆட்சியர் அலுவலகம் அருகே இடதுசாரிகள் கூட்டமைப்பின் சார்பாக திருப்புவனம் அஜித் குமார் லாக்கப் மரணத்தை கண்டித்து இன்று (ஜூலை 3) ஆர்ப்பாட்டம் நடைபெற்றது. இதில் மக்கள் கண்காணிப்பக நிர்வாக இயக்குநர் ஹென்றி திபேன், மக்கள் சிவில் உரிமை கழக மாநிலத் தலைவர் பேராசிரியர் முரளி உள்ளிட்ட பல்வேறு அமைப்புகளின் பிரதிநிதிகள் கலந்து கொண்டனர். புரட்சிகர இளைஞர் முன்னணியின் ஒருங்கிணைப்பாளர் குமரன் இந்த ஆர்ப்பாட்டத்திற்கு தலைமை வகித்தார்.
Ajithkumar Lockup Death: என்னென்ன கோரிக்கைகள்?
சிவகங்கை மாவட்ட காவல் கண்காணிப்பாளரை பணி நீக்கம் செய்தல், டிஎஸ்பி மீது கொலை வழக்கு பதிவு செய்தல், உயிரிழந்த அஜித்குமார் குடும்பத்திற்கு ரூபாய் ஒரு கோடி நிவாரணத்தை தமிழக அரசு பாதியும், மீதத் தொகையை எஸ்பி, டிஎஸ்பி மற்றும் இந்த வழக்கில் தொடர்புடைய காவலர்கள் குடும்ப சொத்துகளில் இருந்து வழங்குதல் உள்ளிட்ட கோரிக்கைகளை வலியுறுத்தி ஆர்ப்பாட்டம் நடைபெற்றது.
Ajithkumar Lockup Death: பத்திரிகையாளர்களின் பங்கு
அப்போது செய்தியாளர்களை சந்தித்த ஹென்றி திபேன், "அஜித் குமார் சித்ரவதை படுகொலை விவகாரத்தில் பத்திரிக்கையாளர்களின் பங்கு மிகப் பாராட்டுக்குரியது. இதுவரை நடைபெற்ற சுமார் 30 காவல் நிலைய சித்திரவதை மரணங்கள் அனைத்துமே நீதித்துறை, காவல்துறையில் உள்ள சில நபர்களால் தாமதப்படுத்தப்பட்டது.
கடந்த 2022ஆம் ஆண்டு சென்னையில் விக்னேஷ் என்பவர் படுகொலை செய்யப்பட்ட வழக்கின் சாட்சியங்களை 40 நாட்கள் மிகக் கடுமையாக நின்று பாதுகாத்தோம். தற்போது தான் அந்த வழக்கு எஸ்சி, எஸ்டி சட்டத்தில் சேர்க்கப்பட்டு விசாரணை நடைபெற்று வருகிறது. ஆகையால் இயன்ற வரையில் ஒவ்வொரு வழக்கையும் நாங்கள் போராடி போராடி தான் நடத்தி வருகிறோம்.
Ajithkumar Lockup Death: எஸ்.பிக்கு உத்தரவிட்டது யார்?
அஜித் குமார் வாழ்க்கை பொறுத்தவரை அம்பை எய்தவர்கள் டிஎஸ்பி மற்றும் ஏடிஎஸ்பி. ஆனால் இவர்களுக்கும் மேலாக இவர்களுக்கு உத்தரவிட்டவர்கள் யார் என்பதை இவர்களது தொலைபேசி உரையாடலை வைத்து அரசு நிர்வாகத்தால் கண்டுபிடிக்க இயலாதா?. ஏடிஜிபி டேவிட்சன் தேவாசீர்வாதம் கூறுகின்ற சில விஷயங்களில் தான் எனக்கு உடன்பாடு இல்லையே தவிர அவர் மீது நம்பிக்கை இல்லை என்பதெல்லாம் தவறு. லாக்கப் சித்தரவதை படுகொலை நேரத்தில் என்ன அறிக்கை வெளியிட வேண்டும் என அவருக்கு தெரியாதா? சம்பந்தமில்லாத நேரத்தில் பொருத்தமற்று அறிக்கை வெளியிடுகிறார், அதனை நாங்கள் கண்டிக்கிறோம்.
Ajithkumar Lockup Death: டேவிட்சன் தேவாசீர்வாதத்தின் அறிக்கைக்கு கண்டனம்
இந்த சம்பவம் சார்ந்து அவர் அறிக்கையை வெளியிட்டு இருக்க வேண்டும். பெரும்பாலான காவல் நிலையங்களில் சிசிடிவி கேமராக்கள் இல்லை அது குறித்து அந்த அறிக்கையில் ஏதேனும் தகவல் உண்டா? அதிகாரப்பூர்வமற்ற சிறப்பு தனிப்படை காவலர் குழுக்களை கலைத்து டிஜிபி உத்திரவிட்டதை போன்று இவர் ஏதேனும் செய்தாரா? இதையெல்லாம் விட்டுவிட்டு காவல் நிலையங்களில் மனு வாங்காதீர்கள், பிரசவத்திற்கு செல்லும் பெண் காவலர்களுக்கு அவர்கள் கேட்கின்ற இடங்களுக்கு மாற்றம் வழங்குங்கள் என்று கூறுவதா இப்போதைய தேவை? ஆண் காவலருக்கு இருக்கின்ற அதே பணி பொறுப்பு பெண் காவலருக்கு உண்டு என்பது இவருக்கு தெரியாதா? இதற்கெல்லாம் இந்த மகளிர் அமைப்புகள் குரல் கொடுக்க வேண்டுமா வேண்டாமா?
Ajithkumar Lockup Death: சிபிஐயிடம் ஒப்படைக்க அவசியம் இல்லை
இது போன்ற காவல் நிலைய படுகொலைக்கு ஆதாரமாக உள்ள சாட்சியங்களை பாதுகாப்பது காவல்துறையின் கடமை. குறிப்பிட்ட சாட்சியத்திற்கு நம்பிக்கை கூறிய காவலர்களை தான் பாதுகாப்புக்கு அமர்த்த வேண்டும். சிபிஐ விசாரணைக்கு உத்தரவிட்டுள்ள தமிழக முதல்வரின் எண்ணம் மதிப்பிற்குரியது. அஜித் குமார் காவல் நிலைய சித்திரவதை படுகொலை வழக்கை சிபிஐ இடம் ஒப்படைக்க வேண்டிய அவசியம் இல்லை. ஆனால் அதை காட்டிலும் தமிழக காவல்துறையிலேயே மூத்த நேர்மையான அதிகாரிகள் உள்ளனர். ஆகையால் அவர்களைக் கொண்டு இந்த விசாரணையை மேற்கொள்வது தான் சரியானதாக இருக்கும்" என்றார்.
அஜித்குமார் லாக்கப் மரணம் குறித்து சென்னை உயர் நீதிமன்றத்தின் மதுரைக்கிளையில் நடந்த விசாரணையின்போது, அஜித்குமார் தரப்புக்காக வழக்கறிஞராக ஹென்றி திபேன் ஆஜராகி இருந்தார். ஹென்றி திபேன் மனித உரிமை செயற்பாட்டாளரும் ஆவார்.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
