 "பட்டாவில் மாற்றம் செய்யனுமா? இனி கவலை வேண்டாம் - தமிழக அரசு அறிவிப்பு!")
தமிழ்நாட்டில் வாரிசு சான்றிதழ் பெறுவது, பட்டாவில் பெயர் மாற்றம் செய்வது போன்ற அரசு சேவைகளை பெறுவதற்காக, பொதுமக்கள் இனி இ-சேவை மையங்களுக்கும், வட்டாட்சியர் அலுவலகங்களுக்கும், கிராம நிர்வாக அதிகாரி (VAO) அலுவலகங்களுக்கும் மீண்டும் மீண்டும் நடையாய் நடக்க வேண்டியதில்லை. தமிழ்நாடு அரசு அறிமுகப்படுத்தியுள்ள "உங்களுடன் ஸ்டாலின்" சிறப்பு முகாம்கள், இந்த சிக்கலான நடைமுறைகளை மிகவும் எளிதாக்கி, மக்களின் இல்லங்களுக்கே அரசு சேவைகளை கொண்டு வந்துள்ளன.
பொதுமக்களின் சிரமங்கள்
இதுநாள் வரை வாரிசு சான்றிதழ் வாங்க வேண்டுமானால், முதலில் இ-சேவை மையங்களில் விண்ணப்பித்து, பின்னர் தேவையான ஆவணங்களுடன் கிராம நிர்வாக அதிகாரி மற்றும் வருவாய் ஆய்வாளரை சந்தித்து, இறுதியாக வட்டாட்சியர் அலுவலகத்திற்கு சென்று ஒப்புதல் பெற வேண்டியிருந்தது. இதேபோல, பட்டாவில் பெயர் மாற்றுவதற்கும் பல அரசு அலுவலகங்களின் படிகளில் ஏறி இறங்க வேண்டியிருந்தது. இந்த நீண்ட செயல்முறைகளால், பொதுமக்களுக்கு கால விரயமும், அலைச்சலும், பணச் செலவும் அதிகமாக இருந்தது. இந்த சிரமங்களை போக்கும் வகையில், "உங்களுடன் ஸ்டாலின்" திட்டத்தின் கீழ், ஒவ்வொரு பகுதியிலும் சிறப்பு முகாம்கள் நடத்தப்படுகின்றன. இந்த முகாம்களில் வருவாய்த்துறை, வேளாண்துறை போன்ற 13க்கும் மேற்பட்ட முக்கிய அரசு துறைகளின் அதிகாரிகள் ஒரே இடத்தில் இருப்பார்கள். இதனால், மக்கள் தங்களின் பல்வேறு தேவைகளுக்கும் ஒரே இடத்தில் தீர்வு காண முடிகிறது.
முகாம்களில் எளிதாகும் சேவைகள்
வாரிசு சான்றிதழ் - வாரிசு சான்றிதழ் பெற தேவையான விண்ணப்பத்தை பூர்த்தி செய்து, உரிய ஆவணங்களுடன் முகாமிலேயே சமர்ப்பிக்கலாம். மனுக்கள் மீது உடனடியாக நடவடிக்கை எடுக்கப்பட்டு, சான்றிதழ்கள் வழங்கப்படுகின்றன.
பட்டா மாற்றம் - பட்டா தொடர்பான திருத்தங்கள், பெயர் மாற்றங்கள் போன்ற சேவைகளுக்கு, வருவாய்த்துறை அதிகாரிகள் முகாமிலேயே இருப்பதால், பொதுமக்களுக்குத் தேவையான வழிகாட்டுதல்களை வழங்கி, செயல்முறையை எளிதாக்குகின்றனர்.
உடனடி தீர்வு - முகாம்களில் பெறப்படும் மனுக்கள் மீது உடனடியாகத் தீர்வு காண முயற்சிகள் மேற்கொள்ளப்படுகின்றன. மற்ற கோரிக்கைகள், அதிகபட்சமாக 45 நாட்களுக்குள் நிறைவேற்றப்படும் என அரசு உறுதியளித்துள்ளது.
தேவையான ஆவணங்கள்
வாரிசு சான்றிதழ் போன்ற சேவைகளை பெற, கீழ்க்காணும் அடிப்படை ஆவணங்களை எடுத்து செல்வது அவசியம். இறந்தவரின் இறப்புச் சான்றிதழ், விண்ணப்பதாரர் மற்றும் அனைத்து வாரிசுதாரர்களின் ஆதார் அட்டை, குடும்ப அட்டை (ரேஷன் கார்டு), ஒரு சுய உறுதிமொழிப் பத்திரம், அனைத்து வாரிசுகளின் முகவரி மற்றும் பிறந்த தேதிக்கான சான்றுகள். இந்த "உங்களுடன் ஸ்டாலின்" முகாம்கள், அரசு நிர்வாகத்தை மக்களின் இருப்பிடத்திற்கு அருகிலேயே கொண்டு வந்து, சிக்கலான நடைமுறைகளை எளிமைப்படுத்தி, பொதுமக்களின் நேரத்தையும், பணத்தையும் மிச்சப்படுத்துவதில் ஒரு முக்கியப் பங்காற்றுகின்றன.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
)