LIVE Tamilnadu, Actor Manoj Last Rites : இயக்குநர் இமயம் பாரதிராஜாவின் மகன் நடிகர் மனோஜ் மாரடைப்பால் நேற்று மாலை காலமானார். அவரது உடல் சேத்துப்பட்டில் வைக்கப்பட்டிருந்த நிலையில், நீலாங்கரையில் உள்ள பாரதிராஜா வீட்டில் அஞ்சலிக்காக வைக்கப்பட்டுள்ளது. நடிகர் மனோஜின் உடலுக்கு திரைப் பிரபலங்கள் காலை முதல் அஞ்சலி செலுத்தி வருகின்றனர். நடிகர் கார்த்தி உள்ளிட்டோர் நேற்றிரவு நேரில் மனோஜ் உடலுக்கு அஞ்சலி செலுத்திய நிலையில், இன்று நடிகர்கள் விஜய், சூர்யா, பிரபு உள்ளிட்டோர் அஞ்சலி செலுத்தினர். இன்னும் பல முக்கியஸ்தர்ஸ் அஞ்சலி செலுத்த உள்ளனர். இதனைத் தொடர்ந்து அவரது உடலுக்கு இறுதி மரியாதை நடைபெற இருக்கிறது.
2026ல் சட்டப்பேரவை தேர்தல் வர இருப்பதால் அதிமுக - பாஜக கூட்டணி குறித்த பேச்சுவார்த்தை டெல்லியில் நடைபெற்றுள்ளது. நேற்று மாலை உள்துறை அமைச்சர் அமித்ஷாவை சந்தித்த அதிமுக பொதுச்செயலாளர் எடப்பாடி பழனிசாமி மற்றும் முனுசாமி, எஸ்பி வேலுமணி, தங்கமணி, சிவி சண்முகம் ஆகியோர் இதுதொடர்பாக சுமார் 1 மணி நேரத்துக்கும் மேலாக அமித்ஷாவிடம் பேச்சுவார்த்தை நடத்தியிருக்கின்றனர். அவர் எடப்பாடி பழனிசாமிக்கு சில அறிவுறுத்தல்களை வழங்கியுள்ளதாக தெரிகிறது. இருப்பினும் அதிமுக பாஜக கூட்டணி ஏறத்தாழ உறுதி செய்யப்பட்டு விட்ட நிலையில், வரும் நாட்களில் அதிகாரப்பூர்வ அறிவிப்பு வெளியாக உள்ளது.
சென்னையில் நேற்று காலை 6 இடங்களில் வழிப்பறியில் ஈடுபட்ட வட மாநில கொள்ளை கும்பல் கைது செய்யப்பட்டது. அவர்களை விசாரித்த சென்னை காவல்துறை நள்ளிரவில் நகைகளை மீட்க அழைத்துச் சென்றபோது கொள்ளை கும்பலின் முக்கிய நபர் ஜாபர் குலாம் ஹூசைன் என்பவர் என்கவுண்டரில் சுட்டுக் கொல்லப்பட்டார். இதுகுறித்து காவல்துறை விசாரித்து வருகிறது. இதுதவிர இன்றைய நாளின் முக்கிய செய்திகளின் லைவ் அப்டேட்டுகளை இங்கே தெரிந்து கொள்ளுங்கள்....
