 "120 பவுன் போதவில்லை... வரதட்சணை கொடுமையால் பெண் தற்கொலை - திருப்பூரில் மீண்டும் ஷாக்")
Tiruppur Domestic Violence, Women Suicide: திருப்பூர் பிரண்ட்ஸ் கார்டன் பகுதியைச் சேர்ந்த சுகந்தி என்பவரது மகள் பிரீத்தி. பிரீத்திக்கும், ஈரோடு மாவட்டம் வீரப்பன் சத்திரம் பகுதியைச் சேர்ந்த சதீஷ்வர் என்பவருக்கும் கடந்த ஆண்டு செப்டம்பர் மாதம் 15ஆம் தேதி திருமணம் நடந்துள்ளது.
திருமணத்தின் போது 120 பவுன் தங்க நகை, 25 லட்ச ரூபாய் ரொக்கம், 38 லட்ச ரூபாய் மதிப்பிலான இன்னோவா கார் உள்ளிவற்றை வரதட்சனையாக வழங்கி உள்ளனர். இதையடுத்து, பெண்ணின் பூர்வீக சொத்தை விற்பனை செய்ததால் 50 லட்ச ரூபாய் பணம் வருவதை அறிந்து அதனையும் கேட்டு சதீஷ்வர் பிரீத்தியை கொடுமைப்படுத்தியிருக்கிறார்.
திருமணம் முடிந்து 10 மாதத்தில் வரதட்சணை கொடுமை காரணமாக கணவர் வீட்டில் இருந்து வெளியேறி தாய் வீட்டிற்கு வந்துள்ளார் பிரீத்தி. ஒரு மாதமாக மன உளைச்சலில் இருந்த பிரீத்தி நேற்று (ஆகஸ்ட் 6) மாலை தாயார் வெளியே சென்ற போது வீட்டில் யாரும் இல்லாத நேரத்தில் தற்கொலை செய்துகொண்டார்.
(வாசகர்கள் கவனத்திற்கு: தற்கொலைக்கு முயல்வது எதற்கும் முடிவல்ல. தற்கொலை எண்ணங்கள் எழுந்தால், சினேகா அமைப்பின் 044 -24640060 ஹெல்ப்லைன் எண்ணிற்கு தொடர்புக் கொள்ளலாம். மேலும், தமிழக அரசின் ஹெல்ப்லைன் நம்பர் 104 க்கும் தொடர்புகொண்டு நீங்கள் பேசலாம்)
அவரது உடலை மீட்ட நல்லூர் போலீசார் உடற்கூராய்வு சோதனைக்காக திருப்பூர் அரசு மருத்துவக் கல்லூரி மருத்துவமனைக்கு அனுப்பி வைத்து விசாரணை மேற்கொண்டு வருகின்றனர். மேலும் ஆர்.டி.ஓ விசாரணையும் நடைபெற்று வருகிறது. இந்நிலையில், வரதட்சணை கொடுமையால் பெண் உயிரிழந்த நிலையில் திருப்பூர் அரசு மருத்துவக் கல்லூரி மருத்துவமனைக்கு திருப்பூர் மாநகர காவல் ஆணையர் ராஜேந்திரன் வந்தார்.
அப்போது காவல் ஆணையர் ராஜேந்திரனை முற்றுகையிட்ட பெண்ணின் உறவினர்கள், பெண்ணின் கணவர் மற்றும் அவரது குடும்பத்தினர் மீது எந்த நடவடிக்கையும் எடுக்கவில்லை எனவும் உடனடியாக அவர்கள் மீது நடவடிக்கை எடுக்க வேண்டும் என்றும் கோரிக்கை விடுத்து வாக்குவாதத்தில் ஈடுபட்டனர். உரிய முறையில் விசாரித்து நடவடிக்கை எடுக்கப்படும் என காவல் ஆணையர் உறுதி அளித்தார். இருப்பினும், நடவடிக்கை எடுக்கும் வரை பெண்ணின் உடலை வாங்க மறுப்பு தெரிவித்துள்ளனர்.
இதேபோல், கடந்த ஜூன் மாத இறுதியில் திருப்பூரில் வரதட்சணை கொடுமையால் ரிதன்யா என்ற பெண் தற்கொலை செய்துகொண்டது நாடு முழுவதும் பேரதிர்ச்சியை ஏற்படுத்தியது. ரிதன்யாவை அவரது கவின்குமார், மாமனார் ஈஸ்வரமூர்த்தி, மாமியார் சித்ராதேவி ஆகியோர் மன ரீதியாகவும், உடல் ரீதியாகவும் கொடுமைப்படுத்தியதாக குற்றஞ்சாட்டப்பட்டது. இதைத் தொடர்ந்து ரிதன்யாவின் கணவர், மாமனார், மாமியார் ஆகிய மூவரும் கைது செய்யப்பட்டு சிறையில் அடைக்கப்பட்டனர். நீதிமன்றத்தில் விசாரணை மேற்கொள்ளப்பட்டு வருகிறது.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
)