 "பெரியாரை முழுமையாக ஏற்றுக்கொண்டாரா விஜய்...? திருமா கேட்ட கேள்வி...!")
)
Tirumavalavan Latest News Updates: சென்னை விமான நிலையத்தில் திருச்சி செல்வதற்காக வந்த விடுதலை சிறுத்தைகள் கட்சியின் தலைவர் திருமாவளவன் செய்தியாளர்களைச் சந்தித்தார்.
அப்போது பேசிய திருமாவளவன், "அதிமுக கூட்டணியை பொறுத்த அளவில் பாஜக தான் வழி நடத்துகிறது என்பதை அமித்ஷாவை வைத்து அவ்வப்போது பேசிக் கொண்டிருக்கிறார்கள். என்னைப் பொருத்தவரையில் அதிமுக அமைதியாக இருக்கிறது. பாஜகதான் சுறுசுறுப்பாக செயல்படுகிறது. அதனால் அந்த கூட்டணியை பாஜகதான் வழி நடத்துகிறது என்பது எனது பார்வையாக உள்ளது.
Tirumavalavan: 2 சீட்டாக குறைந்தாலும்...
தமிழ்நாட்டில் பாஜக நிலைக் கொள்வதை எப்படி அனுமதிக்க முடியும். தமிழ்நாட்டில் சமூக நீதிக்கான குரல் கடந்த அரை நூற்றாண்டாக வலுவாக ஒலித்துக் கொண்டிருக்கிறது. அதிமுக என்ற எம்ஜிஆர், ஜெயலலிதா போன்ற திராவிட தலைவர்கள் வந்த திராவிட கட்சியில் இருந்து சென்றவர்தான் பாஜகவின் தலைவர் நயினார் நாகேந்திரன். அப்படி தெரிந்துதான் அவரை தலைவர் ஆக்கி இருக்கிறார்கள், பாஜகவினர்.
அதிமுகவை விழுங்குவதுதான் பாஜகவின் உடனடி திட்டம். இதை எப்போது அதிமுக உணரப்போகிறது. நாங்கள் இரண்டு சீட்டாக குறைந்தாலும், நாங்கள் ஆண்ட கட்சி அல்ல. இப்பொழுதும் 65 சட்டமன்ற உறுப்பினர்களை கொண்ட கட்சி ஆண்ட கட்சி. அது தேய்மானம் அடைவதற்கு அதிமுக உடன்படுகிறதா, பாஜக அதை நோக்கி செயல்படுகிறதா இல்லையா?.
Tirumavalavan: தற்கொலைக்கு சமமானது
பெரியார், அண்ணா என்னும் இருபெரும் தலைவர்கள் குறித்து முருக பக்தர்கள் மாநாட்டில் வீடியோ வெளியிட்டுள்ளார்கள். அவர்களுடன் எப்படி (அதிமுக) பயணிக்கிறார்கள், பெரியாரையும் அண்ணாவையும் கொச்சைப்படுத்தும் பாஜக சங் பரிவார அமைப்புகளோடு அதிமுக பயணிப்பது தற்கொலைக்கு சமமானது" என்றார்.
Tirumavalavan: திமுக கூட்டணியில் பாமக வந்தால்...
மேலும், பாமக திமுகவுடன் கூட்டணி குறித்து பேச்சுவார்த்தை நடத்தி வருவதாக கூறப்படும் நிலையில், நீங்கள் அந்த கூட்டணியில் தொடர வாய்ப்புள்ளதா என கேட்டபோது, இது ஒரு யூகத்தின் அடிப்படைியிலான கேள்வி, அது நடந்தால் பார்க்கலாம்.
திமுக கூட்டணியில் 2011ஆம் ஆண்டு தேர்தலில் பாமகவும் விடுதலை சிறுத்தைகள் கட்சியும் இருந்திருக்கிறது. அதன்பிறகு பாமகவின் நடவடிக்கைகளால் தான் நாங்கள் பல அவதூறுகளுக்கு ஆளாக வேண்டிய சூழ்நிலை ஏற்பட்டது. தனிப்பட்ட முறையில் என்னை குறிவைத்து கூலிப்படையினர் சுற்றி வளைக்கும் நிலை ஏற்பட்டது. அதன் பிறகு நாங்கள் எடுத்த நிலைப்பாடுதான் இது.
Tirumavalavan: கமல் திமுகவோடு கூட்டணிக்கு வந்தது ஏன்?
திமுகவை எதிர்க்கும் கட்சிகளை பாஜகவின் B Team என கூறிவிட்டு, அதன் பிறகு அவர்கள் திமுகவிலேயே போய் இணைகிறார்கள் என்பது குறித்து கேட்டபோது, "பாஜகவினர் பேசும் வலதுசாரி அமைப்புகள் குறித்து பேசும்போது, அவர்களின் B Team என குறிப்பிட வேண்டிய நிலை ஏற்படுகிறது. அண்ணா, பெரியார் கழகங்கள் இல்லாத ஆட்சி போன்றவை பாஜகவின் கொள்கைகள், இதுபோன்ற அரசியலை பேசினால் B Team என்று கூறாமல் வேறு எப்படி சொல்ல முடியும்
இது திமுகவை மட்டும் எதிர்ப்பது கிடையாது, சமூகநீதிக்கு எதிராக பாஜக பேசுகிறது. அதே அரசியலை வேறு பெயரில் பேசினால் அது அப்படித்தான் கூற முடியும். கமலஹாசன் திமுகவுடன் வந்திருக்கிறார் என்றால் அவர் தொடக்கத்தில் பேசிய அரசியலுக்கும் இப்போது பேசும் அரசியலுக்கும் ஒரு மாற்றம் ஏற்பட்டுள்ளது. அவர் பாஜக எதிர்ப்பு, வலதுசாரி எதிர்ப்பு என்ற கொள்கைகளை கையில் எடுத்தபோது திமுகவில் இணைந்திருக்கலாம்.
மைய வாதம் பேசி, நடுநிலையாக இருந்து கொண்டிருக்க முடியாது. ஏதாவது ஒரு சார்பு எடுத்து தான் அரசியல் பண்ண வேண்டிய தேவை இருக்கிறது என மாற்றம் ஏற்பட்டிருக்கிறது என உணர்ந்து இருக்கலாம்" என்றார்.
Tirumavalavan: விஜய் குறித்து திருமா...
தொடர்ந்து பேசிய திருமாவளவன், "முருக பக்தர்கள் மாநாட்டில் பெரியார் குறித்து அவதூறாக வீடியோ வெளியிட்டதற்கு தமிழக வெற்றி கழகத்தின் தலைவர் விஜய் எதிர்ப்பு தெரிவித்திருக்க வேண்டும் அல்லது அவரைச் சார்ந்தவர்கள் அவருக்கு கூறி இருக்க வேண்டும். பெரியாரைப் பற்றி அவதூறு பரப்பிய பிறகும் அவர் அதற்கு கண்டனம் தெரிவிக்கவில்லை என்றால் உண்மையாகவே பெரியாரை ஏற்றுக் கொண்டாரா என்பது கேள்விக்குறியாக உள்ளது" என்றார்.
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..
முகநூல் - @ZEETamilNews
ட்விட்டர் - @ZeeTamilNews
டெலிக்ராம் - https://t.me/ZeeTamilNews
அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link: https://bit.ly/3AIMb22
Apple Link: https://apple.co/3yEataJ
