Arogyasri Strike: ఏపీలో ఆరోగ్య శ్రీ సేవలు ఆగిపోనున్నాయి. బిల్లుల చెల్లింపులో ప్రభుత్వ వైఖరికి నిరసనగా ఆరోగ్య శ్రీ సేవలు నిలిపివేయాలని ఆంధ్రప్రదేశ్ స్పెషాలిటీ హాస్పిటల్స్ అసోసియేషన్ ప్రకటించింది ప్రభుత్వానికి సమ్మె నోటీసు అందించింది. ఏప్రిల్ 7 నుంచి ఏపీలో ఆరోగ్య శ్రీ సేవలు ఆగిపోనున్నాయి.
ఏపీలో ఆసుపత్రులు సైరన్ మోగించాయి. ఆరోగ్య శ్రీ సేవల్ని ఏప్రిల్ 7 నుంచి నిలిపివేయాలని నిర్ణయించాయి. ప్రభుత్వం నుంచి రావల్సిన 3500 కోట్ల బకాయిల చెల్లింపు విషయంలో రాష్ట్ర ప్రభుత్వం నిర్లక్ష్యంగా వ్యవహరిస్తున్నందున ఈ నిర్ణయం తీసుకున్నట్టు ఆసుపత్రుల యాజమాన్యాలు తెలిపాయి. ఏపీలో కూటమి ప్రభుత్వం ఏర్పడిన తరువాత ఈ పది నెలల కాలంలో ఏకంగా 26 సార్లు బిల్లుల చెల్లింపు విషయమై ఎన్టీఆర్ వైద్యసేవ ట్రస్ట్ సీఈఓను, వైద్య శాఖ స్పెషల్ ఛీఫ్ సెక్రటరీని, ఐటీ శాఖ మంత్రిని, ముఖ్యమంత్రిని కలిసినా ఫలితం లేకపోయిందని ఏపీ స్పెషాలిటీ హాస్పటల్స్ అసోసియేషన్ తెలిపింది.
ఎన్నిసార్లు విన్నవించినా తమ సమస్యల పట్ల సానుకూలమైన స్పందన లేకపోవడం, బిల్లులు రాక ఆసుపత్రులు నష్టాల్లో కూరుకుపోయి ఉండటంతో ఏప్రిల్ 7 నుంచి ఆరోగ్య శ్రీ సేవలు నిలిపివేయాలని నిర్ణయించినట్టు అసోసియేషన్ అధ్యక్షుడు డాక్టర్ విజయ్ కుమార్ తెలిపారు. మొత్తం బకాయిలు 3500 కోట్లలో తక్షణం 1500కోట్లు విడుదల చేసి, మిగిలిన చెల్లింపుపై స్పష్టమైన హామీ ఇస్తేనే ఆరోగ్య శ్రీ సేవలు కొనసాగుతాయని చెప్పారు.
ఏప్రిల్ 7వ తేదీ వరకు వివిధ రూపాల్లో నిరసన కార్యక్రమాలు చేపట్టనున్నట్టు డాక్టర్ విజయ్ కుమార్ తెలిపారు. ఇందులో భాగంగా మార్చ్ 25వ తేదీన జిల్లా కలెక్టర్లు, జిల్లా ఆరోగ్య శ్రీ కో ఆర్డినేటర్లు, డీఎంహెచ్ఓలకు వినతి పత్రాలు అందిస్తామన్నారు. మార్చ్ 27వ తేదీన ఎంఎల్ఏలు, ఎంపీలు , జిల్లా ఇన్చార్జిలను కలిసి వినతి పత్రాలు ఇవ్వనున్నారు. ఇక ఈ నెల 29వ తేదీన నల్ల బ్యాడ్జీలతో నిరసన కార్యక్రమాలు ఉంటాయి. ఏప్రిల్ 3వ తేదీన రాష్ట్రంలోని కార్పొరేట్ ఆసుపత్రుల హెడ్స్, అసోసియేషన్ ప్రతినిధులు విజయవాడ, విశాఖపట్నంలో ప్రెస్ మీట్స్ ఏర్పాటు చేయనున్నారు.
వాస్తవానికి ఏపీ ప్రభుత్వం ఆరోగ్య శ్రీ పధకాన్ని నిలిపివేసే ఆలోచనలో ఉంది. దీనికి ప్రత్యామ్నాయంగా బీమా సౌకర్యం అందించే యోచన చేస్తోంది. ఈ నేపధ్యంలో ఏప్రిల్ 7 నుంచి ఆసుపత్రి యాజమాన్యాలు ఆరోగ్య శ్రీ సేవలు నిలిపివేసినా ప్రయోజనం ఉంటుందా లేదా అనేది సందేహమే.
స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్లోడ్ చేసుకోండి.
ఆండ్రాయిడ్ లింక్ - https://bit.ly/3P3R74U
ఆపిల్ లింక్ - https://apple.co/3loQYe
Twitter, Facebook సోషల్ మీడియా పేజీలు సబ్స్క్రైబ్ చేసేందుకు క్లిక్ చేయండి
)