తిరుమలలో వేంకటేశ్వర స్వామిని దర్శించుకున్న అనంతరం ఓ ప్రైవేటు ట్రావెల్స్ బస్సులో హైదరాబాద్ తిరుగు ప్రయాణమైన కొంతమంది భక్తులు అనుకోకుండా ఓ రోడ్డు ప్రమాదం బారినపడి ఆపదలో చిక్కుకున్నారు. మంగళవారం రాత్రి తిరుపతి నుంచి హైదరాబాద్ బయల్దేరిన ట్రావెల్స్ బస్సు బుధవారం తెల్లవారుజామున జోగులాంబ గద్వాల జిల్లా ఇటిక్యాల మండలం కొండేరు గ్రామం సమీపంలో బోల్తా పడింది. ప్రమాదానికి గురైన బస్సు ఆరెంజ్ ట్రావెల్స్‌కి చెందిన ఏఆర్02 4198 నెంబర్ గల బస్సుగా తెలుస్తోంది. 


ప్రమాదం జరిగిన సమయంలో బస్సులో 47 మంది ప్రయాణిస్తున్నారు. ప్రయాణికులందరికీ గాయాలు కాగా అందులో ఒకరి పరిస్థితి విషమంగా ఉందని సమాచారం అందుతోంది. ఘటన జరిగిన వెంటనే సమాచారం అందుకున్న స్థానికులు, పోలీసులు హుటాహుటిన ఘటనా స్థలికి చేరుకుని క్షతగాత్రులను చికిత్స నిమిత్తం ఆసుపత్రికి తరలించారు. బస్సు డ్రైవర్ నిద్రమత్తులో ఉండి అధిక వేగంతో బస్సు నడపడమే ఈ ప్రమాదానికి కారణమని బాధితులు ఆరోపిస్తున్నారు.